Энэхүү хуулийг санаачлан батлуулсан УИХ-ын гишүүн Д.Одхүү, Д.Зоригт, Р.Буд, З.Энхболд, З.Алтай нар сэтгүүлчдэд мэдээлэл хийсэн юм.

Манай улсын нийт хөдөлмөр эрхэлж буй сая гаруй хүний 450 мянга нь жижиг, дунд үйлдвэр эрхлэгчид бөгөөд энэ хууль дээрх салбарт бодитой дэмжлэг болж, ажлын байрыг нэмэгдүүлнэ хэмээн Д.Одхүү гишүүн мэдээллээ. Нийт жижиг дунд үйлдвэрлэл эрхлэгчдийн 20 гаруй мянга нь тоног төхөөрөмж хуучирч муудсан, дэмжлэг үзүүлээч гэсэн хүсэлтийг холбогдох яамд, газарт тавиад байсан аж. Тэгвэл дээрх 20 мянгаас гадна бусад жижиг, дунд үйлдвэрлэл эрхлэгчдэд техникийн шинэчлэл хийх бүрэн боломж нээгдэж байгаа юм гэж Р.Буд гишүүн тайлбарласан юм.

Мөн жижиг, дунд үйлдвэрлэл эрхлэгчдэд арилжааны банкуудаар дамжуулан олгох зээлийн хэмжээг 2009 онд 30 тэрбум төгрөг болгон нэмэх шийдвэрийг УИХ-аас гаргасан нь энэ салбарыг дэмжихэд бодит алхам болно хэмээн тэрбээр хэлсэн. Гаднаас тоног төхөөрөмжөө оруулж, үйлдвэрлэлээ эхлээгүй байж гааль, НӨАТ нийлээд 15 хувийн татвар төлдөг нь үйлдвэрлэл эрхлэгчдэд маш их дарамт болж байсан бөгөөд одоо энэхүү дарамт эцэс боллоо гэж З.Энхболд гишүүн мэдээлэв.

Өнгөрсөн жилүүдэд үйлдвэрлэл эрхлэгчдэд олгох зээлийн хэмжээ нэг тэрбум төгрөг байсан бол өдгөө энэ тоо үлэмж хэмжээгээр өсөөд байгаа юм. Мөн жижиг, дунд үйлдвэрлэл эрхлэгчдэд хоёр жилийн хугацаатай, жилийн 12 хувийн хүүтэй зээл олгодгийг таван жил болгон сунгаж, хүүг жилийн зургаан хувиас доош буулгах тухай албан бичгийг УИХ-аас холбогдох яамд, газруудад илгээгээд байгаа аж. Энэ асуудал шийдэгдвэл ажлын байр олноор нэмэгдэн, ард иргэдийн амьдрал сайжран, улсын төсөвт татвараас чөлөөлсөн хэмжээнээс их орлого орно гэдэгт гишүүд итгэлтэй байгаагаа илэрхийлсэн юм.

Гэхдээ УИХ-ын намрын чуулганаар жижиг, дунд үйлдвэрлэл эрхлэгчдэд олгохоор баталсан 30 тэрбум төгрөгийн зээл хэн нэгэн албан тушаалтны хүнд суртлаас болоод өнөөг хүртэл эзэндээ очиж эхлээгүй байгаа юм. Тоног төхөөрөмжөө худалдан авч, үйлдвэрлэлээ эхлэн ашгаа олоод эхэлчих хугацаа өнгөрөөд байхад зарим албан тушаалтны буруугаас ийн хугацаа алдаж байгаад З.Алтай гишүүн сэтгэл гонсгор байгаа аж. Нөгөө талаар үйлдвэр эрхлэгчдэд мэдээлэл хүргэх тал дээр учир дутагдалтай байгаагаас иргэд нөөц бололцоогоо ашиглаж чадахгүй байна хэмээн шүүмжилсэн юм. Тухайлбал, Тайванийн Засгийн газар жижиг, дунд үйлдвэрийн тоног төхөөрөмж худалдан авсан монголын аж ахуйн нэгж байгууллага, хүмүүст нэн хөнгөлөлттэй зээл олгохоор Монголын арилжааны дөрвөн ч банкинд мөнгөө байршуулчихаад багагүй хугацаа өнгөрөөд байгаа ч энэ талаархи мэдээллийг иргэдэд хүргээгүйгээс өнөөг хүртэл энэ боломжийг монголчууд ашиглаж чадаагүй байна. Тиймээс жижиг, дунд үйлдвэрлэл эрхлэгчдэд хэрэгцээтэй мэдээллийг хүргэж байхыг тэрбээр сэтгүүлчдээс хүссэн юм.

Төрийн болон орон нутгийн өмчийн хөрөнгөөр бараа, ажил, үйлчилгээг худалдан авах тухай хуульд нэмэлт, өөрчлөлт оруулах тухай, Төсвийн байгууллагын удирдлага, санхүүжилтийн тухай хуульд нэмэлт оруулах тухай хуулийг мөн пүрэв гарагийн хуралдаанаар баталсан билээ. Эдгээр хуульд оруулсан нэмэлт, өөрчлөлтөөр тендерт Монгол Улсад бүртгэлтэй, татвар төлдөг аж ахуйн нэгж оролцох болж байгаа бөгөөд тэрхүү аж ахуйн нэгжийн 90-ээс доошгүй хувь нь Монгол Улсын иргэд байх ёстой юм. Ингэснээр Төрийн болон орон нутгийн өмчийн хөрөнгөөр бараа, үйлчилгээ худалдан авах тендерт гадны компаниуд оролцон гадны ажилчид цалинжиж явдаг байдлыг эцэс болгож байна. УИХ-ын гишүүн З.Алтай, “Манай улсад 30 гаруй мянган ажилгүй хүн байна гэсэн тоо байдаг. Тэгвэл гаднаас ирээд тендер оролцож ялаад бидний мөнгөөр цалинжаад явдаг төдий тооны хүн байна. Ийм байдлыг эцэс болгохын тулд хууль эрхзүйн хувьд зохицуулалт хийхээс өөр аргагүй байлаа” хэмээн тайлбарлав.