Зөвхөн нийслэлийн бус улсын төсвөөс ихээхэн хэмжээний хөрөнгө оруулалтыг шинэ зам барих, зам засварын ажилд хийхээр төлөвлөөд буй, энэ жил. Түүний түрүүч гэж хэлж болохуйц ажил нь Барилгын коллежийн хажуу талаас “Бөмбөгөр”-ийн уулзвар хүртэлх замын засвар. “40 мянган айлын орон сууц” хөтөлбөрийн хүрээнд сүндэрлэх телевизийн ойр орчимд босох орон сууцны бохирын шугамыг татахаар энэхүү замыг зургадугаар сарын 1 хүртэл хаасан. Тэгвэл дараагийн ээлжийн засварын ажил нь Их тэнгэрийн ам хүртэлх зам. Өчигдрөөс энэхүү замыг хоёр хоногийн хугацаатай хаасан гэнэ. Тиймээс энэ зүг салхинд гарах гэсэн иргэд болон Их тэнгэрийн амны оршин суугчид болох төрийн өндөрлөгүүд Зайсан толгойг тойрч явах хэрэгтэй болж буй аж. Энэ мэт зам хааж засвар хийх ажил өнөө зунжингаа үргэлжлэх гэнэ.

Зургадугаар сарын 1-нээс ашиглалтад орох “Бөмбөгөр”-ийн уулзвар хүртэлх замыг ашиглалтад оруулсны дараа Баруун дөрвөн замаас III, IV дүгээр хороолол руу өгсөх зам буюу бидний хэлж заншснаар “Модны-2″-ын замыг хаахаар болжээ. Энэ хугацаанд Гандангаас Гэсэр сүм рүү уруудсан замыг хоёр урсгалтай болгох ч замын ачаалал эрс ихсэх нь дамжиггүй аж. Түүнчлэн хэзээ хаах нь тодорхойгүй байгаа ч Энхтайваны өргөн чөлөөний Арслантай гүүрийн ойр орчмын замыг хааж хөрсний ус зайлуулах байгууламжийг хийх аж. Энэ үеэр нийтийн болон бусад тээврийн хэрэгсэл Нарангийн зам болон Сансарын тунелээр уруудсан замаар явах юм байна. Энэ бүхний дараа “32″-ын, Их тойруу буюу Баянбүрдийг тойргийг хааж зам засварын ажлыг эхлүүлэх гэнэ. Харин хэдийд хэр хугацаагаар хаах нь одоогоор тодорхойгүй байна. Энэ мэтчилэнгээр гол зам, тойрог болон хорооллын дундах замыг хааж засварын болон шинэ зам тавих ажлыг нийслэлийн Авто замын газраас хийхээр төлөвлөөд буй юм. Тиймээс энэ зун замын ачаалал эрс ихэсч түгжрэл төдий хэмжээгээр гарах бололтой. Харин өмнөх жилийн “32″-ын тойргийн Их сургуулийн гудамжтай холбосон замыг барихад гарсан асуудалтай нэгэн адил асуудал Олимпын гудамжийг Дамдинсүрэнгийн гудамтжай холбосон зам дээр гараад буй аж.

Замын Цагдаагийн газрын араас XIII хороолол хүртэл барих 1.5 километр энэхүү замд нэг тэрбум 799.9 сая төгрөгийн хөрөнгө оруулалт хийх юм. Энэхүү зам нь Сэлбэ голыг дайран өнгөрөх учраас 48.8 метр төмөр бетонон гүүр барих аж. Гэтэл зам барих талбайн нэг хэсэгт 23 айл байгаа бөгөөд бүгдээрээ газраа хувьчилаад авчихсан. Нөгөө хэсэгт нь 37 гарааш буй аж. Тиймээс Авто замын газрынхан иргэдэд нөхөн олговор олгож байж буурийг нь сэлгүүлж талбайгаа чөлөөлж авах хэцүү даваатай учирчээ. Газраа чөлөөлөхөөс татгалзаж гүрийсэн нь хождогийг бэлхнээ харуулсан “32″-ын ойр орчмын айлуудын туршлагыг сайн мэдэх дээрх 23 айл төрөөс өгөх багахан мөнгийг хүлээн зөвшөөрөх эсэх нь тодорхойгүй байна. Тэгэхээр өнөө жил энэ замыг барьж дуусах нь эргэлзээтэй аж. Эцэст нь хотын төвийн болон хорооллуудын голлох замыг ээлж дараалан хааж байя.