Ажил хэрэгч яриа хэлэлцээ олон болж, хамтарч ажиллах гэрээ ч цөөнгүйг үзэглэж амжсан билээ. Ийм ажил хэрэгч яриа хэлэлцээ өрнөсөн нэгэн уулзалт Монголын нийтийн аж ахуй, үйлчилгээний холбоо, Өвөр Монголын Өөртөө засах орны Аж ахуйг хамаарах нийгэмлэгийнхний хооронд болсон билээ. Энэ хоёр байгууллагынхан хамтарч ажиллаад удаагүй ч манайхан Өвөр Монголд зочилж хөршийн мэргэжил нэгтнүүдийнхээ үйл ажиллагаатай танилцаад амжсан юм билээ. Шанг нь татсан энэ ажил хэргийнхээ үргэлжлэл болгож нэг нэгнээсээ суралцах, харилцан туршлага солилцох, хамтарч ажиллах боломж бололцооны талаар санал солилцсон уулзалтыг Улаанбаатар хотын Захирагчийн ажлын албаны байранд зохион байгуулж, хамтарч ажиллах гэрээнд МНААҮХ-ны тэргүүн, Монголын Сууц өмчлөгчдийн холбоодын дээд зөвлөлийн ерөнхийлөгч Б.Жигжид, Өвөр Монголын Аж ахуйг хамаарах нийгэмлэгийн дарга Чэнбаатар нар гарын үсэг зурсан юм.

МНААҮХ 21 аймаг, нийслэлд өөрийн салбартай. Гишүүн байгууллагынх нь нэг Монголын сууц өмчлөгчдийн холбоодын дээд зөвлөл юм. СӨХ-ны Дээд зөвлөлд хот, хөдөөгийн 500 орчим сууц өмчлөгчдийн холбоо хамаардаг. Орон сууцанд оршин суугчдын тав тухтай амьдрах бүхий л нөхцөл бололцоог хангах үүрэгтэй СӨХ манайд 1990-ээд онд орон сууц хувьчилж эхэлсэн үеэс байгуулагдсан. Жилдээ 2-3 сая ам.долларын санхүүжилтийг төрөөс хийж орон сууцнуудын их засварын ажлыг нугалдаг байсан нь санхүү эдийн засгийн хямрал зэргээс үүдэн хийгдэхээ больсон. Засгийн газраас баталсан хөтөлбөрийн дагуу ойрын жилүүдэд Монголд олон мянган орон сууц шинээр босно. Орон сууцны шинэ хорооллуудын дэд бүтцийг улсаас байгуулж өгөх бөгөөд орон сууцыг хувийн хөрөнгө оруулалтаар босгох учиртай. Тиймээс олноороо босох эдгээр шинэ хорооллуудын байшин барилгын засвар үйлчилгээг хариуцсан хамтын байгууллага байгуулах, өндөр орон сууцны цахилгаан шатны засвар үйлчилгээний тал дээр Өвөр Монголын мэргэжил нэгтнүүдээс сурах зүйл их байгааг Б.Жигжид ерөнхийлөгч зочдодоо танилцуулж байсан.

Өвөр монголчуудад манай СӨХ-ны Дээд зөвлөлийн үйл ажиллагаа нэлээд сонирхолтой санагдсан байх. Тэд энэ талаар цөөнгүй зүйлийг асууж байв. Зочдыг ахалсан Өвөр Монголын Аж ахуйг хамаарах нийгэмлэгийн дарга Чэнбаатарын ярьснаар тус улсад нийтийн орон сууцны засвар үйлчилгээ, тохижилт, харуул хамгаалалт, ариун цэврийг хариуцсан тусгай компанийг Аж ахуйг хамаарах нийгэмлэг шалгаруулж, ажиллах эрхийг нь олгодог гэнэ. Нэг хороонд дор хаяж 10 мянга орчим хүн амьдардаг учир ингэж зохион байгуулахаас ч аргагүй байдаг гэлээ. Эрх авсан компанид тухайн хорооллын ариун цэвэр, хог хаягдал, орчны тохижилт, талбайн зохион байгуулалт, харуул хамгаалалт, нийтийн эзэмшлийн өмч хөрөнгийн бүрэн бүтэн байдал бүгд хамаатай. Гэхдээ ус, цахилгааны газар доогуурх байгууламжийг тэд хариуцдаггүй. Түүнийг нь хамаарч ажилладаг тусгай байгууллага байдаг аж. Орон сууцны үйлчилгээний компани Аж ахуйг хамаарах нийгэмлэгтэй гэрээ байгуулан, ажиллах эрхээ авдаг тул ажлыг нь тогтмол дүгнэж цаашид ажиллуулах эсэх асуудал ч тус нийгэмлэгг хамаатай юм байна.

Өдөр тутмын жижиг сажиг засвар үйлчилгээний төлбөрийг суугчид тухай бүрт нь өөрсдөө хийх ёстой. Харин их засвар, томоохон бүтээн байгуулалтын ажилд зарцуулах хөрөнгийг тухайн орон сууцыг анх ашиглалтад хүлээлгэж өгөхдөө оршин суугчдаас авч сан байгуулдаг. уг сангийн хөрөнгийн зарцуулалтад Засгийн газраас нь хяналт тавьж ажилладаг гээд Чэнбаатар даргын ярьсан зүйлүүд манайханд ч тун сонирхолтой байсан. Өөрөөр хэлбэл, орон сууц, нийтийн аж ахуйн ашиглалт, хамгаалалтын тал дээр хөршийнхнөөс сурах зүйл манайханд чамгүй олон байдаг тухай энэ уулзалтын үеэр ярьцгаалаа.