Тоосгон ханыг манай оронд түгээмэл хэрэглэж байна. Тоосго  нь дулаан хадгалах чанартай бөгөөд эрүүл мэндэд элдэв сөрөг нөлөө үзүүлдэггүй. Тухайн газрын цаг агаар, халуун хүйтний хэмд тохируулан тоосгон ханын зузааныг тогтоодог. Гадаах хүйтэн -30 хэмээс дээш байдаг бол 64, 51, 38 см зузаантай байвал зохимжтой. Орчин үед 38, 51 см-ээр орон сууцны ханыг нэмэгдэл дулаалгын хамтаар хийх болсон байна. Энэ нь гадна ханын дулаан хадгалах нөхцлийг хангах боловч олон давхар барилгад даацын ачаалалд сөргөөр нөлөөлдөг. Харин сүүлийн үед төмөр бетон каркасаар барилгын гол босоо даацын хийцийг цутгаад гадна дотнох ханын хэсгийг тоосго өрж хийх болжээ. Ийм нөхцөлд ханын тоосгоны бат бэх чанар 75-аас дээш марк байвал зохино.

Харин нэг хоёр давхар бэсрэг сууцны ханыг 38, 51 см зузаантай дулаалгын материалаар нэмэгдүүлэн хийж бол-но. Үүнд, ханын тоосгоны өрлөгийг дунд нь хөндий зай гарган шлак буюу нүүрсний шатсан үнс, дулаалгын шилэн хөвөн мэтийн дулаан хадгалах материалыг ашиглах нь өртөг хямд, ашиглалтын нөхцөлд нийцэх болно.

Тоосгон ханыг өрөхдөө тоосгонуудын завсар хоорондын барьцалдуулах зуурмагийн зузаан нь 1 см-ээс илүүгүй байхаар өрнө. Өрж байгаа тоосгоныхоо амыг даруулж өрнө. 51, 38, 25 өрлөгийн булан, дотор ханын уулзваруудад 3-4 үе бүрийг төмөр тор, сараалжаар бэхлэж   хийвэл   бат бөх болно. Тоосгон өрлөгийн 1 күб.м-т орох материал нь тоосго 400 ш, зуурмаг 0,25 куб.м болно. Дотор гадна ханын уулзваруудын тоосгыг хооронд нь үелэн уулзуулж, углуургадан  бэхлэж хийнэ. Зарим тоосгыг жингий нь    хөнгөн болгож, дундаа нүхтэй үйлдвэрлэсэн байдаг. Ийм тоосгыг шавраар барьцалдуулан өрөхөд сайн, ажиллахад дөхөм байдаг.

Тоосгыг гадна талын өнгөлгөөнд хэрэглэхэд материал хэмнэхээс гадна өнгө үзэмж сайтай болдог. Өнгөлгөөний эориулалтын улаан, цагаан шаргал тоосгыг элбэг хэрэглэж байна. Сүүлийн үед дунд, модон ханын гадна өнгөлгөөг тоосгоор өнгөлж хийх болжээ. Энэ нь үзэмжтэйн дээр байгалийн үзэгдлээс хамгаалах нөхцлийг бүрдүүлдэг. Гадна тоосгон өнгөлгөөг 100 маркын нэг үе тоосгоор өрж  хийнэ.   Энэ  нь нурж болзошгүй тул модон ханатай холбох бэхлэгээг 250 мм-ийн бүдүүн темөр утсан тороор 2-3 үе тутамд бэхлэж өгвөл сайн өнгөлгөөний тоосгоны өрлөгийн зуурмагийг босоо хэсэгт 1 см, хэвтээ хэсэгт 1.2 см зузаан байхаар бодож тусгай ховил гарган, өрлөгийг багаар хийх нь үзэмжтэй болно. Харин энэ өрлөгийг нарийн мэргэжлийн өрлөгчнөөр хийлгэх нь зүйтэй. Тоосгон ханыг өрөх явцдаа төмөр бетоныг бүс бетон, ялуунд ашиглана. Бүс бетон нь эхний давхрын ханын доод хэсэг, давхар хоорондын ханын уулзвар хэсэгт хийгдэнэ. Бүс бетон нь 15-20 зузаантай, өргөн хэсгийг ханын зузаантай тохируулан арматур зангидан, модоор хэв хийж, бетон зуурмаг цутгаж хийнэ. Бүс бетон түвшингийн тэгш байдлыг хангаад зогсохгүй, ханын ачаалал даах хүчдэлийн уян байдлыг нэмэгдүүлж өгнө.

               Хана өрөх явцад хаалга, цонх гарах хэсгийн дээд хэсэгт хөндлөвч ялууг өрөх, цутгах байдлаар хийнэ. Ялуу нь төмөр арматур болон бетон тогтоцтой бөгөөд дээрээс дарах хүчийг хангалттай даах чанартай байхаар, янз бүрийн хэмжээ, марктайгаар бэлтгэн гаргадаг. Ялууг хананд 2.5 см-ээс доошгүй хэмжээгээр оруулж дамнуулаарай.