Барилгын бусад хийц хэсэгтэй харыдуулахад дээвэр нь нэг талаас гадна цаг агаарын, нөгөө талаас дотор агаарын чийг зэрэгт хамгийн их өртдөг бүтээц юм. Манайхан дээврийн дулаалгад төдийлөн анхаардаггүй. Гэтэл дулааны алдагдлын 22 хувь нь тааз, дээврээр алдагддаг. Дээврийг сайн дулаалснаар сууцанд өвөлдөө дулаан, зундаа сэрүүн байх нөхцөл бүрдэнэ. Тааз, дээврийн дулаан тусгаарлах үзүүлэлт нормын дагуу 5.2-6.2 м2оС/Вт байх ёстой.  Тэгвэл өнөөгийн нөхцөлд 0.85  м2оС/Вт байгаа нь судалгаагаар тогтоогдов.

Дээвэр таазыг дулаалах хоёр хувилбар бий. Хэрэв адрын орон зайг ашигладаггүй бол зөвхөн таазыг дулаална. Хэрэв адрын хөндийг сууцны зориулалтаар ашиглахаар төлөвлөж байгаа бол дулаалгыг дээврийн налуу хэсэгт хийнэ. Аль ч хэлбэрээр дулаалгыг хийсэн түүний дулаан тусгаарлалтын үзүүлэлт 5.2-6.2м2оС/Вт байх ёстой. Дулаалгад хөөсөнцөр хавтан, эрдэс хөвөн хэрэглэх тохиолдолд түүний зузааныг 20-25 см-аас багагүй байлгах шаардлагатай.
         Дулаалгын ажлаа эхлэхийн өмнө түүний битүүмжлэлийг шалгаж чигжиж өгнө. Дээврийн хийцэд гарах гэмтэл нь ихэнх тохиолдолд конденсац буюу хөлрөлтэй холбоотой байдаг. Конденсац үүсэх шалтгаан нь нэг талаас дотно ба гадна агаарын температурын зөрүү, нөгөө талаас агаарын чийгшил байдаг. Иймд дээврийн хийцэд уур тусгаарлагч хийх шаардлага гардаг.
Бид таазны дулаалгын хэд хэдэн хувилбарыг авч үзэж тооцоо хийв.
       Зураг1-д үнсэн дулаалгыг үзүүлэв. Ийм дулаалга хувийн орон сууцны барилгуудад хамгийн өргөн хэрэглэгддэг. Үнсэн дулаалгын 1м2-ын зардал нь 3250 төг бөгөөд дулаан дамжуулуултын эсэргүүцэл нь 1.3м2оС/Вт   байна.
       Зураг2-т эрдэс хөвөн (манайхны ярьдгаар шилэн хөвөн) дулаалгыг үзүүлэв. Ийм дулаалга хувийн орон сууцны барилгуудад өргөн хэрэглэгддэг. Дулаалгын 1м2-ын зардал нь 5450 төг бөгөөд дулаан дамжуулалтын эсэргүүцэл нь 4.29м2оС/Вт байна Дулаан тусгаарлалтын шаардлагын түвшинд дөхөж байна гэсэн үг.
       ЗурагЗ-д керамзит дулаалгыг харуулжээ. Керамзит дулаалгын 1м2-ын зардал нь 5650 төг бөгөөд дулаан дамжуулуултын эсэргүүцэл нь 1.25 м2 °С/Вт байгаа нь дулаан тусгаарлалтын хувьд ихээхэн. доогуур үзүүлэлт юм.
       Зураг4-д хөөсөнцөр болон үртсэн дулаалгыг хослон хийсэн байна. Ийм дулаалга хувийн орон сууцны барилгуудад хамгийн өргөн хэрэглэгддэг. Үнсэн дулаапгын 1м2-ын зардал нь 4850 төг бөгөөд дулаан дамжуулалтын эсэргүүцэл нь 5.18 м2оС/Вт байна. Үртэсний шатамхай чанарыг бууруулах зорилгоор борын уусмараар шүрших ба, шохойтой хольсноор түүнд, хорхой шавьж үржихээс хамгаалдаг.
       Зураг5-д сүрлэн дулаалгыг үзүүлэв. Ийм дулаалгын 1м2-ын зардал нь 3250 төг бөгөөд дулаан дамжуулалтын эсэргүүцэл нь 5.18 м2оС/Вт байгаа нь дулаалгын стандартын шаардлагыг хангаж байна. Харин сүрлийг боож нягтруулахгүйгээр дулаалгад хэрэглэх нь түүний шатамхай чанарыг нэмэгдүүлдэг болохыг анхаарах хэрэгтэй.
Таазны дулаалгад хар цаасан дэвсгэр, өнгөлгөөнд оргалит болон гипсэн хавтанг ашигладаг.