Монгол улсыг хөгжүүлэх сангийн хөрөнгөөр 48.4 тэрбум төгрөгийн ажил хийгдэх аж. Харин нийслэлийн төсвөөс 20.9 тэрбум төгрөгийг бүтээн байгуулалт болон бусад ажилд зарцуулахаар төлөвлөжээ. Ингэснээр нийт 116.7 тэрбум төгрөгийн хөрөнгө оруулалтын болон бүтээн байгуулалтын ажил хийгдэх юм байна. Энэ нь өнгөрсөн оны хөрөнгө оруулалттай харьцуулбал 9,5 хувиар өсчээ.

Нийслэлчүүдийн амин чухал хэрэгцээ болсон дулааны шугам сүлжээ, цахилгаан станцуудыг өргөтгөх шинэчлэхэд 38,0 тэрбум төгрөгийг зарцуулах аж. Уг хөрөнгөөр 1б, 5б, 6б,в, 7б, 7и, 12б зэрэг томоохон дулааны магистраль шугамыг өргөтгөн шинэчлэхээс гадна “Улаанбаатар” дэд станцыг өргөтгөж, “Хайлааст” дэд станцаас “Яргайт” дэд станц хүртэл 35квт-ын дэд станцыг шинээр барих юм. 

Мөн шинээр баригдаж буй 14 дүгээр хороолол, Баянголын амны орон сууцны хорооллуудын шугам сүлжээг тавих аж. Ингэж хөрөнгө оруулалтын ажил хийгдсэнээр нийслэлийн цахилгаан болон дулааны шугам сүлжээний найдвартай ажиллагаа дээшлэх юм. 

Нийслэлийн хүн амын эрүүл мэндийг сахин хамгаалах , тэдний эрүүл мэндийн боловсролыг дээшлүүлэх , эмнэлгийн байгууллагуудыг шаардлагатай тоног төхөөрөмжөөр хангах, орчин нөхцөлийг нь сайжруулах зэрэг нь эрүүл мэндийн салбарын тулгамдсан асуудал юм. Эдгээр асуудлыг шийдвэрлэх зорилгоор 3,9 тэрбум төгрөг төсөвлөсөн ба үүний 2,9 тэрбум төгрөгийг бүтээн байгуулалт, 1,0 тэрбум төгрөгийг нь их засварын ажилд зарцуулах юм байна.