УИХ-ын гишүүн Р.Гончигдорж эргэн төлөгдөх нөхцөлтэй зам барилгын ажлын явцын талаар Ерөнхий сайдад асуулга хүргүүлээд багагүй хугацаа өнгөрсөн юм. Хэд хэдэн удаагийн чуулганы нэгдсэн хуралдаанаас эрхэм гишүүний асуулгын хариултыг хойшлуулсан. Харин өнгөрсөн баасан гаригийн үдээс хойшхи хуралдаанаар Зам тээвэр, барилга хот байгуулалтын сайд Х.Баттулга 2008 оны төсөв болон зээл тусламжийн хөрөнгөөр гүйцэтгэсэн зам барилгын ажлын гүйцэтгэлийг гишүүдэд танилцуулж, сонирхсон асуултад нь хариуллаа. ЗТБХБ-ын сайдын мэдээллээс үзвэл өнгөрсөн оны улсын төсвөөс авто замын салбарт 21 тэрбум 611.1 сая, Монгол Улсыг хөгжүүлэх сангаас 33 тэрбум 464.5 сая буюу нийт 65 тэрбум 75.6 сая төгрөгийн хөрөнгө оруулалт хийхээр заасан байна. Үүнээс гадаадын зээл тусламжаар хэрэгжиж байгаа төслүүдийн дотоод эх үүсвэр  таван тэрбум 591.3 сая, авто замын сүлжээний завсар арчлалт, үйлдвэрлэлийн бааз, технологийн шинэчлэлт есөн тэрбум 14.5 сая, зураг төсөл, техник эдийн засгийн үндэслэл боловсруулах ажилд нэг тэрбум 300 сая төгрөг төсөвлөжээ. Мөн дотоодын санхүүжилтээр баригдаж байгаа авто зам, гүүрийн барилгын ажлыг санхүүжүүлэхэд 47 тэрбум 169.8 сая, эргэн төлөгдөх нөхцөлтэй баригдаж байгаа авто замын барилгын ажлыг санхүүжүүлэхэд хоёр тэрбум төгрөг тусгасан аж. Ингээд өнгөрсөн оны эцсийн байдлаар нийт хөрөнгө оруулалтын гүйцэтгэл нь 53 тэрбум 918 сая төгрөг буюу 82.9 хувьтай гарчээ. Түүнчлэн сайдын хийсэн танилцуулгад өнгөрсөн онд барилгын зарим бараа, материалын үнэ өссөн нь барилгын ажил гүйцэтгэгч компаниудад нэлээд хүнд цохилт болсон хэмээн тусгасан байв.

Гишүүдийн зүгээс уул уурхайн томоохон орд газруудыг ашиглалтад оруулахаар яригдаж байгаа энэ үед авто зам, төмөр замын асуудлыг яаралтай шийдэх хэрэгтэй гэдгийг онцолж байсан. УИХ-ын гишүүн Р.Амаржаргал “65 тэрбум төгрөгийн асуудал яригдаж байна. Үүнийг хуваарилж байгаа нь харьцангуй байх шиг харагдаж байгаа юм л даа. Яагаад техник, эдийн засгийн үндэслэлд нийт хөрөнгийн хоёр хүрэхгүй хувь зарцуулагдаж байна вэ. Цаашид энэ харьцааг өөрчлөх үү. Түүнээс гадна, Говь-Алтай хүртэлх хар зам хэзээ ашиглалтад орох вэ” хэмээн асуусан. Үүнд “Техник, эдийн засгийн үндэслэлд хоёр хувь гэдэг ер нь бол бага. Гэхдээ манай нөхцөлд боломжтой гэж үзэж байгаа. Харин Говь-Алтайн замын асуудал бий. Зөвхөн Говь-Алтайн зам ч биш аймгийн төвүүдийг хатуу хучилттай замаар холбоход 3500-4000 км зам хэрэгтэй. Энэ бүхэн нь санхүүжилттэй холбоотой юм. Тэгэхээр санхүүжилтийг шийдэхийн тулд холбогдох хуульд өөрчлөлт оруулах нь зүйтэй. Ингэхгүйгээр Говь-Алтайн зам битгий хэл бусад зам ч тавигдахгүй” гэсэн хариултыг салбарын сайд нь өглөө.

Х.Бадамсүрэн “Говийн бүсийн дэд бүтцийн асуудал үнэхээр тулгамдаж байна. Одоо бид Оюутолгой, Тавантолгойн гээд яриад байдаг. Гэтэл эцэстээ төслүүдийг хэрэгжүүлж, барилга байгууламж барих, бүтээгдэхүүнээ экспортлох асуудлыг чөдөрлөх зүйл нь авто, төмөр зам л болох гээд байна шүү дээ. Ялангуяа, Тавантолгой, Нарийн Сухайтаас энэ жилдээ тав таван сая тонн нүүрс олборлох боломжтой байдаг. Харамсалтай нь, замын асуудал хүнд. Тэгэхээр энэ асуудлыг яаравчлахгүй бол болохгүй нь ээ. Үүнд яамны зүгээс ямар бодлого барьж байна вэ. Шаардлагатай гэвэл танай яам Эрдэс баялаг, эрчим хүч болон Сангийн яам, Ерөнхий сайдтай хамтарч энэ асуудлыг хэлэлцээчээ гэж хүсмээр байна” гэсэн юм. Х.Баттулга сайд “Бид Тавантолгой, Оюутолгой гээд нэлээн удаан хугацаанд ярьж байна. Одоо хууль ч гараагүй байна. Тэгэхээр миний хувьд дэд бүтцийн асуудлыг зэрэг яримаар байгаа юм. Бодлогын хувьд дэд бүтцийн асуудлаа түрүүлж хэлэлцвэл зүйтэй гэсэн байр сууьтай байна. Эхлээд дэд бүтцээ шийдчихвэл гэрээ хэлэлцээ хийхэд ч хөрөнгө оруулалт нэмэгдэнэ шүү дээ. Тиймээс энэ асуудлыг Засгийн газрын хуралдаанаар яаралтай шийднэ” гэв. Нөгөөтэйгүүр хоёр хөрш орны бодлогыг төмөр замын салбарт уялдуулах талаар ярилцаж байгаа гэсэн тайлбарыг сайд өгсөн юм. Ийнхүү гишүүд дэд бүтэц, зам барилгын асуудал удаашралтай, биелэлт муу байгааг шүүмжилж байсан бол ЗТБХБ-ын сайд хууль, эрх зүйн орчныг нь бүрдүүлж өгөх асуудалд УИХ анхаарахыг хүсч байлаа.

Нийгмийн толь