Энэхүү төслийн олон улсын тендер шалгаруулалт болж БНСУ-ын “SKC энд C” компани шалгарсан билээ. Харин сүүлийн үед тус компанитай холбоотой сөрөг мэдээлэл цацагдах боллоо. Нийслэлийн Авто замын газар, Замын цагдаагийн газрын хамтарсан ажлын хэсэг гарч тус компанийн үйл ажиллагаатай танилцаад иржээ. Энэ талаар Авто замын газрын Замын ашиглалт, хөдөлгөөн зохион байгуулалтын хэлтсийн дарга Д.Одоос тодруулсан юм.

-Нийслэлд хэрэгжих төслийнхөө талаар эхлээд яриач?

-Улаанбаатар хотын нийт 45 уулзварт гэрлэн дохио шинээр суурилуулах юм. Мөн 24.00 цагаар бичлэг хийдэг 26 телекамерыг тавина. Замын уулзваруудыг хянаж байх нэгдсэн удирдлагын төвийг ч бас байгуулах юм. Энэхүү төвд 45 гэрлэн дохио холбогдоно. Түүнчлэн замын авто машины эгнээнд 22 мэдрэгчийг суурилуулах юм. Энэхүү мэдрэгч замын хөдөлгөөнийг зохицуулахад ихээхэн үүрэг гүйцэтгэнэ. Автомашины эгнээ тус бүрт байрлах мэдрэгч нь хэдэн машин байгаа талаарх мэдээллийг нэгдсэн төв рүүгээ дамжуулдаг. Мэдээлэл дамжуулсны дараа замын түгжрэлийг гэрлэн дохиогоор автоматаар зохицуулж өгнө гэсэн үг. Нэг ёсондоо машины тоог энэхүү мэдрэгч хянах юм. Гэрлэн дохио бүрийн дэргэд цаг тавина. Энэхүү цаг нь ногоон гэрлийн асах цагийг зааж өгнө. Манайхан ийм цаг байхгүйгээс болж ногоон гэрэл солигдох үед нь замын голд зогсчихдог шүү дээ. Мэдрэгчүүдийг хотын төвийн ачаалал ихтэй уулзваруудад тавина. Тухайлбал, эхний ээлжинд Энхтайваны өргөн чөлөө, Баруун, Зүүн дөрвөн замын уулзвар, Их, Бага тойруугийн замд тавина. Өөр хаа хаана байрлуулах судалгааг мэргэжлийн байгууллагуудтай хамтран судалгаа хийж байж суурилуулна.   

-Хэзээнээс төсөл хэрэгжиж эхлэх гэж байна вэ?

-Хотын төвийн хэсгийн гэрлэн дохиог шинэчлэх юм байна. Хуучин гэрлэн дохиог хэрхэх вэ?

-Өдгөө нийслэлийн хэмжээнд нийт 49 гэрлэн дохио ажиллаж байна. Ихэнх нь хойд хөршийн технологиор тавигдсан. Ашиглагдах боломжтой гэрлэн дохиог захын хэсгийн гэр хорооллын замд тавина.

-Олон улсын тендерт шалгарсан Солонгосын компанийн талаар таагүй мэдээлэл гарах боллоо. Өөрийнхөө улсыг хулхидсан гэх мэтээр бүтэлгүй нэр зүүж байна шүү дээ?

-Хоёр улсын Засгийн газар хоорондын гэрээний дагуу урт хугацааны хөнгөлөлттэй зээлээр энэхүү төслийг хэрэгжүүлэх юм. Нийт өртөг нь 12.8 сая доллар. Манай газар болон Замын цагдаагийн газрын хамтарсан арван хүний бүрэлдэхүүнтэй баг БНСУ-д ажиллаад ирлээ. Тус компанийн үйл ажиллагаатай танилцсан. Харилцаа холбооны салбартаа улсдаа гуравдугаар байрт ордог юм байна. Мөн нефьтын бизнес эрхэлдэг. Манай нийслэлд хэрэгжүүлэх гэж байгаа гэрлэн дохионы системийг улсынхаа гурван ч том хотод нэвтрүүлжээ. Анх удаа Чэжүд, хамгийн сүүлд Ансэн хотод суурилуулсан байна. Мөн энэ чиглэлээрээ Азарбажан улсад 70 сая долларын төсөл хэрэгжүүлэх гэж байгаа юм билээ. Улсдаа электроникын салбартаа тэргүүлдэг компанийг туслан гүйцэтгэгчээр авч ажиллуулна гэсэн. Тус компанийг юу ч хийх чадваргүй гэсэн мэдээлэл гарсан. Гэвч тус компани эдийн засгийн хувьд найдвартай, энэхүү салбартаа нэлээд туршлага хуримтлуулсан байна.

-Төсөл хэрэгжснээр нийслэлийн нийт замын хэдэн хувь нь шинээр байгуулагдсан нэгдсэн төвтэй холбогдох вэ?

-Улаанбаатар хотын нийт замын 70 хувь нь хамрагдана. Хуучин гэрлэн дохиог шилжүүлснээр Улаанбаатар хотын бүх зам гэрлэн дохиотой болох юм.

-Замын эгнээ бүрийг хянах мэдрэгчийн тоо замын түгжрэл ихтэй манай хотод дэндүү цөөхөн юм биш үү?

-Цөөхөн. Нэмэгдүүлэх саналыг тус компанид тавиад байгаа. Энэ саналыг нааштай хүлээн авна гэдэгт найдаж байгаа л даа.