Барилга МН

Зөвшөөрөлгүй газар барьсан байгууламжийг буулгасан зардлыг хууль зөрчсөн этгээдээр нь төлүүлэх гэнэ.

Орон сууцны нэгдүгээр дав­харт үйлдвэрлэл, үйлчил­гээ­ний зориулалтаар өргөтгөл хий­хийг, нийтийн эзэмш­­­лийн зам талбайд ба­рил­га барихыг хориглосон Улаанбаатар хотын ерөнхий менежер Ч.Батын 158 тоот ту­шаал өн­гөр­сөн наймдугаар са­рын 26-нд гар­сан. Үүнээс хойш зөв­шөө­рөгдөөгүй газар барь­сан барил­гуудыг нурааж байгаа. Саяхан Хан-Уул дүү­рэгт зөв­шөө­рөл­гүй барьсан дөрвөн гараа­шийг дүүргийн Газрын алба буул­гасныг мэ­дээл­сэн билээ. Тэгвэл энэ удаад Чингэлтэй дүүргийн Газрын албаныхан орон сууц­ны хоёр өргөтгөл, гараашийг буулгаж эхэллээ.

Тус дүүргийн VI хороо, буюу "ОКТА" төвийн ард та­лын 31, 62 дугаар байрны нэгдүгээр давхарт өргөтгөл барь­жээ. Мөн "Баянбүрд" цогцол­борын баруун талд автозамын хажууд  хоёр гарааш барьсан байж. Өчиг­дөр тийш очиж учир байдлыг сурвалжиллаа. Гараашуудыг нураагаад, тоос­гыг нь овоол­сон байв. Харин өргөтгөлүү­дийн талыг нь буулгаад орхи­жээ. Гэтэл эзэд нь барилгын ажил дуусч байхад газрын албаныхан тийнхүү арга хэм­жээ авсанд гомдолтой байв.

62 дугаар байрны I дав­харт үйл ажиллагаа явуулдаг "Чка" дэлгүүртэй залгаад 4х5 метрийн хэмжээтэй газарт хашаа татжээ. Ингэхдээ за­мын хажуугийн босоо хашла­гыг хэвтээ бол­гон засч, ха­шаа­гаа тулгаад барьсан байв. Уг өргөтгөлийг ямар зорил­гоор хэн гэдэг хүн бариулсныг тодруулахаар дэлгүүр рүү орлоо. Дэлгүүрт сууж байсан 50 эргэм насны А.Долгормаа гэгч эмэгтэйтэй уулзлаа. Тэрбээр тус дэл­гүүрийг ажил­луулдаг юм бай­на. Тиймээс дэлгүүрээ томсгох зорилгоор нэг сарын өмнөөс өргөтгөл барьж эхэлсэн гэнэ. Энэ хугацаанд газрын алба­наас арваад удаа ирж нураажээ. Үүнээс болж гур­ван сая гаруй төгрөгөөр хохи­роод байгаа тэр эмэгтэй ийн ярив. "Өргөт­гөл хийж байгаа талбайд энэ байрыг барьж байсан хята­дуудын бие засах газар нь байсан юм. Тэр хэсэг байр ашиг­лалтад орсны дараа сууж, доошлоод байсан. Ха­рин би хонхорхой хэсгийг нь хайр­гаар дүүргээд дэлгүүрээ сун­гахаар барилгын ажлыг эх­лүүлсэн. Бидэн шиг танил талгүй хүмүүст зөвшөөрөл нь олддог ч үгүй юм билээ. Барилгыг холбогдох хүмүүс ирээд нураахдаа хотын өнгө үзэмжид сөрөг нөлөө үзүүлж байна гэдэг. Хариуд нь би "Та нар тэр экологийн тэнцвэр алдагдуулаад байгаа Богд уулын ам, Туул голын унд­рага дээр барьсан томчуудын барилгыг нураа" гэхэд "Тэд чинь тусгай зөвшөөрөлтэй" гэх юм. Гэтэл тэдэнд арга хэм­жээ авч чадахгүй байж жи­рийн иргэд бидэн рүү яа­гаад халдаад байдаг юм бэ. Үнэ­хээр хотын өнгө үзэмжийг энэ өчүүхэн зай талбайд барь­­­сан өргөтгөл яавч гутаахгүй. Жижиг­хэн зайд шаваа­рал­дуулан барьсан барил­гуудаа зохицуулж чадахгүй байж өөрсдийнхөө булхайг нуухын тулд ядарсан ардын хөрөнгө зарсан зүйлийг уст­гаж байна. Үнэн чанартаа манай энэ 62 дугаар байр замын хөдөлгөө­ний аюулгүй байдлыг зөрчиж баригдсан. Энд байнга осол гарч, хүүх­дүүд машинд дай­руул­даг" гэлээ. Хэдийгээр зөвшөөрөл­гүй ч энэ эмэгтэй өргөтгөлөө барьж дуусгахаар шийджээ. Харин 31 дүгээр байр­ны ба­руун талд бариад дуусч бай­сан өргөтгөлийн эзэн болох Д.Цэцэгмаатай уулзахад "Ма­найх гурван жилийн өмнөөс хоёр удаа зөвшөөрөл авчи­хаад байхад барилгыг маань буулгачих­лаа" гэв. Тэднийх интернэт кафе ажиллуулдаг аж. Дан бүргэд хаалгатай болохоор хэд хэдэн удаа хулгайч халд­жээ. Тиймээс урт гартнаас сэрэмжилж байр­наасаа хоёр метрийн урттай өргөтгөл хий­хээр зорьж зөвшөөрлөө авсан байна. Гэвч хөрөнгө мөнгөний асуудлаас болж саяхнаас барилгын ажлаа эхлүүлжээ. Зээл авч босгоод байсан өргөтгөлийг нь газрын ал­баныхан ирээд трактороор дайрсан гэнэ.

Дүүргийн газрын албаны дарга Н.Болорчулуунтай уул­заж дараахь тодруулгыг авлаа.

-Ерөнхий менежерийн тушаал гарснаас хойш та­най дүүргийн хэмжээнд нийтдээ хичнээн байгуу­ламж барьсан бэ?

-Ердөө саяын нураасан тэдгээр өргөтгөл, гараашууд байна. Өргөтгөлийн хувьд нэг нь огт зөвшөөрөлгүй, нөгөө нь ерөнхий менежерийн тушаал гарахаас өмнө зөвшөөрлөө авчихсан байсан юм билээ.

-Тэрийг нь харгалзан үзэж өргөтгөлийг нь ба­риулах уу?

-Ёс журмынх нь дагуу л шийдвэрлэнэ дээ.

-Харин зөвшөөрөлгүй газар барьсныг нь яах вэ?

-62 дугаар байрны нэгдү­гээр давх­рын өргөтгөлийг ба­ривал хороол­лын дундах  гарц­ын харагдах орчин байх­гүй бол­чихож байгаа юм. Мөн тэд­­нийх замын хажуугийн хаш­лагыг дур мэдэн хэвтээ бол­­гочихсон байна лээ. Ма­най мэргэжилтнүүд анх ба­рил­­га барьж байхад нь зог­соо­хыг шаардаж хэд хэдэн удаа мэдэгд­сэн боловч ба­риад дуусгасан. Гурав хоно­гийн өмнө очоод хашааг нь буул­гатал дахиад барьчих­сан.

-Ер нь зөвшөөрөлгүй газар барьсан барилгыг нураавал хохирлыг нь хэн хариуцах вэ?

-Газрын тухай хуулинд зааснаар зөвшөөрөлгүй газар барьсан барилгыг нураахад хариуцлагыг нь буруутай этгээд өөрөө хүлээнэ. Тэр бай­тугай нураасан ажлын зардлыг нь ч бас төлүүлэх ёстой.

Өдрийн сонин