Засгийн газрын хуралдааны ээлжит мэдээллийг Гадаад харилцааны сайд С.Батболд, Батлан хамгаалахын сайд Л.Болд нар хийлээ. Гадаад харилцааны чиглэлээр таван асуудал хэлэлцжээ. НҮБ-ын Ерөнхий нарийн бичгийн дарга Бан Ги Муны Монгол Улсад хийсэн айлчлалын дүнгийн талаар хэлэлцжээ. Мөн Монгол, Чехийн Засгийн газар хоорондын комиссын ээлжит гуравдугаар хуралдааны талаар хэлэлцсэн байна.

 

Комиссын хурал ирэх есдүгээр сарын 2-4-ний өдрүүдэд Улаанбаатар хотноо болох бөгөөд энэ үеэр Чехийн Ерөнхий сайд айлчлах аж. Тайландын хааны гэр бүлийн төлөөлөгч гүнж энэ сарын 24-27-ны өдрүүдэд манай улсад айлчлахтай холбоотой асуудал ч мөн хуралдаанаар орсон байна. Батлан хамгаалахын сайд Л.Болд мэдээллийнхээ эхэнд Монгол Улсын Зэвсэгт хүчний цэргийн багийг 800 хүний бүрэлдэхүүнтэйгээр Чад Улс дахь НҮБ-ын энхийг сахиулах ажиллагаанд оролцуулахаар болсныг дуулгалаа. Засгийн газрын гурван ч хуралдааныг дамжиж байгаа Авто тээврийн тухай хуулийг хэрэгжүүлэхтэй холбоотой асуудлыг хуралдаанаар авч хэлэлцсэн байна. Хуулийг хэрэгжүүлэхтэй холбогдуулан Авто тээврийн газрыг байгуулсан бөгөөд энэ газрын үйл ажиллагааг зохицуулах гол шийдвэрүүдийг гаргасан талаар Л.Болд сайд ярилаа. Тодруулбал, тээврийн хэрэгсэл болон машин механизмын бүртгэл хөтлөх, улсын дугаар олгох, бүртгэлийн санг Замын цагдаагийн газраас Засгийн газрын хэрэгжүүлэгч агентлаг Авто тээврийн газарт 2009 оны 9 дүгээр сард багтаан шилжүүлэх шийдвэрийг хуралдаанаас гаргасан байна.

 

Мөн төрийн албан хаагчдыг орон сууцаар хангах асуудлыг Засгийн газрын хуралдаанд танилцуулжээ. Улаанбаатар хотод гэхэд л 4000 гаруй орон сууц барьсан байгаа ч борлуулалтын асуудал нь хүндхэн байгаа аж. Тиймээс нэг талаас барилгын салбараа дэмжих, нөгөө талаас төрийн албан хаагчдын нийгмийн асуудлыг шийдвэрлэх шаардлагатай байгааг хуралдаанаар хэлэлцжээ. Иймд Засгийн газраас бонд гаргах замаар асуудлыг шийдвэрлэх талаар нухацтай ярилцаж байгаа аж. Холбогдох байгууллагуудын эцсийн шийдвэрийг нэгтгэсний дүнд төрийн албан хаагчдыг орон сууцаар хангах асуудлыг дараагийн Засгийн газрын ээлжит хуралдаанаар хэлэлцэх болжээ. Орон сууц олгох төрийн албан хаагчдыг хуулийн дагуу, тодорхой шалгуурын дагуу сонгох ажээ.