Япон Улсын Засгийн газрын хөнгөлөлттэй зээлээр Төв аймгийн Сэргэлэн сумын нутаг, Хөшигийн хөндийд олон улсын нисэх онгоцны шинэ буудал байгуулах ажил үргэлжилсээр. Үүнтэй холбогдуулан Хөшигийн хөндий орчмын хот байгуулалтын ерөнхий төлөвлөгөө боловсруулах ажлын хэсэг одоогоор төмөр зам тавих, олон улсын ачаа тээврийн төв байгуулахаар ярьж байна. Цогцолборын бүтээн байгуулалтыг Монгол Улсын Засгийн газар хариуцан ажиллах юм.

 

Нисэх буудлын   төслийн анхан шатны техник, эдийн засгийн үндэс­лэлийг Иргэний нисэхийг хөгжүүлэх мастер төлөвлөгөөний хүрээнд боловсруулж, 2006 оноос Японы Олон улсын хамтын ажиллагааны банкаас төслийн техник, эдийн засгийн болон зээл олгох үндэслэл, хэмжээ тогтоож эцсийн тайлан гаргажээ. ЗТБХБЯ-наас зөвлөх үйлчилгээний компани сонгон шалгаруулах үнэлгээний хороо, төслийн захирал, төсөл хэрэгжүүлэх нэгжийн менежер томилж, холбогдох яам, газрын төлөөлөл, Улаанбаатар хотын ерөнхий менежер, Төв аймгийн Засаг дарга нараас бүрдсэн төслийн удирдах хороо байгуулсан. ЗТБХБЯ, Японы Олон улсын хамтын ажиллагааны байгууллагатай хийсэн хэлэлцээрийн дагуу нисэх онгоцны буудлыг 2015 оны есдүгээр сард барьж дуусгахаар тооцжээ. Энэ нь агаарын хөлгийн хоёр талын буулт хийх боломжтой, нислэгийн хөдөлгөөний удирдлагын шаардлагатай тоног төхөөрөмжөөр бүрэн тоноглосон, олон улсын стандарт, шаардлага хангасан байх аж.