Хэнтий аймгийн хилийн цэс болох Хэрлэн голын зүүн эргээс баруун эрэг хүртэл 268.8 метрийн урттай төмөр бетонон гүүрийг Япон улсын ард түмний буцалтгүй тусламжаар барьж ашиглалтад орууллаа.

 

Барилгын ажлыг Япон улсын “Коноике констракшин” компани гүйцэтгэж хяналтыг Япон улсын “Жапан Овераинз Консалтантс” компани, зөвлөхөөр “Жоси” компани тус тус ажилласан байна. “Зүүн чиглэлийн гол зам барих, холбогдох тоног төхөөрөмжийг шинэчлэх” төслийг, энэ оны наймдугаар сарын ханшаар 28.5 сая ам долларын өртөгтэйтэйгээр хэрэгжүүлж дуусч байгаа юм. Төслийн хугацаанд Багануураас Хэрлэнгийн гүүр хүртэл 30.6 км урттай хатуу хучилттай авто зам, Хуцаа Хужирт голд шинээр хоёр төмөр бетонон гүүр, Хэрлэнгийн голд японы хийц технологиор шинээр төмөр бетонон гүүрийг барьсан байна. Барьж байгуулсан замын өргөн нь 10 метр, хөвөө нь 1.5 метр бөгөөд зорчих хэсэг нь 7 метрийн өргөнтэй, зорчих автомашин дунджаар 80-100 км/цагийн хурдтайгаар явж байхаар төлөвлөжээ.

 

Хэрлэн голын шинэ гүүрийн нээлтэд Ерөнхий сайдын зөвлөх Б.Эрдэнэсүрэн, ЗТБХБЯ-ны дэд сайд Пүрэвдорж, Авто замын газрын дарга Б.Энхтөр, Багануур дүүргийн Засаг дарга Ц.Сандаг-Очир, Хэнтий аймгийн Засаг даргын орлогч Д.Намсрай, Япон улсаас Монгол улсад суугаа онц бөгөөд бүрэн эрхт элчин сайд ноёен Т.Кидокоро, Японы олон улсын хамтын ажиллагааны агентлаг “Жайка”-гийн суурин төлөөлөгч Ю.Ишида, “Жоси” компанийн Ерөнхийлөгч Х.Хори, гүйцэтгэгч “Конойке” компанийн төслийн удирдагч М.Кобояши нарын албаны хүмүүс оролцлоо.

 

Монгол Улсын Засгийн Га-зар, Япон Улсын Засгийн Газар хооронд 2005 оны гуравдугаар сард төслийг хэрэгжүүлэх ноот бичиг солилцсоноор төслийн ажил эхэлсэн юм. Төсөл нь, хоёр тэрбум 913 сая иений өртөгтэй, үүнээс нэг тэрбум 923 сая иен нь зам барилгын ажилд, 707.1 сая иен нь тоног төхөөрөмж нийлүүлэх, зөвлөх үйлчилгээнд 284 сая иен нь зориулагджээ. Монгол Улсын Засгийн Газраас 1.5 тэрбум төгрөгийн санхүүжилт хийсэн байна.

 

Төслийн нэгдүгээр үе шат нь 2006 онд эхэлж 5.2 км зам барьж, хоёр асфальт бетонон, хоёр бутлуурын үйлдвэр, лабораторийн болон зам засвар арчлалтын тоног төхөөрөмж, машин механизм нийлүүлэгдсэн байна.

Хоёрдугаар үе шат нь 2007-2009 онд үргэлжилж 37 км зам барьж 16 км замыг сэргээн засварлаж дөрвөн төмөр бетонон гүүрийг барьж байгуулж дуусаад байгаа юм байна.

 

ЗТБХБЯ-ны дэд сайд Пүрэвдоржийн онцолсноор, шинэ үеийн гүүрийг ашиглалтад хүлээн авч байгаа нээлтийн ажиллагаанд Монгол Улсын Ерөнхий Сайд, УИХ-ын гишүүд хүрэлцэн ирэх ёстой байсан боловч УИХ-ын чуулган эхэлсэнтэй холбогдуулан ирж амжаагүй байна.

 

Гүүрийн нээлтэд оролцсон Хэнтий аймгийн Засаг даргын орлогч Д.Намсрай, энэхүү зам гүүрийг Хэнтийчүүд нүдний цөцгий шигээ хайрлаж унадаг морь шигээ эдэлж явахаа илэрхийлээд дурсгалын зүйлс гардууллаа. ЗТБХБ-ын сайдын тушаалаар зөвлөх “Жоси” компанийн суурин инженер Курасака, гүйцэтгэгч “Конойке” компанийн төслийн удирдагч Кобояши нарыг “Монгол Улсын Тэргүүний замчин” цол тэмдгээр, орчуулагч болон гүйцэтгэгч компанийн ерөнхий инженер, инженер нарыг яамны “Хүндэт жуух”-аар шагналаа.

Ийнхүү Хэрлэнгийн шинэ гүүрээр автомашинууд чөлөөтэй зорчих боллоо. Харин зэргэлдээх хуучин төмөр бетонон гүүрээр одоогоор малчид малаа тууварлан гаргаж байлаа.

 

Монцамэ