Жижиг дунд үйлдвэрлэл эрхлэх хүсэлтэй хүмүүс даруйхан Үйлдвэр худалдааны яам болон аймаг орон нутагтаа хандаарай. Сарын 1 хувийн хүүтэй зээл таныг үйлдвэрлэлээ явуулахад тусална.
Жижиг дунд үйлдвэрлэлийг дэмжих үүднээс Үйлдвэр худалдааны яам арилжааны 3 банкаар дамжуулан 1 хувийн хүүтэй зээл олгож байгаа билээ. “Монгол шуудан”, “Зоос”, “Хас” банкаар дамждаг энэ зээлийг энэ жил үргэлжлүүлэн олгох гэрээнд өнөөдөр талууд гарын үсэг зурлаа.
Хэрвээ та жижиг дунд бизнес эрхлэх хүсэлтэй дээр нь хүү бага, хугацаа урт зээл хайж байгаа бол дээрхи 3 банкинд хандаж болно. Ийм зээл авахад танил тал, ар өврийн хаалга энэ тэр огт хэрэггүй гэнэ. Гагцхүү яам, орон нутгийн засаг захиргааны байгууллагын дэргэдэх комисс дээр байгаа журмын дагуу материалаа бүрдүүлэхэд зээл авч болох юм байна. Жижиг дунд үйлдвэрлэлийг дэмжих зээлийн хугацаа 2 жил юм байна. Өнгөрсөн жил арилжааны банкаар дамжуулан тэрбум төгрөгийн зээл олгогдсон гэж Үйлдвэр худалдааны яамныхан мэдээллээ.