ХБНГУ-ын Мюнхэн хотноо 2010 оны 4-р сарын 19-25-ны өдрүүдэд зохиогдох олон улсын барилга, уул уурхай, машин техник болон барилгын материалын үйлдвэрлэлийн салбарын хамгийн сүүлийн үеийн бүтээгдэхүүн үйлдвэрлэгчдийн "Баума-2010" үзэсгэлэн яармагт Монгол Улс оролцох боломжтой боллоо. Энэ удаагийн үзэсгэлэнг хамтран зохион байгуулах Санамж бичигт "Монголын үндэсний худалдаа аж үйлдвэрийн танхим" -ын дэд дарга Ц.Янсанжав, "Баума" үзэсгэлэнг зохион байгуулагч ММI-ийн төлөөлөн удирдах зөвлөлийн гишүүн Юген Эгетентайер нар өчигдөр гарын үсэг зурлаа.

 

 

 "Барилга уул уурхайн техник тоног төхөөрөмжийн хамгийн сүүлийн үеийн ололт амжилт шинэ нээлт дэвшлийг энэ үзэсгэлэнгээс харж болно" гэж зохион байгуулагч тал онцолж байна. Нийт 100 гаруй улсын 30 гаруй мянган оролцогч жил бүр энэхүү үзэсгэлэн худалдаанд оролцдог бөгөөд 200 гаруй улсаас 2 сая гаруй зочин гийчин үзэсгэлэнг сонирхдог байна. Үйлдвэрлэлийн бараа бүтээгдэхүүний хувьд барилга угсралтын салбар, инженер, байгаль орчинд хор нөлөөгүй техник , ачаа тээвэр болон тээвэрлэлт, керамикийн үйлдвэрлэл, автомажсан техник ачаа тээвэрлэлт зэрэг аж ахуй үл хөдлөх хөрөнгийн үзэсгэлэнг зохион байгуулдаг ММI нь дэлхийг хамарсан бизнесийн сүлжээ бий болгожээ. 555.000м2 талбайг эзэлдэг энэхүү үзэсгэлэн нь хамрах талбайгаараа, ач холбогдолоороо ч дэлхийн хамгийн том үзэсгэлэн гэнэ.

 

Монцамэ