Төрийн албан хаагчдад орон сууцны урт хугацааны зээл олгох, барилгын үнийг бууруулах талаар Монголын барилгын үндэсний ассоциацийн гүйцэтгэх захирал Я. Батцэцэг, “Өү энд Би Эн” ХХК-ийн захирал Батсуурь, “Бусана” ХХК-ийн захирал Б.Санчир, МБҮА-ын дэд захирал Ю.Цэвэгжав нарын төлөөлөгчид мэдээлэл хийжээ. Төрийн албан хаагчдад олгох орон сууцны үнийн саналыг Сангийн яам, ЗТБХБЯ-д хүргүүлсэн бөгөөд МБҮА энэ оны 08 дугаар сарын 15-19-ний өдрүүдэд ЗТБХБЯ-ны сургалт, судалгаа хөрөнгө оруулалт, барилга захиалагчдын албатай хамтран нийслэлийн зургаан дүүрэгт нийтдээ 77 барилгын компаниудыг хамруулсан баригдаж дууссан орон сууцны судалгаа хийсэн байна. Судалгааны дүнд орон сууцны борлуулалтын 1ам.метр талбайн үнэ байршил, материал, хийцээс хамааран доод хэмжээ нь 746000 төгрөг буюу 515 ам доллар, дээд хэмжээ нь 1540000 төгрөг буюу 1064 ам доллар байхаар барилгын компаниуд санал өгсөн ажээ.

 

Тус ассоциаци нь орон сууцны үнийг буулгах талаар судалгаанд оролцсон барилгын компаниудтай хоёр удаагийн уулзалт зохион байгуулж хэлэлцсэний үр дүнд 4000 айлын орон сууцны төрийн албан хаагчдад зориулсан үнийг тохиролцжээ. Ингэснээр ЗТБХБЯ, Сангийн яаманд 4000 айлын орон сууцны үнийг 10-40 хувиар бууруулж, нэг ам.метр талбайн үнийг 700000 төгрөг буюу 483 ам доллараас 1166000 төгрөг буюу 805 ам доллар байхаар дээд доод хязгаарыг албан ёсоор хүргүүлж байгаа гэнэ. Энэ үнэ нь зөвхөн төрийн албан хаагчдад зориулсан урт хугацааны зээлээр олгох үнэ бөгөөд бусад захиалагчдад хамаарахгүй гэлээ. Монголын барилгын үндэсний ассоциацийн гүйцэтгэх захирал Я. Батцэцэг хэлэхдээ: Судалгааны үр дүнд нийслэл хотын хэмжээнд 140 мянга гаруй төрийн албан хаагч байдаг гэдэг нь тогтоогдсон. Тэд төсвөөс цалинждаг учир үүний 4000-ыг орон сууцжуулах санаатай байгаа. Хотын хэмжээнд бэлэн болсон барилга 77 байгаа боловч 90-95 хувьтай арваад барилга байгаа хэмээв.

 

Монцамэ