"Барилгын чанар, стандартад онцгой анхаармаар байна. Олон барилга нурж, хүмүүсийн амь сүйдэх вий" гэсэн сэрэмжлүүлгийг Ерөнхийлөгч Ц.Элбэгдорж Нийслэлийн төр, захиргааны байгууллагуудын удирдлагуудтай уулзахдаа хэлсэн билээ. Өнгөрсөн долдугаар сард болсон үерийн гамшгаас сургамж авч, "Нурсан, эвдэрсэн хойно нь иргэд төрөөс биш гүйцэтгэгчээс юм уу, даатгалын компаниас хохирлоо нэхэмжилдэг байхын тулд даатгалын системийг энэ салбарт нэвтрүүлэх нь чухал" гэсэн санаачилгыг мөн гарган хэд хэдэн үүрэг өгсөн юм. Энэ даалгаврын дагуу хотын удирдлагууд тодорхой арга хэмжээ авч байна. Нийслэлийн Захирагчийн Ажлын албаны Инженерийн байгууламжийн хэлтэс, Барилга,   хот байгуулалт, төлөвлөлтийн газар, Мэргэжлийн хяналтын газар зэрэг мэргэжлийн байгууллагын удирдлагууд "Барилга байгууламж, зам гүүрийн аюулгүй байдлыг сайжруулах талаар авах зарим арга хэмжээний тухай" Засгийн газарт чиглэл өгөх Ерөнхийлөгчийн зарлигийн төсөлтэй танилцаж, саналаа тусган, Засгийн газрын Хэрэг эрхлэх газарт хүргүүлжээ. Барилга хот байгуулалтын газар нийслэлийн нутаг дэвсгэрт баригдаж байгаа барилгуудын чанар стандарт болон батлагдсан зураг төслийн дагуу баригдаж байгаа эсэх талаар мэргэжлийн болон хяналтын байгууллагуудтай хамтарсан үзлэг шалгалт хийжээ. Төвийн зургаан дүүргийн хэмжээнд шинээр баригдаж буй 214 барилга байгууламжууд байгаа юм. Эдгээрээс 73 нь барилгын норм дүрэм, зураг төсөл, эрх бүхий байгууллагын зөвшөөрөлгүй үйл ажиллагаа явуулж байгаа нь шалгалтын явцад илэрч, холбогдох иргэн, аж ахуйн нэгж, байгууллагад үйл ажиллагааг зогсоох тухай албан даалгавар өгсөн байна.

 

Тус газрынхан шинээр баригдаж байгаа орон сууцны барилга байгууламжууд 8-12 баллын газар хөдлөлтийн үед хэвийн байж чадах эсэхийг шалгах чичирхийллийн туршилт явуулсны дараа иргэдэд худалдах, банкны зээл олгож байх нь зүйтэй гэж үзэн энэ чиглэлийн ажлыг хэрэгжүүлэхээр ажиллаж эхлээд байгаа юм. Одон орон, геофизик судлалын төвтэй хамтран III хорооллын 12 давхар байруудад чичирхийлэл хүлээн авах багаж байрлуулан ажиглалт хийх ажлыг энэ сараас хийж эхэлжээ. Багаж тоног төхөөрөмжийн хувьд гадаадын төслийн багтай хамтран ажиллах, түрээслэх зэргээр үйл ажиллагаа явуулж байгаа юм. Улаанбаатар хотын хувьд газар хөдлөлт, чичир-хийллийн тэсвэрлэлтийг судлах туршилтын төв байгуулж, орчин үеийн тоног төхөөрөмжөөр хангах, чичирхийлэлийн туршилтын зардлыг барилга угсралтын хяналтын зардалд тусган, хэрэгжүүлэх шаардлагатай байгаа бөгөөд энэ талаар хамтран ажиллах саналаа "Зарубежстрой в Монголии" ХХК-ын удирдлагатай харилцан тохиролцоонд хүрээд байгаа ажээ. Барилга хот байгуулалтын газар шинээр баригдаж буй барилгад иргэний болон захиалагчийн хяналтыг сайжруулах, хөндлөнгийн хяналтыг мэргэжлийн эрх бүхий хувийн хэвшлийн байгууллагуудаар хийлгэж байх, энэ асуудлыг холбогдох хууль эрхзүйн актад тусгах саналтай байгаа юм.

 

Монцамэ