Үндэсний хөгжил, шинэтгэлийн хорооноос Монгол Улсын Сангийн яам, БНХАУ-ын Хөгжлийн банкны хооронд байгуулсан Ерөнхий хэлэлцээрийн шалгуур хангаж буй дэд бүтэц, уул уурхайн салбарын дөрвөн төсөл сонгон БНХАУ-ын Хөгжлийн банкны зээлд хамруулахаар санал болгоод байна. Энэ нь Шивээ-Овоогийн уурхайн хүчин чадлыг нэмэгдүүлэх, Алтанбулаг-Улаанбаатар-Замын-Үүд чиглэлийн хурдны замын төсөл, Нийслэлийн цахилгааны “Их тойруу сүлжээ”, мөн Улаанбаатар хот болон хот орчмын авто замын сүлжээг шинэчлэх төсөл юм. Эдгээр төслийн эдийн засаг, нийгмийн хөгжилд оруулах хувь нэмэр, урт, дунд хугацааны бодлого, тэргүүлэх чиглэлтэй уялдаж байгаа талаарх судалгаа, холбогдох танилцуулга боловсруулан Сангийн яаманд хүргүүлжээ.

 

Түүнчлэн, Үндэсний хөгжил, шинэтгэлийн хороо холбогдох яамнаас ирүүлсэн 15 төсөл сонгон авч, “Олон нийтэд зарлах бүтээн байгуулалтын томоохон төсөл”-ийн жагсаалт боловсруулан, Засгийн газрын хуралдаанаар хэлэлцүүлээд 10 төсөл сонгон авч, олонд зарлан сурталчлах, хэрэгжүүлэх арга хэмжээ авахыг санал болгоод байна. Төсөл сонгохдоо Монгол Улсын хөгжилд стратегийн ач холбогдолтой аж үйлдвэр, дэд бүцийг хөгжүүлэх хар болон өнгөт металлургийн үйлдвэрлэл шинээр бий болгох, говийн дэд бүтцийн авто болон төмөр зам, дулааны цахилгаан станц, нийслэлийн авто зам сайжруулах, Алтанбулаг-Улаанбаатар-Замын Үүд чиглэлийн хурдны зам барих, аялал, жуулчлал, өндөр технологийн үйлдвэрлэл хөгжүүлэх, мал аж ахуй, газар тариалангийн эрүүл ахуйн шаардлага хангасан бүтээгдэхүүнээр хүн амын хүнсний хэрэгцээг хангах шалгуурыг гол болгожээ. Дээрх төслийг Засгийн газрын үйл, ажиллагааны мөрийн хөтөлбөрийн зорилттой нийцсэн эсэх, улс орны хөгжилд оруулах ач холбогдол, хувийн хөрөнгө оруулалт татах боломж, төсөл хэрэгжүүлэх дэд бүтэц, урьдчилсан нөхцөл бүрдсэн эсэх, 200.0 сая. ам доллараас багагүй хөрөнгө оруулалт шаардах зэрэг үзүүлэлтээр хэлэлцэв.

 

Монгол Улсын Засгийн газрын 2008-2012 оны үйл ажиллагааны хөтөлбөрт гадаад орон болон үндэсний хөрөнгө оруулагчдыг татах зорилгоор бүтээн байгуулалтад чиглэсэн 200.0 сая ам доллараас багагүй хөрөнгө шаардах бүтээн байгуулалтын төслийг энэ онд багтаан олон нийтэд зарлахаар заасан. Эдгээр төсөл нь Монгол Улсын эдийн засаг, нийгмийн хөгжлийг эрчимжүүлэх, хөгжлийн шинэтгэлийн бодлогын хэрэгжилт, улсын эдийн засгийн аюулгүй байдал хангах, хүн амын амьжиргааны түвшинг тогтвортой дээшлүүлэх, бүс нутгийн дэд бүтцийн сүлжээг сайжруулан шинэчлэхэд чухал ач холбогдолтой, улс орны хөгжлийн тэргүүлэх чиглэлд нийцэж байх шаардлагатай аж.

 

Монцамэ