Харин энэ жилийн хувьд орон сууцны борлуулалт зогсч, барилгын компаниудад хөрөнгө оруулалт дутагдсанаас болж уг салбарын олон мянган хүн ажлын байргүй болжээ. Одоогийн байдлаар барилгын салбарт ажиллаж байсан 40 гаруй мянган хүн хийх ажилгүй сул зогсч байна. Энэ нь статистик дүн мэдээ боловч ажил алдаг оног хийж байгаа хүмүүсийг оруулж тооцвол дээрх тоо нь нэмэгдэх төлөвтэй байгаа аж. Иймд барилгын салбарын төрийн бус байгууллагууд уг салбарт ажлын байрыг нэмэгдүүлэх чиглэлээр төр тодорхой алхам хийхийг хүсч нийтийн жагсаал хийхээр төлөвлөж байна. Өөрөөр хэлбэл, барилгын салбар дахь хөрөнгө оруулалтыг нэмэгдүүлэх хэрэгтэй гэсэн үг юм.

 

Манай улсын эдийн засаг улирлын нөлөөгөөр идэвхждэг. Өөрөөр хэлбэл, дулааны улиралд барилга, үйлдвэрлэлийн салбар сэргэж, олон хүн ажилтай болдог. Ингээд зуны улиралд хөдөлмөрлөж мөнгөний тодорхой хуримтлалтай болсон хүмүүс өвөлд түүгээрээ амьдралаа залгуулдаг гэхэд болно. Харин энэ жил хамгийн олон хүнийг шингээдэг салбар зогсонги байдалд орсноос болж иргэд орлогогүй, хуримтлал үүсгэх боломжгүй болж байна. Одоогоор барилгын мэргэжилтэй иргэд алдаг оног ажиллаж, хоолоо залгуулж байгаа ч өвөл уг салбарын ажил бүрэн зогсоход тэдний амьдрал дагаад уруудна гэсэн үг.

 

Барилгын ажил багассантай холбогдуулж үнэлгээ буурч, хөдөлмөрийн аюулгүй байдал ч алдагдах болсон байна. Өмнө нь иргэд нэг метр квадрат талбайн обойг 2000 төгрөгөөр наах, замаскыг 2500 хүртэл төгрөгөөр хийдэг байсан бол уг үнэлгээ буурч 1000-1500 төгрөгт хүрсэн байна. Мөн барилгын компаниуд иргэдийг тогтмол ажлаар хангаж чадахгүй байгаа тул үндсэн ажилчин авахаас илүү бригадыг ажилд оруулах болжээ. Иймд ганц, хоёроороо ажил хайж буй иргэдэд ажил олох боломж хязгаарлагдмал байгаа аж. Нөгөөтэйгүүр, барилгын компаниуд ажилчидтай гэрээ байгуулах явдал үндсэндээ орхигдсон гэхэд болох аж. Энэ талаар Хөдөлмөрийн маргааныг шуурхай зохицуулах салбар хороодын мэргэжилтэн “Барилгын компаниудад гэрээ байгуулалгүй ажилд ороод эрх нь зөрчигдсөн тохиолдол цөөнгүй гардаг байсан. Энэ жилийн хувьд дээрх сөрөг үзэгдэл гарч байгаа. Ялангуяа, цалин хөлсөө хугацаанд нь авч чадахгүй байх. Мөн цалинг нь анх амаар тохирсон хөлснөөс буулган бодож байна” гэв.

Нийгмийн толь