Ус зайлуулах сувгийн хүрэлцээ муу, авто машины төлөвлөлтгүй замаас болж үер буулаа гэж нийслэлийн Онцгой байдлын газрын дарга С.Цогтбаатар үерийн дараах сэргээн босголтын талаар танилцуулахдаа дурдлаа. Тэрбээр үерийн үед нийслэлийн Онцгой комисс таван удаа хуралдаж, шуурхай ажилласны хүчинд үерийн аюул болон үерийн дараах гамшгаас урьдчилан сэргийлж чадлаа. Манай онцгой байдлын бие бүрэлдхүүн ч сайн ажиллаж, 335 хүнийг үерийн уснаас аварсан. Давхардсан тоогоор 12770 хүн, 300 техник хэрэгсэл, 2750 эмч сувилагч ажилласан. Хөрсний бохирдолтоос үүдэн 58 өндөр настан болон хөгжлийн бэрхшээлтэй иргэдийг Сонгины амралтад амрааж, 174 хүүхдийг зусланд хамруулсан. Одоогийн байдлаар 300 гаруй хүн, 50 техник хэрэгсэл үерийн дараах сэргээн босголтыг хийж байна. Нийслэлийн хэмжээнд 72 километр далан суваг, 12 километр гадаргийн ус зайлуулах шугам, 23.3 километр хөрсний ус зайлуулах шугам шинээр барьчихвал Улаанбаатар үерийн аюул нүүрлэхгүй байх боломжтой гэлээ. Үүний дараа нийслэлийн Эрүүл мэндийн газраас мэдээлэл хийлээ. Эднийх нийт 13800 гаруй хүнийг эрүүл мэндийн үзлэгт хамруулснаас 23 хувь ямар нэгэн өвчтэй буюу 15 хувь суулгац, таван хувь нь арьс өнгө, дөрөв орчим хувь нь мэдрэлийн өвчтэй гэсэн судалгаа гарсан байна. Хандгайтын зусланд амарч байсан хүүхдүүд халдварт өвчнөөр өвдлөө гэсэн дуудлагын дагуу очиж 21 хүүхдийг тусгаарласан. Үүнээс зургаан хүүхэд нь хүндэвтэр байсан тул ХӨСҮТ-д хэвтүүлсэн. Үлдсэн 15 хүүхдэд цусан суулгын шинжилгээ хийхэд гурваас нь илэрсэн. Иймд эдгээр хүүхдүүд ХӨСҮТ-д хэвтэж эмчлүүлж байна. Биеийн байдал нь сайн байгаа. Одоогоор халдварт өвчний талаар нэмж мэдээлэл ирээгүй гэлээ.

 

 

Үерийн аман дээр буусан, нэн даруй нүүлгэх шаардлагатай 432 айлыг Хан-Уул дүүргийн 12 дугаар хороо, Сонгинохайрхан дүүргийн Нарангийн голд шинэ суурьшлын бүс гарган нүүлгэн шилжүүлж байгаа билээ. Нийслэлийн Газрын албаныхны тогтоосноор бол тэнд нийт 2240 айл суурьших боломжтой. Гэвч дүүргээс нийт 130 гаруй айлыг нүүлгэн шилжүүлсэн гэх боловч шинэ суурьшлын бүсэд 13 айл буусан байна. Эдгээр айлуудын гэрэл цахилгаан болон худаг усны асуудлыг удахгүй шийдвэрлэнэ. Мөн шинэ суурьшлын бүсэд гэр хорооллын суурьшлыг зохион байгуулах штаб ажиллаж байгаа. Энэ штабт өдөрт нэг хүн ажиллаж, тэнд гарсан асуудлыг шийдвэрлэж байгаа хэмээн нийслэлийн Барилга хот байгуулалт, төлөвлөлтийн газрын орлогч М.Цэрэндорж тайлбарласан юм. Түүнээс зарим зүйлийг тодрууллаа.

 

 

-Бэлтгэл ажил үндсэндээ дууссан. Хамгийн хүндрэлтэй асуудал гэвэл сургуулийн асуудал байна. Газар зохион байгуулалтын дагуу 2240 гаруй айл суурьших боломжтой. Тэгвэл дундажаар 600 гаруй хүүхдийн багтаамжтай сургуулийн хэрэгцээ гарч байна. Энэ жил тэнд байгаа хүүхдүүдийг Биокомбинатын сургууль юм уу Шувуун фабрикын сургуульд явуулахаар болж, дээрх сургуулийн захиргаанд санал тавиад байна. Гэхдээ эдгээр хүүхдүүд сургуульд явахдаа наад зах нь 6-7 км явж байж очих учраас унааны асуудлыг нь шийдвэрлэх хэрэгтэй байгаа.

 

 

-Тэнд айл өрхүүдийг суурьшлуулахын тулд хамгийн түрүүнд усны асуудлыг нь шийдвэрлэх ёстой. Маргааш гэхэд шинээр барьж байгаа усан сан ашиглалтад орчихно. Цаашид айл өрх нэмэгдээд ирвэл гүний худаг гаргах төлөвлөгөөтэй байна. Ер нь долоо хоногийн дараа гэхэд дэд бүтцийн асуудал нь шийдэгдчихнэ гэлээ. Үүний дараа Нийтийн тээврийн газрын дарга П.Наранцэцэгээс шинэ суурьшлын бүсэд нийтийн тээвэр явж байгаа талаар лавлахад “Тодорхой чиглэл гаргаад нийтийн тээврийн үйлчилгээг явуулж байгаа. Зургаан эргэлттэй явж байгаа бөгөөд өдөрт 15 мянган төгрөгийн орлоготой, 180 мянган төгрөгийн алдагдалтайгаар иргэдэд үйлчилж байна” гэв.

 

 

Үерийн улмаас хотын хэмжээнд 14 зам, дөрвөн гүүр эвдэрч гэмтсэн. Эдгээр зам гүүрүүдийг ихэнхийг нь засварлаж хэвийн ажиллагаанд оруулсан боловч дөрвөн цэг дээр хөрөнгө мөнгөний хүндрэлээс болж одоог хүртэл засвар хийгдээгүй байна. Уг нь эвдэрсэн зам гүүрийг засварлахад нэг тэрбум нэг зуун сая төгрөг шаардлагатай. Гэвч Засгийн газар зам гүүрийн засварын ажилд 800 сая төгрөг хуваарилсан нь ийнхүү дөрвөн цэгт засвар хийхэд мөнгө дутжээ. Хотын төв замуудад зам засварын ажил энэ сарын нэгнээс эхэлсэн. Зүүн дөрвөн замаас Баруун дөрвөн зам хүртэлх 3.48 километр замыг шинээр хучих ажил эхэлсэн бөгөөд ирэх 10 дугаар сарын 10 гэхэд дуусгана. Замын ажлаа хийхийн тулд эхний ээлжинд нэгдүгээр эгнээний хөдөлгөөнийг хаасан байгаа. Цаашид хэсэгчлэн хаана. Мөн Баянбүрдийн тойргийг засварлахаар тендер зарлажээ. Энэ тойргийг 10 дугаар сарын дундуур хүлээлгэн өгнө. Йонсей эмнэлгийн нүхэн гарцын бэлтгэл ажил 80 гаруй хувьтай байна. Газар шорооны ажил эхлэхээр тэр орчмын замыг 20-30 хоногоор хаахаар ярилцаж байгаа гэж Авто замын газрын дарга Д.Од танилцууллаа. Гэхдээ энэ ажлыг эхлэхээс өмнө Дамдинсүрэнгийн гудамжны замыг ашиглалтад оруулахгүй бол зам засварын ажил оройтохыг хотын дарга анхааруулсан юм.

 

 

Өнгөрсөн үерээр хэдхэн дүүргийг эс тооцвол хотын үерийн байгууламж сайн ажилласан. Энэ нь өнгөрсөн хавар 152 сая төгрөгөөр цэвэрлэгээ хийсний ач тус юм. Харин одоо эдгээр байгууламжуудын тал хувь нь лаг шавраар хучигджээ. Иймд засварлах, шинэчлэх, өргөтгөх төслийг НИТХ-д өргөн барьж, тогтоол гаргуулахаар ажиллаж байгаа гэнэ. УИХ-аас найман тэрбум төгрөгийг гэр хорооллын цахилгаан хангамжийг нэмэгдүүлэхэд төсөвлөсөн. Гэвч үерийн аман дээрээс нүүсэн айлууд цахилгаангүй өрхийн тоог нэмэгдүүлж байна. Сургууль, цэцэрлэгийн өвөлжилтийн ажил муу байна. Тендер нь зарлагдсан боловч хийж байгаа ажил гэж бараг байхгүй. Зарим нэг нь засвар хийж байгаа ч ажил нь удаашралтай байна гэж Улаанбаатар хотын Инженерийн байгууламжийн хэлтсийн дарга Ц.Ганхүү ярилаа. Мөн халаалттай холбоотой нэлээн их асуудал байна гэж Улаанбаатар хотын Ерөнхий менежер Ч.Бат хэллээ. Налайх, Багануур дүүргийн халаалтын зуухны засварын ажил төлөвлөгөөнөөс хоцорч явааг энэ үеэр хэлсэн юм. Тэрбээр цааш нь хот зэрлэг ургамлаар дүүрчээ. Баянзүрх дүүрэг санаачилга гарган өөрийнхөө нутаг дээрх зэрлэг ургамалаа түүсэн байна. Харин бусад дүүргүүд ард иргэдээ бодоод энэ ажлыг хурдан эхлүүлэхийг хүслээ. Иймд дүүргүүд 14 хоногийн хугацаанд зэрлэг ургамалаа түүх хэрэгтэй. Мөн зам засвар хийгдэж байгаатай холбогдуулан замын хөдөлгөөнийг сайтар зохицуулж олон нийтэд мэдээлэх хэрэгтэй гэж сануулсан Ерөнхий менежер хэлсэн юм.

 

 

Нийслэлийн Засаг дарга бөгөөд Улаанбаатар хотын захирагч Г.Мөнхбаяр ирэх долоо хоногуудад дараах асуудлыг онцгой анхаарч ажиллахыг хүслээ.

Дүүргийн Засаг дарга нарт өвөлжилтийн бэлтгэл ажлыг энэ сарын 20 гэхэд дуусгахыг даалгалаа. Цахилгаан, дулаан, усны салбарын төрийн өмчийн байгууллагын дарга нар ээлжийн амралтаа авсан бол ажилд нь оруулж хичээлийн шинэ жил эхлэхээс өмнө энэ асуудлыг шийдвэрлэхийг санууллаа.

Тендерийн үйл ажиллагааг олон нийтэд ил тод болгож, ямар байгууллага, хэдийн хугацааны дотор, ямар ажил гүйцэтгэх естой зэрэг мэдээллийг олон нийтэд ил тод байх хэрэгтэйг холбогдох байгууллагад нь үүрэг өглөө.

Дүүргүүдийн Онцгой комисс хийсэн ажлаа дүгнэж, зэрэглэлээ бууруулах юм уу цаашид хэдий хугацаанд өндөржүүлсэн бэлэн байдалтай ажиллах талаар хуралдахыг дүүргийн Засаг дарга нарт сануулсан. Мөн үерийн аман дээр буусан айлуудын толгойг дахин илэхгүй байх. Хэрвээ аюултай бүсэд буусан тохиолдолд төрийн үйлчилгээ үзүүлэхгүй гэдгийг хатуухан анхааруулсан юм.

Байгалийн голомтод халдварт өвчнөөс урьдчилан сэргийлэхийн тулд хяналт шалгалтаа чангатгахыг хүслээ. Төрийн өмнөөс ажил хийж байгаа болохоор хэн нэгэн даргын нэрийг барьсан ч хамаагүй авах арга хэмжээгээ авах хэрэгтэйг дурдлаа. Хэрэв шаардлагатай бол нэмэлт хүч дуудаж, захиргааны хариуцлаг хүлээлгэсэн шиг хүлээлгэхийг хяналтын газрынханд даалгалаа.   

Улаанбаатар Таймс