Автобусны 31 чиглэлийг өөрчилж, троллейбусыг зогсоолоо
Barilga
2019-11-05
Энхтайваны өргөн чөлөөнд баруун 4 замаас зүүн 4 замын хооронд автозамын өргөтгөл шинэчлэл хийх, Ионсей эмнэлгийн ард явган зорчигч гарах нүхэн гарц хийх барилга угсралтын ажил өнөөдрөөс эхлэн нэг сар гаруй хугацаанд хийгдэнэ. Үүнтэй холбогдуулан Энхтайваны өргөн чөлөөгөөр дайран өнгөрдөг их багтаамжийн автобусны 31 чиглэлд өөрчлөлт орууллаа.
Өнөөдрөөс ирэх сарын 5-ныг хүртэлх хугацаанд баруун 4 замын зүүн талаас "Цэцэг" төвийн уулзварын баруун талын хэсэг хүртэлх зам хаагдана. Ингэхээр хотын баруун захаас буюу Толгойт, Зүүн салаа, Баянхошуу, ОУЭЗБДС чиглэлээс зүүн чиглэлд зорчих автобус "ТБД Андууд"-ын өмнүүр "Хүүхдийн 100" дэлгүүрийн арын зам буюу Сөүлийн гудамжаар Чингисийн өргөн чөлөөгөөр явж Нарны замд хүрч үндсэн замдаа орно.
Дарь-Эхийн чиглэлийн автобус Сансарын туннелээр Бага тойруу гудамж хүрч Төв шуудангийн уулзвараар Сөүлийн гудамжинд хүрч үндсэн чиглэлдээ орно. 3,4 хороолол-БММЗ чиглэлийн автобус баруун 4 замаар Сөүлийн гудамжинд хүрч Чингисийн өргөн чөлөөгөөр Энхтайваны гүүр хүрч үндсэн чиглэлдээ орох юм. Шархад, Зурагт, III,IV хороолол, Улаанхуарангийн чиглэлийн тээврийн хэрэгслүүд 2 чиглэлдээ Гэсэрийн уулзвараас "Хүнсний-1" дэлгүүрийн уулзвараар Бага тойруугийн гудамжинд хүрч "Цэцэг" төвийн уулзвараар зүүн эргэж МУБИС-ийн уулзвараар хойш эргэн Залуучуудын өргөн чөлөө хүрч Сансарын туннелээр зүүн 4 зам хүрч үндсэн чиглэлдээ орж явна.
Улиастайгаас хотын төв руу хүрэхдээ зүүн 4 замаас хойш Сансарын аюулгүй тойргоор эргэн туннеллээр Залуучуудын өргөн чөлөөнд нийлж "Хүнсний-1" дэлгүүрийн уулзвараар хойш эргэнэ.
Мөн 2009.09.06-наас 2009.09. 18-ны хооронд Төв шуудангийн өмнөх уулзварын хаагдах учир Хайлааст, Чингэлтэй чиглэлийн автобусууд "Хүнсний-1", МУИС-ын уулваруудаар буцаж явна.
Яармаг Нисэх чиглэлээс хотын төвруу ороход Төв шуудангийн уулзвараар /хаалтаар/ буцаж эргэх, Дарь-Эхийн чиглэлээс Сансарын туннелээр баруун тийш чигээр явж Гэсэрийн уулвараар Баруун 4 зам хүрч үндсэн чиглэлдээ орохоор зохицууллаа. Шархад, Зурагт, III,IV хороолол, Улаанхуарангийн чиглэлийн тээврийн хэрэгслүүд 2 чиглэлдээ Гэсэрийн уулзвараас Самбуугийн гудамжаар Залуучуудын өргөн чөлөө, Сансарын туннелээр зүүн 4 зам хүрч үндсэн чиглэлдээ орно.
Ээрмэл, Зайсангийн чиглэлийн автобусууд баруун 4 замаар Сөүлийн гудамж, Чингисийн өргөн чөлөөгөөр Энхтайваны гүүр хүрч үндсэн чиглэлдээ орно.
7 буудал, Дэнжийн 1000-ын чиглэлийн автобус "Хүнсний-1" дэлгүүрийн өмнөх уулзвараас Самбуугийн гудамжаар Сөүлийн гудамжинд хүрч Энхтайваны гүүр хүрч үндсэн чиглэлдээ тус тус орно.
Мөн өнөөдрөөс ирэх сарын 16-ны хоорондох хугацаанд Орбит , Сонсголон, 5 шарын чиглэлээс хотын төв руу орох автобус баруун 4 замын уулзвараар Самбуугийн гудамжинд нийлж "Хүнсний-1" дэлгүүрийн уулзвараар хойш эргэн Бага тойруугаар Сүхбаатарын гудамж хүрч буцаж эргэн үндсэн чиглэлдээ орно.
Харин троллейбусны 2 дугаар маршрут буюу " ХМК-Офицеруудын ордон", 4 дүгээр маршрут буюу "Вокзал-Ботаникийн цэцэрлэг" чиглэл бүрэн зогсож, 5 буюу "3,4 хороолол-Офицеруудын ордон ", 6 буюу "БММЗ-Офицеруудын ордон " чиглэлд троллейбусны оронд автобус үйлчилнэ.
Монцамэ