7-р сар, өдрөөр бол зуны “жин үд” болсон сар билээ. Үргэлжилсэн бороо орж, бас аагим халууны улмаас нозоорон сайхан амрахаар санагдах нь энэ үед тохиолдддог. Харин хүн төрөлхтөн эрт цагаас байгалийн элдэв “ааш”-ийг зөөлрүүлэх янз бүрийн арга, шийдэл бодож олсны нэг нь агааржуулагч /кондиционер/ ажээ. Сүүлийн үед агааржуулагчийн хуваарилах систем төдийлөн хэрэглэгдэхээ больж байгаа гэнэ. Орчин үеийн агааржуулах системийг нилээд олон янзаар хийж байгаа юм байна. Гэхдээ ахуйн цахилгаан монтажаас авахуулаад энэ бүх системүүд урьдын аргаараа ажилласаар буй бөгөөд цахилгаан ч багагүй зарцуулж байгаа юм.

Америкийн SolCool хэмээх компанийн жирийн айл хэрэглэж болохуйцаар нийтийн хэрэгцээнд зориулан гаргаж нарны эрчим хүчийг ашиглахаар хийгдсэн SolCool Millennia 4.0 агааржуулагч нь эрчим хүчинд хэмнэлттэй шинэ дэвшилтэт технологи болж чадсан ажээ. Ийм агааржуулагчийг айл өрх бүр суурилуулж болох бөгөөд нарны эрчим хүчний их нөөцтэй газар /Оросын Краснодарийн хязгаарт/ үр дүнтэй хэрэглэж байгаа гэнэ.

Тус агааржуулагч нь нарны эрчим хүчээр ажиллаад зогсохгүй цахилгаан гүйдэлд холбогдсон тэжээлийн нөөц систем, аккумулятор бүхий нарны зайгаар тэжээгддэг, айл гэрийг бүхэлд нь агааржуулах систем гэж ойлгож болох юм байна. Зохион бүтээгчдийнх нь ярьснаар, уг агааржуулах систем нь цахилгаан эрчим хүчийг 85% хэмнэхээс гадна тогтмол гүйдлийн тэжээлд нь сэнс, гэрэлтүүлэх төхөөрөмж, бүр халаагуур залгаж болдог гэнэ.