1939,1945 оны Халх голын дайнд баатарлагаар тэмцэсний гавъяа шагнал гэж төрөөс Ахмад дайчдад амьдрах орон сууц олгохоор болсон. Ахмадын чөлөөт холбооны дарга Г.Баасан ахмад дайчдын орон сууцны асуудлаар хэвлэлийн бага хурал өнгөрсөн мягмар гарагт хийхдээ дайнд оролцсон ахмадуудын тоо нэмэгдсэн талаар дурдсан. 

 

Яагаад энэ тоо нэмэгдсэн талаар Батлан хамгаалах яамны Төрийн захиргаа, удирдлагын газрын дарга хурандаа Г.Сайханбаяраас тодрууллаа. Дайнд оролцсон ахмадуудын тоо нэмэгдлээ гээд эмзэглэх асуудал биш юм. Жил жилд тодорхой тооны ахмадууд дайнд оролцсоноо нотлох баримт, архивын лавлагаагаа гаргуулдаг. Өмнө нь хот суурингаас алс амьдардаг, эсвэл үр хүүхэд, хамаатан садан байдаггүйгээс дайнд оролцсон бичиг баримтаа, үнэмлэхээ аваагүй ахмадууд байдаг. Энэ жил Халх голын ялалтын ой болох гэж байгаатай холбогдуулан орон нутгийн удирдлагууд ахмадуудын үнэмлэх, нотлох баримтыг архиваас шүүлгэж дайнд оролцсон нь үнэн болохыг нотлохоор ажиллаж байгаа юм. Дайнд оролцсон ахмад дайчид маань өөрийнхөө хувийн асуудлыг уламжлан тавьж тагнуулын архив, улсын төв архиваас шүүлгэж үнэхээр 1939, 1945 оны дайнд оролцсон нь нотлогдвол төрөөс олгох орон сууцны асуудлыг шийдэж өгнө. Өнгөрсөн 2008 оны зургадугаар сарын 6-наас хойш нас барсан ахмадуудын үр хүүхдэд нь орон сууцыг нөхөн олгоно. Тушаалд хамрагдсан 1816 ахмад дайчин байна. Өөрийн дайнд оролцсон гэсэн баталгаагаа архивын материалаас шүүлгээд нэмэгдэж ирсэн 36 ахмад дайчин байгаа энэ ахмадуудад ч мөн байр олгоно. Байр олголтын асуудал өнөөдрөөр ингээд зогсохгүй болохоор бичиг баримт, үнэмлэхээ аваад ирвэл холбогдох хуулийн дагуу шийдвэрлэнэ.

 

1939, 1945 оны хоёр дайнд оролцсон ахмад дайчдын байрыг энэ сарын 26-ны дотор олгоно. Одоогоор 97 ахмад дайчинд орон сууцыг мөнгөн хэлбэрээр болон орон сууцаар олгосон. Үлдсэн орон сууцыг мөнгөөр олгохгүй гэсэн Засгийн газрын тогтоол гарсан байгаа. Энэ ондоо 600 гаруй ахмадын асуудлыг шийдэхээр төсөв мөнгө нь батлагдсан. Энэ жил орон сууцаа аваагүй 1000 гаруй ахмадын асуудлыг ирэх оны төсөвт тусгана.

Монцамэ