Өнөөгийн байдлаар даатгалын нийт 21 байгууллага Монголын зах зээлд үйл ажиллагаагаа явуулж байгаа ажээ.

Зах зээлийн тогтолцоотой улс оронд даатгалын үүрэг нэн өндөр байдаг аж. Төр иргэнийхээ аюулгүй байдлыг хангаж, нийгмийн халамж үзүүлдэг ч тэр нь учирсан хохирлыг бүрэн нөхөх нь үгүй. Тэгвэл хөгжингүй орнуудын хувьд энэ зардлыг даатгалын санд буюу арилжааны даатгалын компаниудад шилжүүлэн даалгадаг байна.
Манай улсын хувьд даатгалын зах зээл дөнгөж хөгжиж эхлэж байгаа учир хөгжлийн эхэн шатанд төрийн зүгээс ч бага зэрэг дэмжиж өгөх нь зүгээр мэт. Учир нь аж ахуйн нэгж байгууллагууд даатгуулах сонирхол ихтэй байдаг ч даатгалын хураамжийн зардал нь татвараас хасагдах зардалд ордоггүй байна. Мөн иргэдийн идэвхи чармайлт ч сул байгаа. Иймээс энэ тал дээр татварын хуулинд өөрчлөлт оруулбал даатгалын зах зээл бодитоор хөгжих боломжтой байгаа бөгөөд энэ нь бусад санхүүгийн салбар болох банк, хөрөнгийн зах зээлийн хөгжилд асар их түлхэц болдог байна. Энэ нь санхүүгийн зах зээлийг орчин үеийн шинэ түвшинд гаргаж, иргэдийн өрх гэр, амьдрал ахуйг баталгаатай болгоход ихээхэн хувь нэмэр болох юм.
Гэхдээ даатгалын үйл ажиллагаа эрхэлдэг компаниудын өөрсдийнх нь үйл ажиллагаа үүнд асар их үүрэгтэй байна. Зөвхөн компанийхаа эрх ашгийн төлөө бус санхүүгийн энэхүү чухал салбарыг эх орондоо зөвөөр хөгжүүлэх, бас даатгалын хохирлын нөхөн төлбөрөө өгч чаддаг, ард иргэдээ эдийн засгийн болзошгүй хүндрэлээс хамгаалах мэргэшсэн компаниуд л цаашдаа зах зээлд “амьд үлдэх” бизээ.
Харин Монголд барилга сүүлийн хэдэн жилээс маш эрчимтэй баригдах болсон билээ. Түүнийг дагаад барилгын чанарын тухай асуудал маш ихээр яригдах болсон. Асар богино хугацаанд олон давхар байшинг барьж байгаа нь цаанаа чанар муутай барилга барьж байгааг илтгэх мэт. Монгол улсын газар нутаг газар хөдлөлийн 8-11 баллын идэвхитэй бүсэд оршдог юм байна. Иймээс нэг л өдөр хүчтэйхэн газар хөдлөхөд юу болж үлдэх бол. Байгалын гамшиг хэлж ирэхгүй. Улаанбаатарт сүүлийн жилүүдэд баригдсан барилгын хэдэн хувь нь тэсч үлдэх бол. Бас зураг төслийн хувьд ч ярих зүйл нилээд бий. Сүүлд баригдсан барилгуудын заримынх нь хананд ан цав гараад “но” нь харагдах болсон. Энэ бүхнээс байранд амьдарч байгаа хүмүүсээс өөр хэн амь нас, эрүүл мэнд, эд хөрөнгөөрөө хохирч хоцрох вэ. Барилгын чанараа бодоогүй хүмүүс л лав биш байх. Хадгаламж зээлийн хоршооны хохирогчдод тохиолдсон шиг зүйл тохиолдож магад. Барилга нь эмчтэй нэгэн адил ардаа асар их хариуцлагыг дагуулдаг. Түүний хийц бүрийг нарийн тооцоолол, стандартын дагуу хийж байх учиртай. Тиймээс эд бүгдээс сэргийлэхийн тулд барилга орон сууцны даатгалын талаар нэг зүйл хийх цаг нь болжээ.