Барилгачдын Үйлдвэрчний Эвлэлийн болон Барилгын Материал Үйлдвэрлэгчдийн холбоо, Барилгын Үндэсний Ассоциаци хамтран өнгөрсөн баасан гарагт өөрсдийн нэрээр нэрлэгдсэн барилгачдын талбайд тайван жагсаал зохион байгууллаа. Барилгачид салбарынхаа өмнө тулгамдаад буй асуудлуудаар журам боловсруулж "Дуусаагүй барилгуудын зээл, хүүгийн эргэн төлөлтийг түр хугацаагаар хойшлуулах, тэдгээрийг эдийн засгийн эргэлтэнд оруулах, шаардагдах хөрөнгийн эх үүсвэр бий болгох " гэх мэт хэд хэдэн заалт мэдэгдлийг Засгийн газарт хүргүүлсэн байна.

 

ЗТБХБЯ-ны дэд сайд А.Гансүх цуглаан зохион байгуулагчидтай уулзахдаа "Барилгын салбар өнөөдөр ямар түвшинд байгааг бид сайн мэдэж байгаа. Яамнаас Зам тээвэр, барилгын салбарыг дэмжих зорилготой 6-10 тэрбум орчим долларын төсөл санаачилж, Засгийн газрын хуралдаанаар оруулсан. Энэ асуудал шийдвэрлэх түвшинд хараахан хүрээгүй байна. Цаашид нэгдсэн арга хэмжээ авахын төлөө ажиллана" гэлээ.

Барилгын салбарт үйл ажиллагаа явуулж байгаа улсын болон хувийн хэвшлийн компани, ТББ, холбоод хувь хүмүүсийн төлөөлөл болсон 2000 гаруй хүмүүс "Барилга ба ажилгүйдэл" сэдэвт цуглааныг барилгачдын талбайд зохион байгуулна гэж мэдэгдэж байсан билээ. Гэвч тийм ч олон хүн цугларсангүй. Барилгын салбарынхан эргэлтийн хөрөнгөгүй болж зогсонги байдалд орсон учраас ийнхүү төр засгаас тусламж гуйхаас аргагүй болсон гэнэ. Одоогийн байдлаар улсын хэмжээнд 440 гаруй барилгын ажил зогсжээ. Эдгээр барилгад захиалга өгч, урьдчилгаа төлбөрөө хийсэн 7800 гаруй өрх айл байгаа аж. Гэвч барилгын суурийг ухан карказыг цутгаад өрлөг хийж эхлээд зогссон орон сууцны барилга олон байна. Хэзээ ашиглалтад орж, орон сууцтай болох нь тодорхойгүй болсонд урьдчилгаа мөнгөө өгсөн иргэд ихэд бухимдаж байна. Монголд нийтдээ хоёр триллион 400 тэрбум төгрөг эргэлдэж байгаагаас зөвхөн дуусаагүй барилгад 998 тэрбум төгрөг түгжигджээ. Өөрөөр хэлбэл, манай улсын нийт мөнгөний гуравны нэг нь наашаа ч, үгүй цаашаа ч үгүй байдалд орсон байна. Өнгөцхөн харахад барилгын салбарынхан л зовлонд унаад байгаа юм шиг боловч банк, санхүү гээд олон салбарыг хүнд байдалд оруулж байна. Барилгаа барьж дуусаад эзэлсэн мөнгөө төлнө гээд арилжааны банкуудаас их хэмжээний зээл авсан ч хямралаас үүдээд барилгын компаниуд зогсонги байдалд орж эргүүлэн төлөх чадваргүй болжээ. Нийт барилгын салбарын 78000 ажилчдын 70-80 хувь нь ажилгүй болжээ. Энэ хямралт байдлаас гарахад Засгийн газар, Монголбанк шийдэмгий, үр дүнтэй, зоримог арга хэмжээ авахгүй өдийг хүрсэнд барилгын салбарынхан шүүмжлэлтэй хандаж, асуудлаа шийдвэрлүүлэхээр төр засагт шаардлага хүргүүллээ.

 

Монголын барилгачдын үйлдвэрчний эвлэлийн Холбооны дарга Д.Гомбо "Бага хүүтэй урт хугацааны зээлийг барилгын салбарынханд олгох хэрэгтэй байна. Барилгын салбарын хямрал нь барилгын материал үйлдвэрлэгчид, угсралтын компаниуд болон эдгээр аж ахуйн нэгжид ажиллаж буй олон мянган ажиллагсад, барилгын материалын худалдаачид, цаашлаад банкны хадгаламж эзэмшигч нийт иргэдийн эрх ашгийг хөндөж байгааг анхаарч үзэх шаардлагатай байна" гэж Зам, тээвэр, барилга, хот байгуулалтын яамныханд өргөх бичгээ гардуулах үеэр тайлбарлаж байлаа. Тэдний өргөн барьсан бичгийг тус яамны газрын дарга Б.Нямбажав хүлээн авч, асуудлыг судалж үзээд хариу өгөхөөр болсон юм. Ингээд барилгын салбарынхны жагсаал өндөрлөлөө. Харин барилгачид ажилдаа хурдан орохыг хүсч байгаагаа энд дурдсан.

 

Монцамэ