Хан-Уул дүүргийн 11 дүгээр хороонд оршиж сууж буй 16 айлын газар дээр барилга барих гэж буй тухай мэдээллийг «Эко- Зайсан» ТББ-аас хийлээ.

 

«Монос» групп нь тэдгээр айлын газар дээр барилга барихын тулд оршин суугчдыг нүүхийг шаардах болсон төдийгүй дарамт шахалт үзүүлдэг болжээ. Хан- Уул дүүргийн 11 дүгээр хорооны нутаг дэвсгэр нь Богд хан уулын Дархан цаазтай газарт харьяалагддаг бөгөөд энэхүү 16 айл амьдарч байгаа газарт «Монос» групп зөвшөөрөлтэй хэмээн барилга барихаар иргэдийг тайван суулгахаа больсон байна. Гэвч тэнд хамгийн олон жил амьдарсан айл нь эдүгээ 40 жил оршин сууж байгаа аж. Гэтэл «Монос» группын хамгаалалтын албаны ажилтнууд яамны зөвшөөрлөөр далайлган үүр цүүрээр иргэдийн хашааг нураан гадуур нь хашаа хаалт барьж, оршин суугчдыг хөөж туун шүүхэд өгнө, шүүхийн шийдвэрээр нүүлгэнэ гэж сүрдүүлдэг болжээ. Энэ тухай оршин суугчид болон «Эко-Зайсан» ТББ-ынхан 2008 оны наймдугаар сараас эхлэн холбогдох албаны хүмүүст удаа дараа мэдэгдэж, тусгай хамгаалалтын газрын хилийн цэсийг шинэчлэн тогтоож, асуудлыг шийдвэрлэж өгөхийг хүссэн боловч ямар ч хариу аваагүй тухай тус ТББ-ын байгууллагын тэргүүн Ц.Өнөржаргал болон оршин суугчдын төлөөлөл сэтгүүлчдэд мэдээллээ.

Монцамэ