Бетон найрлагад технологийн уламжлалт үндсэн түүхий эдийн орц, жороос гадна тусгай зориулалтын нэмэлт материал хийх замаар бетоны чанарын олон үзүүлэлтүүдийг эрс дээшлүүлдэг арга орчин цагийн барилгын ажил, үйлдвэрлэлд өргөн нэвтрэх боллоо. Энэхүү нэмэлт материалыг барилга байгууламжийн угсралтын ажил, бетон цутгалт болон бетон үйлдвэрлэлийн технологид нэвтрүүлж хэрэглэснээр зуурмагийн хөдөлгөөнт чанарыг дээшлүүлэн усны орцыг багасгаж, улмаар бетон эдлэхүүний бэхжих хугацааг богиносгож, бэхжихдээ суулт бага үүсгэдэг, өндөр бат бэх чанартай, хүйтэн тэсвэрлэлт сайтай, урт удаан хугацааны ачаалал сорилтыг найдвартай даах боломжийг тухайн бетон эдлэхүүнд бүрдүүлж өгдөг.
ОХУ-ын Новомосковск хотын шинжлэх ухаан, техникийн төв, “Полипласт” компанитай хамтран гарган авсан “Суперпластикатор полипласт СП-1” хэмээх нэмэлт нь бетон болон барилгын зуурмагт хэрэглэгддэг бөгөөд нефтийн гаралтай сульфо хүчлийн найрлагатай синтетик материал юм. Уг нэмэлтийг хуурай болон шингэн байдлаар үйлдвэрлэж байгаа ба дотроо агаарын ердийн агуулгатай, багасгасан агуулгатай байна.
ТИП-1 нь бетоны бэхжих үе шатанд жигд бэхжүүлэхийн зэрэгцээ хугацааг түргэтгэдэг. ТИП-2 нь бетоны бат бэхийг төслийн үзүүлэлтээс дээшлүүлнэ. Мөн чийг нэвтрэлтийг багасгаж, бетонд гүний болон өнгөний ан цав гаргахгүй байх, хүйтэн тэсвэрлэлтийг өндөр болгох зориулалтаар тусгайлан бэлтгэсэн “ПФМ-НАК” гэсэн нэмэлтийг угсармал болон цутгамал төмөр бетон хийц, эдлэхүүн бүхий барилга байгууламжид өргөнөөр хэрэглэдэг болжээ.
Барилга байгууламжийн ажил үйлчилгээг улирлын эрхшээлээс аль болохоор гаргахын тулд хүйтэнд тэсвэртэй нэмэлт болох “Криопласт СП15-1”, “Криопласт СП15-2” гэсэн нэмэлт материал практикт хэрэглэгдэх болсон нь бетон бэлтгэх, цутгах ажлыг Цельсийн -15 хэм хүртэлх температур бүхий хүйтэн орчинд гүйцэтгэх боломж олгож байна. Манай оронд 2007 оноос эх орны органик гаралтай түүхий эд болох исэлдсэн хүрэн нүүрснээс бетонд хэрэглэх нэмэлт материалыг анх удаа гарган авах, улмаар түүнийг өөр бодисуудтай холин, шинэ нэрийн композит химийн нэмэлт материалыг гарган авч, улмаар үйлдвэрлэлд нийлүүлэх зорилтыг хангахаар МУИС-ын шинэ материалын хими технологийн төв, ШУТИС-ын Барилга инженерийн сургуулийн судалгааны төв, Барилга хот байгуулалтын яам болон шинжлэх ухаан технологийн сантай гурвалсан гэрээ байгуулан хамтран ажиллаж байнаа ажээ.