Японы Барилгын Инженерүүдийн холбоотой хамтран энэ уулзалтыг санаачлан зохион байгуулж байгаа юм.  Хоёр жил тутам хурлаа хийдэг МБИХ  салбарын өнөөгийн байдал, хойшид ямар бодлого баримталж ажиллах талаар санал бодлоо энэ өдрүүдэд мөн солилцож байна.  Тус уулзалтын хувьд холбоонд гишүүнчлэлтэй бүх байгууллага оролцож санал хүсэлтээ илэрхийлж байгаа юм. Уулзалтын зорилгыг тодорхойлж МБИХ-ны Гүйцэтгэх Захирал Б.Гантөмөр: “Япон талаас энэ удаагийн уулзалтанд оролцож байгаа нь тохиолдлын зүйл биш. Азийн Барилгын Инженерүүдийн Холбооны Зохицуулах Зөвлөлд гишүүнчлэлтэй олон орон байдаг. Тэдгээр гишүүнчлэлтэй орнуудаас норм нормативаа шинэчлэх шаардлагатай байгаа нь манай улс. Үүнийг шинэчлэж засварлах гэхээр манай ихэнх норм дүрэм Орос улсаас хуулбарласан шинжтэй байдаг учраас шинэчлэхтэй холбоотойгоор олон асуудлууд урган гарч ирдэг. Даяарчлагдаж байгаа дэлхийд хөл нийлүүлэн алхахын тулд  бид энэ асуудлыг яаравчлан шийдэх, хэрэгжүүлэх боломжийг эрж хайсан.  Япон улсын хувьд энэ тал дээр 2000 оноос хойш долоон жилийн турш тасралтгүй ажиллаж, хэрэгжүүлсээр ирсэн туршлагатай. Тиймээс ч бид Азийн Барилгын Инженерүүдийн Холбооны Зохицуулах Зөвлөлийн гишүүн байгууллагын хувьд Японы талд харилцан хамтран ажиллах, туршлага солилцох санаачлагыг анхлан тавьснаар өнөөдрийн уулзалт зохион байгуулагдаж байна” гэсэн юм.  

Монгол-Японы хамтарсан семинарын үеэр “Японы барилгын хяналтын тогтолцоо сэдвээр Японы Дэд бүтэц, газар, тээвэр, аялал жуулчлалын яамны ажилтан Мегуми Хата, “Япон дах барилгын бүтээцийн аюулгүй байдал” сэдэвт семинарыг доктор Тошио Окоши, “Ажиллагаанд үндслэсэн бүтээцийн төсөллөлт” сэдвээр доктор Кенчи Хорикоши нар сонирхолтой семинарыг хүргэсэн юм.  

Япон улс нь газар хөдлөл, далайн хар салхи, галт уулын гамшиг ихээр тохиодог орон. Түүхэндээ ч 1891 оны Ноубигийн газар хөдлөл, 1923 оны Кантогийн газар хөдлөлт, 1968 оны Токачи-Окигийн  газар хөдлөлт гээд олон олон сүйрлүүд тохиож, харин энэ бүхнээс барилгын бүтэцийн үе үеийн шинэчлэлийг хийсээр ирсэн байна. Японоос судлах туршлага их байгааг энэ үеэр оролцогчид ч хэлж байсан. Гэнэтийн гамшиг боллоо гэхэд, энэ эрсдлээс хэрхэн сэргийлэх үү, эрсдэл тохиолоо гэхэд барилгаа хэрхэн зөв төсөллөж барих уу гэдэг нь  бүтээцийн инженерүүдийн хувьд зааварчилгаа болж байгаа юм.  

Харин манай улсын хувьд одоогийн байдлаар барилгын салбарт зохион байгуулалт удирдлага аргазүйн-46, барилгын зураг төсөл боловсруулах болон инженер хайгуул, угсралтын ажлын-144, барилгын материал үйлдвэрлэлийн-78, барилгын эдийн засаг, төсөв, үнэ бүрдлийн -180, нийт 402 норм норматив, техникийн баримт бичиг мөрдөгдөж байдаг юм байна. Энэ норм нормативын цаана  үнэхээр учирч болзошгүй гэнэтийн эрсдлийг даван гарах чадвар шинэээр баригдаж байгаа орон сууцнуудад байгаа юу гэдэг асуултанд МБИХ-ны Гүйцэтгэх Захирал Б.Гантөмөр: “Газар хөдлөлийн эрчим гэж байдаг. Энэ эрчим дэвтамжийг манай барилгынхан сайн мэддэг байх ёстой. Манай улсын хувьд 50 жилийн давтамжтай газар хөдлөлт явагддаг гэж ерөнхийдөө үздэг. Гэхдээ энэ бол тогтчихсон тоо биш гэдгийг хэлэх хэрэгтэй. Аюул гэдэг гэнэт ямар ч хүчээр тулгарч болзошгүйн жишээ өнгөрсөн жил Хятадад болсон газар хөдлөлт харуулсан. Тэгэхээр манай барилгынхан ялангуяа шинээр баригдаж байгаа барилгууддаа норм дүрэм гэдэг зүйлээ маш сайн анхаарах хэрэгтэй. Цаг хугацааны шалгуураар харагдах ч, гэнэтийн болзошгүй аюулд бэлэн байх үүрэгтэй шүү дээ” гэсэн хариултыг өгч байна.   

Манай улсын хувьд барилгын норм нормативын тогтоцоог  өнгөрөгч 4 дүгээр сард засгийн газар батлаад байгаа. Баталсан учраас энэ салбарынхан хэрэгжүүлж эхлэх шаардлагатай. Харин хэрэгжүүлэхэд юуг, аль тал дээр хэрхэн анхаарах вэ гэдгээ энэ чиглэлийнхэн гурван өдрийн уулзалт семинараас мэдэж, судлаж байгаа юм байна. Ийнхүү хоёр улсын  барилгын норм, дүрмийн тогтолцоо, барилгын бүтээцийн аюулгүй байдлыг хэрхэн хангадаг талаар туршлага солилцон, ажиллагаанд үндэслэсэн төсөллөлт, газар хөдлөлийн тооцоо хийж эхлэсэн , хөгжүүлсэн түүх, тооцоо хийх эрхзүйн орчин зэргийн талаар  туршлага солицож байгаа уулзалт үргэлжилж байна. Хамгийн гол нь Монголд “Ажиллагаанд үндэслэсэн төсөллөлт”-ийн нормыг хэрхэн боловсруулах цаашлаад мөрдөх тал дээр  эндээс гаргалгаанд хүрэх юм.