Өнгөрсөн бямба гаригт Хан-Уул дүүргийн дөрөвдүгээр хороонд байрлах оюутны байранд гал гарсан байна. Галын улмаас 14х43 метр хэмжээтэй оюутны байрны тэн хагас нь шатжээ. Галд өртсөн барилга Бизнесийн дээд сургуулийн оюутны хоёрдугаар байр байж. Хүйтний эрч чангарч, цаг агаарын байдал хүндхэн байгаа энэ өдрүүдэд байранд байсан оюутнууд бүгдээрээ орох оронгүй болсон байна.

Тус байрны ажилтан Б нь хөлдсөн паарыг ил задгай галаар буюу паяльникаар гэсгээх гэж оролдсны улмаас гал гарсан аж. Он гарсаар томоохон барилга байгууламжид хэд хэдэн удаа гал гарсан. Галын шалтгаан нь бүгд л хэн нэгний санамсар болгоомжгүй үйлдлээс гарсан байжээ. Иргэд барилга байгууламжийн хөлдсөн паарыг гэсгээхдээ цахилгааны гагнуураар бамбардах буюу цогтой үнс тавьдагбайна. Хөлдсөн паарыг халаасан элс, эсвэл уураар гэсгээх нь аюулгүй ажиллагаанд нийцдэг байна.

Жич: Та бүхэн өөрсдийн байгууллага, орчин тойрондоо өрнөж буй сонирхолтой, анхаарал татам үйл явдлын талаархи мэдээллийг бидэнд info@barilga.mn хаягаар илгээнэ үү