Иргэдээ хямд өртөгтэй орон сууцаар хангах асуудал Улаанбаатар хотын маань өмнө тулгамдаад байгаа нэг чухал асуудлын нэг. Тэгвэл хойд хөршийнхөн маань орчин үеийн технологи ашиглан энэ талын асуудлаа төвөггүй шийдэж байна.

Залуу гэр бүл болон өндөр настнууддаа зориулсан орон сууцны хорооллыг хэрхэн байгуулж байгаатай Москва хотноо албан ёсны айлчлал хийж байгаа Улаанбаатар хотын төлөөлөгчид танилцсан юм. Москва хотод байшин үйлдвэрлэх гурван комбинат бий. Үүний хоёр нь барилгын төрөл бүрийн хийцийг хэсэгчилсэн байдлаар үйлдвэрлэдэг бол гуравдугаар комбинат нь түүхий эдээс эцсийн бүтээгдэхүүн болгон гаргадаг, бүрэн автоматжсан, бүхий л үйл ажиллагаа нь нэг дор төвлөрсөн үйлдвэр технологийн цогцолбор юм. Улаанбаатар хотын төлөөлөгчдийн танилцсан энэхүү гуравдугаар комбинат нь барилгад шаардлагатай бүхий л хийцийг үйлдвэрлэдэг бөгөөд гадна талын ханыг гэхэд л хөөсөнцрийг бетон арматурын дунд шахан хөнгөн чанартайгаар үйлдвэрлэхийн зэрэгцээ гадна талын хавтангийн өнгөлгөө болон цонхыг угсарсан байдлаар нийлүүлдэг аж. Энэхүү хийцээр байшин барихад цаг хугацаа, хөрөнгө мөнгө хэмнэхийн зэрэгцээ зардал хөрөнгө нь ч хямд төсөр тусдаг байна. Москва хот одоо таван давхар хуучин байрнуудаа буулгаж 20 болон түүнээс дээш давхар орон сууц барьж байна. Гэхдээ тухайн айлын одоогийн оршин сууж байгаа орон сууцных нь метр квадратын хэмжээг шинээр олгох сууцандаа 1,8 хувиар өсгөн тооцдог байна. Ингэхлээр хүмүүс ч хуучин байраа чөлөөлж өгөхдөө хойрго ханддаггүй бөгөөд газрын маргаан ч гардаггүй ажээ.

Мөн өдөр Улаанбаатар хотын төлөөлөгчид Москва хотын түлш эрчим хүчний чиглэлээр үйл ажиллагаа явуулдаг байгууллагуудын удирдлагатай уулзсан. Улаанбаатар хотод тулгамдаад байгаа дулаан хангамж, нийтийн зам талбайн гэрэлтүүлэг зэрэг чиглэлээр хамтран ажиллах боломжтойгоо талууд уулзалтын үеэр илэрхийлээд ажлын хэсэг байгуулж төлөвлөгөө гарган хамтарч ажиллахаар болсон юм.