тулгамдаж байгаа асуудлыг шийдвэрлэх арга замын талаар санал солилцлоо.

Хотын агаарын бохирдлыг багасгахад “40000 айлын орон сууц” хөтөлбөр ихээхэн ач холбогдолтой бөгөөд төлөөлөгчид ч нийслэлийн холбогдох албаны дарга нар ирсэн байлаа.  Тус корпораци 2006 онд Засгийн газрын 200 дугаар тогтоол, Сангийн сайд, Барилга хот байгуулалтын сайд, нийслэлийн Засаг дарга бөгөөд Улаанбаатар хотын захирагчийн хамтарсан 196/372/567 тушаал, захирамжаар үүсгэн байгуулагджээ.  Байгуулагдснаас хойш гурван жилийн хугацаанд нийт 2076 айлын орон сууцыг барьж 576 айлын орон сууц ашиглалтад оруулаад байгаа юм. Одоогоор 1499 айлын орон сууцыг барьж байгаа боловч оны өмнө ашиглалтад өгөхөөр төлөвлөөд байсан Баян-Өлгий, Сэлэнгэ, Баянхонгор, Говьсүмбэр зэрэг дөрвөн аймгийн 180 айлын орон сууцыг орон нутгийн зүгээс шугам сүлжээ, инженерийн хангамжийн эх үүсвэрээр хангахгүй байгаагаас болж одоо болтол ашиглалтад ороогүй байгаа гэнэ. Ер нь тус байгууллага алхам тутамдаа газрын асуудалтай тулгардагаа төлөөлөгчдөөс нуусангүй. Түүгээр ч зогсохгүй байгуулагдсныхаа эхний жил газрын асуудлаас болж зөвхөн хөдөө орон нутагт л үйл ажиллагаагаа явуулж байсан байх юм. Иймээс тэд нийслэлд газар хангалттай олгохгүй байна. Гэр хорооллын газрыг чөлөөлөх, газар худалдан авах эрхзүйн зохицуулалт байхгүй, газрын захирамж нь Орон сууцны санхүүжилтийн корпорацийн нэр дээр гарахгүйгээс санхүүжилтэд хүндрэлтэй байдаг тухай гүйцэтгэх захирал Ж.Алдаржавхлан танилцуулгадаа дурдсан. Тус корпораци хотод Сүхбаатар дүүргийн долдугаар хороолол буюу 100 айл, Нисэх, Буянт-Ухаа хороолол зэрэг газарт төслөө хэрэгжүүлж байгаа бөгөөд Нисэх, Буянт-Ухаа хорооллын барилгын ажил нь эхэлсэн байна. Долдугаар хорооллын  3.3 га талбай гэр хорооллыг орон сууцжуулах төсөл хэрэгжиж өнгөрсөн сарын байдлаар 19 айлын 9910 ам² метр газрыг 760 гаруй сая төгрөгөөр худалдан авч 400 ам метр газарт  барилгын хамгаалалтын хашаа байгуулжээ. Ингэхлээр нэг айлын хашааг дундажаар 30 орчим сая төгрөгөөр худалдан авсан гэсэн үг юм. Энэ талаар Нийслэлийн Газрын албаны дэд дарга М.Буяндэлгэрээс тодрууллаа.

-Орон сууцны санхүүжилтийн корпорацийн барилгажуулах Сүх баатар дүүргийн 11дүгээр хорооны нутагт газрын маргаан нэлээд гардаг. Үүнийг хэрхэн зохицуулж байгаа вэ?

-Бүх зүйл хуулийн дагуу явагдвал ямар ч маргаан гарахгүй. Тэндэхийн иргэд ихэвчлэн газраа өмчлөөд авчихсан байдаг. Иймд хуулийн дагуу тэдгээр иргэд газраа орон сууцаар солих юм уу эсвэл харилцан тохиролцсоны үндсэн дээр худалдах боломжтой юм. Үүний дагуу Орон сууцны санхүүжилтийн корпораци газар өмчлөх эрхтэй болсны дараа нийслэлийн Үл хөдлөх хөрөнгийн газарт дээрх иргэдийн үл хөдлөх хөрөнгийг хүчингүй болгох хүсэлт тавигдана. Эцэст нь нийслэлийн Газрын алба нийслэлийн Засаг даргын захирамжаар холбогдох бичиг баримтуудыг бүрдүүлж өгдөг.

-Зарим иргэд газраа чөлөөлөхгүй байгаасаас болоод долдугаар хорооллын барилгын ажил удаашралтай байна. Өмчлөөд авчихсан газар болохоор хуулийн дагуу ямар аргаар үнэлдэг юм бэ?

-Засгийн газрын 1997 оны 152 дугаар тогтоолоор нэг ам метр нь 13200 гэж тогтоосон байдаг. Жишээлбэл 700 ам метр² газартай иргэн улсаас тогтоосон үнээр 9.2 сая гаруй төгрөг болж байгаа юм. Гэвч энэ мөнгө бол авто зам, дэд бүтэц гэх мэт нийтийн эрх ашгийн төлөө газраа чөлөөлөхөд төрөөс өгдөг мөнгө юм. Мөн энд байгаа айлууд зах зээлийн үнээр харилцан тохиролцож газраа худалдаж болно.

-Түрүүн дэд бүтэцгүй газарт газар олгож байгаа тухай яригдлаа. Үнэхээр тийм газарт газар олгож байгаа юмуу?

-Энэ асуудлыг шат дараатай шийдээд явж байна. Эхний ээлжинд намагтай, хөрсний ус ихтэй газруудад хөрсний усыг доош нь суулгадаг технологи суулгасан. Ингэхээр эдгээр газарт барилга барих боломжтой болох юм. Дараагийн шатанд цахилгаан, дулааны асуудлыг хорооллоор нь шийдвэрлэхээр ажиллаж байна гэлээ.

Дэлхийн санхүүгийн хямрал манай улсад нүүрлээд байгаа нь барилгын салбарт хүчтэй тусч байна. Улсын төсвөөс орж ирсэн мөнгөө таван банкинд хуваан байршуулсны улмаас “Анод” банкинд байршуулсан 400 сая төгрөгийг эргэлтэнд оруулж чадахгүй байгаа гэнэ. Мөн энэ жилийн төсвийн тодотголоор барилгын цахилгаан, дулаанд зориулсан 1.2 тэрбум төгрөгийг хассанаас ажил удааширч байгаа талаар тус корпорацийнхан Нийслэлийн Иргэдийн Төлөөлөгчдийн Хурлын төлөөлөгчдөд танилцууллаа. Мөн төсөв санхүү багаснаас баригдаж байгаа барилгуудаа ашиглалтад оруулахын тулд наад зах нь 20 тэрбум төгрөг хэрэгтэй байгааг онцолсон. Энэ мэт тулгарч буй хүндрэлтэй асуудлуудаа илэн далангүй ярилцаж, шийдвэрлэх арга зам, гарцыг хайсан энэ уулзалт Сүхбаатар дүүргийн долдугаар хорооллын барилга барих газарт үргэлжилсэн юм. Мянга сонсохоос нэг үз гэдэг. Нүдээрээ харсан болохоор манай ажлын явц цаашдаа эрчимжих байх гэж тус корпорацийнхан ярьж байлаа.