Нийслэлийн Засаг даргын 97 тоот захирамжийн дагуу Нийслэлийн газрын албанаас "Хашаа" нэгдсэн арга хэмжээг явуулж эхэлсэн. Энэхүү арга хэмжээний дагуу Баянзүрх дүүргийн Газрын алба тус дүүргийн VII хорооны 115 дугаар байрны өмнө нийтийн эзэмшлийн талбайд зөвшөөрөлгүй барьсан долоон гарааш, мөн тус дүүргийн нийтийн эзэмшлийн зам талбайн орц, гарцыг хаасан 10 хашаа, хайс, хоёр ТҮЦ-ийг буулгалаа. Харин Сүхбаатар дүүргийн Газрын алба V хорооны нутаг дэвсгэрт байрлах VI сургуулийн хажуу талд зөвшөөрөлгүй барьсан 30 автомашины гарааш, нийтийн эзэмшлийн зам талбайн орц, гарцыг хаасан таван хашаа хайсыг буулгав.

Хан-Уул дүүргийн Газрын алба нийтийн эзэмшлийн зам талбайн орц, гарцыг хаасан 19 хашаа, хайсыг албадан буулгасан байна.

Мөн Баянзүрх дүүргийн нутаг дэвсгэрт 85, Сүхбаатарт 52, Хан-Уулд 67, Чингэлтэйд 32 тооны зөвшөөрөлгүй барьсан барилга байгууламж, гарааш, павилион, нийтийн эзэмшийн зам талбайг хаасан хашаа хайс барьсан зөрчил илэрчээ. Үүнийг нийслэл, дүүргийн газрын алба 90 хоногийн дотор цагдаа, мэргэжлийн хяналт, Онцгой байдлын хэлтсүүдтэй хамтарч албадан буулгахаар болжээ. Албадан буулгасан зардлыг зөвшөөрөлгүй хашаа, хайс, гарааш, барилга байгууламж барьсан этгээдээр төлүүлэх аж.