Энэхүү уурхай, станц нь “RWE” хэмээх Европ тив, дэлхийд тэргүүлэх хэмжээний том компанийн бүрэлдэхүүнд багтдаг аж.

Рейн мөрний сав газрын хүрэн нүүрсний орд нь Хамбах, Харзвейлер, Инден хэмээх гурван уурхайгаас бүрддэг бөгөөд жилд 100 сая тонн хүрэн нүүрс олборлож, цахилгаан станц нь 10.000 мегаватт цахилгаан үйлдвэрлэдэг юм байна.

Олборлолт, ашиглалт, үйлдвэрлэлийн хувьд дэлхийн тэргүүлэх технологийг мөрдлөг болгодог “RWE”-ийн хувьд байгальд ээлтэй байх зорилгыг эрхэмлэдгээ танилцуулав.

Хамбахын хүрэн нүүрсний уурхайд дэлхийн хамгийн том роторын экскаватор ажиллаж байгаа бөгөөд тэр нь Ерөнхий сайдын ХБНГУ-д хийж буй айлчлалын эхний өдөр уулзсан “Тюссен крупп” корпорацийн бүтээгдэхүүн аж. Энэ аварга машинууд тус бүрдээ өдөрт 240.000 шоометр хөрс хуулах, нүүрс олборлох хүчин чадалтай. Уурхайгаас энэ экскаваторын тусламжтайгаар нүүрсийг олборлож, туузан дамжлагаар ачих цэгт хүргэдэг юм байна. Хамбахт гэхэд л найман салбар, 17 км урт туузан дамжлага ажиллаж байна.

 “ХБНГУ эрчим хүчний эх үүсвэрийн хувьд бараг бүхэлдээ импортын хараат. Гэхдээ ойрын жилүүдэд нүүрсний хэрэглээ дэлхийд буурахгүй, харин ч өсөх төлөвтэй байгаа тул манай улс энэ салбарт онцгой ач холбогдол өгч хүн, байгальд аюулгүй технологийг хэрэглэн, түүхий эдээ хаягдалгүй бүрэн боловсруулахад анхаарч байна” гэж “RWE power” компанийн удирдах зөвлөлийн гишүүн М.Хартунг танилцуулав.

 “RWE”-гийнхэн нүүрсээ зөвхөн цахилгаан станцын түлш биш, брикет, байгалийн хий, шатах, тослох материал, устөрөгч болгон хувиргаж хэрэгцээт үйлдвэрлэлийн салбарт нийлүүлэх, орчин үеийн дэвшилтэт технологид суурилсан шинэ цахилгаан станц байгуулах асуудлыг цогцоор шийдэхийг зорьжээ. Дэлхийд хаана ч байхгүй шинэ маягийн цахилгаан станцыг бид 2015-2016 оны үед ашиглалтад оруулна гэж “RWE”-гийнхэн ярьж байна.

Хамбахын уурхай асар их олборлолт явуулж байгаа хэрнээ байгаль орчны нөхөн сэргээлтийг хамгийн дээд түвшинд хийдгээ Ерөнхий сайд С.Баяр болон түүнийг дагалдан яваа төлөөлөгчдөд танилцууллаа. Уурхайнхан тосгон байсан газрыг ойролцоогоор 400 шахам метр ухаж нүүрс олборлоод тэр хавийн байгалийг хуучин хэвд нь оруулж, ан амьтан нутагшуулж, амралт зугаалгын бүс байгуулж, нуур цөөрөм шинээр бий болгожээ.

Монгол Улсын Ерөнхий сайд С.Баяр “RWE”-гийн гадаад хамтын ажиллагаа, нүүрс олборлолт, импортын чиглэлээр бусад улс орнуудад хөрөнгө оруулах, төсөл хэрэгжүүлэхийг сонирхож буй эсэх, цөмийн болон нүүрсний эрчим хүчний үйлдвэрлэлийн ирээдүйн төлөв зэргийг тодруулж, санал солилцов.

Тэрбээр Монгол Улс нүүрсний баялаг орд газруудаа ашиглах, тэдгээрт гаднын хөрөнгө оруулагчидтай хамтран ажиллах, шинэ техник, технологи нэвтрүүлэн, байгальд ээлтэй үйлдвэрлэл эрхлэхийг зорьж байгаагаа уурхай, станцтай танилцах үеэрээ ярьж байлаа.

Тэрбээр гуравдугаар сарын 30-нд эх орондоо ирнэ гэж Засгийн газрын Хэвлэл мэдээллийн албанаас мэдээлэв.