2200 айлтай, таван байрны загвар хоёр байрных нь нээлт энэ сарын 12-нд болох талаар тус нийгэмлэгийн Хотын хөгжил, барилгын салбар болон мэргэжлийн сургалтыг дэмжих хөтөлбөрийн удирдагч хатагтай Рут Эрлбэк Нийслэлийн Засаг дарга бөгөөд Улаанбаатар хотын Захирагч Г.Мөнхбаяртай уулзах үеэрээ танилцуулаад нээлтийн ажиллагаанд оролцохыг урилаа. 

Тус хөтөлбөрийг хэрэгжүүлэгч багийнхан Барилга, хот байгуулалтын яам, Нийслэлийн Засаг даргын Тамгын газартай хамтран зардал багатай энергийн орон сууц, орон сууцны барилгыг эрчим хүчний хэмнэлттэй болгон шинэчлэн засварлах ажил, оршин суугчдын оролцоотой гэр хорооллын хөгжил, хэрэгцээнд тулгуурласан мэргэжлийн боловсрол, сургалтыг дэмжих зэрэг дөрвөн чиглэлийн хүрээнд 2006 оноос ажиллаж хөтөлбөрийнхөө нэгдүгээр үе шатыг өндөрлөж байна. 

Энэ хугацаанд Гандантэгчинлэн хийд, Чойжин ламын музейн хашаанд байгалийн чулуугаар олон жилийн настай зам зассан, Чингэлтэй дүүргийн тавдугаар хорооны наймдугаар байрыг шинэчлэн засварласан зэрэг ажлыг хамтран хийжээ. 

Улаанбаатарын мээр уулзалтын үеэр “Та бүхэнтэй хамтран ажиллах таатай байдаг. Энэ бол бидний ажлын нэг хэсэг. Ойр ойрхон уулзаж мэдээлэл солилцож байя. Бид саяхан Үндсэний цэцэрлэгт хүрээлэнтэй болохоор шав тавьж ажлаа эхэлсэн. Хүрээлэнгийн зарим хэсэгт байгалийн чулуун зам тавихаар төлөвлөж байгаа” гэлээ гэж Нийслэлийн Хэвлэл мэдээллийн албанаас мэдээллээ.