Энэхүү судалгааг тун удахгүй Засгийн газарт өргөн барих бөгөөд ерөнхий төлөвлөгөөнд тодотгол хийх шийдвэрийг тус газраас гаргах юм байна. Нийслэлийн Хотын хөгжлийн бодлогын хэлтсийн дарга Б.Баянжаргалтай энэ талаар уулзаж ярилцлаа. 

-Улаанбаатар хотын Ерөнхий төлөвлөгөөнд тодотгол хийх болсон шалтгаан нь юу вэ? Тав дахь ерөнхий төлөвлөгөөг Монгол мэргэжилтнүүд хийсэн, их сайн хэмээж байсан шүү дээ? 

-Улаанбаатар хөгжлийнхөө явцад таван ерөнхий төлөвлөгөө мөрдөж ирлээ. 1954 онд анхны ерөнхий төлөвлөгөөг баталсан бол 1963, 1974, 1986, 2002 онд тодотгосон юм. Улаанбаатар хотыг 2020 он хүртэл хөгжүүлэх ерөнхий төлөвлөгөөг 2030 он хүртэл тодотгох болсон нь хэд хэдэн шалтгаантай. Өнгөрсөн хугацаанд өрх бүрт, иргэн бүрт газар өмчлүүлэх хууль батлагдав. 2008 онд Хот байгуулалтын хууль,  Барилгын тухай хууль мөн гарлаа. Монгол улсын Үндэсний хөгжлийн цогц бодлого батлагдсан гээд эдгээр баримт бичгүүдийг хэрэгжүүлэх үүднээс Улаанбаатар хотын ерөнхий төлөвлөгөөг тодотгох шаардлага гарч байна. Улаанбаатар хотын ерөнхий төлөвлөгөөнд тодотгол хийх хүсэлтээ Монгол улсын Засгийн газраар дамжуулан Япон улсын Засгийн газарт тавьсан. Японы тал энэхүү хүсэлтийг хүлээн авч, нийслэлийн Засаг даргын Тамгын газар, Зам тээвэр, барилга хот байгуулалтын яам, Жайка олон улсын байгууллага хамтран хоёр жилийн хугацаанд ерөнхий төлөвлөгөөг тодотгох судалгааны ажлыг хийж дууслаа. Судалгааны үр дүнг нийслэлийн Засаг даргын зөвлөлийн хуралдаан, нийслэлийн Иргэдийн төлөөлөгчдийн хурлын Тэргүүлэгчдийн хуралдаанаар хэлэлцэж, дэмжсэн. Судалгааны ажлаа яамаар хэлэлцүүлж, Засгийн газрын хуралдаанд оруулна. 

-2002 онд баталсан ерөнхий төлөвлөгөөнөөс энэ удаагийнх ямар онцлогтой боловсруулагдаж байна вэ? 

-Улаанбаатар хотыг 2020 он хүртэл хөгжүүлэх ерөнхий төлөвлөгөөнд тодотгол хийх үндсэн арга, зарчмыг энэхүү судалгаагаа гаргаж өглөө. Мөн Улаанбаатар хотын 2030 он хүртэлх хөгжлийн хэтийн төлөвийн төсөөллийг гаргаж байна. Улаанбаатар хотыг хөгжүүлэх үзэл баримтлалыг шинэчилж байгаагаараа онцлогтой гэж энэ удаагийн тодотголыг ойлгож болно. Улаанбаатар хот урсгалаараа тэлэн хөгжиж байна. Үүнийг зогсоож нягт суурьшилтай хотын загварыг баримтлах тухай тусгалаа. 2020 онд хотын хүн амыг нэг сая 537 мянга, 2030 онд нэг сая 870 мянгад хүрэх тооцоог гаргасан. Хүн амын тооцоог хийхдээ механик болон ердийн хүн амын өсөлтийг тооцлоо. Мөн Улаанбаатар хотын эдийн засгийн хэтийн төлөвийг тодорхойлж гаргалаа. Монгол улсын эдийн засагт Улаанбаатар хот нэлээд өндөр байр суурийг эзэлдэг учраас энэхүү асуудлыг нэлээд нарийн авч үзсэн. Улсын дотоодын нийт бүтээгдхүүний тавь гаруй хувийг нь нийслэл үйлдвэрлэж байна шүү дээ. 2007-2030 онд Монгол улсын дотоодын нийт бүтээгдхүүн 4.7 дахин өсөх бол Улаанбаатар хотынх 4.9 дахин өсөх тооцоо гарч байгаа юм. Нэг хүнд ногдох дотоодын нийт бүтээгдхүүн Улаанбаатарт  2.7 дахин өсөх төсөөллийг гаргаж байна. Улаанбаатар хот олон улсын бизнесийн төв болж, иргэд нь таатай орчинд эрүүл аж төрөх, төрийн үр ашигтай удирдлагатай, Азидаа аялал жуулчлалаар тэргүүлэх зэрэг төлөвлөлтийг гаргаад байна. 

-Улаанбаатарыг Европжсон хот гэдэг. Ерөнхий төлөвлөгөөний тодотголын судалгааг Япончуудтай яагаад хамтран хийх болов? 

-Хотын байгуулалтын туршлагаараа тус улс маш өндөр хэмжээнд байдаг. Тийм учраас хоёр улсын Засгийн газрын хэмжээнд ярилцаж байгаад буцалтгүй тусламжаар энэхүү судалгааг хийсэн. 

-Улаанбаатар хотыг 2020 онд хөгжүүлэх ерөнхий төлөвлөгөө бүхэлдээ өөрчлөгдөж байна уу эсвэл..? 

-2002 онд батлагдсан ерөнхий төлөвлөгөөг манай Монгол мэргэжилтнүүд боловсруулсан. Энэ төлөвлөгөөг олон улсын хэмжээнд маш сайн болсон гэж үнэлдэг юм. Гэхдээ хэрэгжүүлэх тал дээр учир дутагдал байсан гэдгийг нуухгүй ээ. Энэ төлөвлөгөөг улам баяжуулж, тодотголыг хийх болно. 

-Монголын хууль гурав хоногт гэдэг шүү дээ. Ерөнхий төлөвлөгөөгөө тодотгоод л байдаг. Хэрэгжихгүй бол хоосон цаасан дээр л хот босгох байх даа? 

-Хэрэгжүүлэх тал дээр бид бодолцсон. Засгийн газраас Улаанбаатар хотын ерөнхий төлөвлөгөөг тодотгох шийдвэрийг гаргачихвал нэг жилийн дотор Монгол мэргэжилтнүүд  тодотголыг хийнэ. Энэхүү тодотголоо Засгийн газраар дамжуулан Улсын их хурал өргөн барих болно. Яагаад гэвэл Улаанбаатар хотын Ерөнхий төлөвлөгөө хууль байх ёстой гэж бид үзэж байгаа. Нэгэнт батлагдсан хуулийг хэрэгжүүлэх л болно шүү дээ. 

-Улаанбаатар хотын дулаан, ундны усны хангамж 2015 онд хүрэлцэхгүй гэсэн тооцоог одоо мөрдөж байгаа ерөнхий төлөвлөгөөнд тусгасан байсан. Тодотгол хийх судалгаан дээр мөн ийм дүгнэлт гарсан байна лээ? Тэгээд ч энэхүү ажлыг эхлүүлэх шийдвэрүүд нь гарсан байгаа. Хэрэгжилт нь ямар байна вэ? 

-Цахилгаан, дулаан, усны хангамж энэ байдлаараа байвал  2015 онд хүндрэх тооцоо бий. Өнгөрсөн онд энэ салбарт баримтлах бодлогыг нийслэлийн Засаг даргын зөвлөлийн хурлаар батлуулж, одоо мөрдөн ажиллаж байна. Дулааны шинэ цахилгаан станцыг барих тухай Засгийн газрын шийдвэр гарч, бүр ажлын хэсэг хүртэл байгуулагдсан. Дулааны тав дахь эх