Улсын бүртгэлийн албаны үүдээр ороход л “Ахаа, эгчээ Та компани байгуулах гэж байна уу? Манайх үнэгүй зөвлөгөө өгнө. Ийшээ ор” гэх залуучууд угтан гүйлдэж бие биенээсээ өрсөх аж. Учрыг нь олж амжаагүй ч “үнэгүй юманд нугасгүй” болохоороо зөвлөгөө авахаар орлоо. 

Хэрвээ компани байгуулах бол дараахь материалыг бүрдүүлнэ гэлээ. Үүнд нь: Эхлээд оноосон нэрээ авах хэрэгтэй. Гэхдээ 15-20 нэрний сонголттой ирэхгүй бол барагтай нэр давхацдаг гэнэ. Нэр сонгоход бас учиртай. Үсэг болоод үг холилдож болохгүй. Жишээ нь “А энд Тур” гэж болохгүй аж. Мөн англи нэр өгөх бол кирилл үсгээр заавал бичих ёстой ажээ. Sunnу – г Санни гэж бичих жишээтэй. 

Ингээд нэрээ сонгоод УБ 0.3 маягт буюу компани үүсгэн байгуулах маягтыг гурван хувь бөглөнө. Эдгээрийг бүрдүүлсэний дараа данс нээх шар хуудас, мөн компанийн үйл ажиллагаа эхлэлтийн тайлан, үүсгэн байгуулах шийдвэр, компанийн дүрэм, тэмдэгтийн хураамж, цээж зураг, дансан дахь нэг сая төгрөгийг баталсан банкны баримт зэргийг бүрдүүлэх шаардлагатай гэлээ. Эдгээр бичиг баримтыг бүрдүүлэхээр хөөцөлдөөд явахад дор хаяж 2-3 хоног шаардагдана. Харин тэр угтаж авч үнэгүй зөвлөгөө өгөөд байгаа хүмүүс энэ бүх ажлыг Таны өмнөөс хийж өгөөд яаралтай гэвэл нэг өдрийн дотор ч компанийн гэрчилгээг гаргаад өгчихдөг юм байна. Тэдэнд дээрх бүрдүүлэх материалуудын загвар бэлэн байдаг юм билээ. Гэхдээ зөвлөгөө үнэгүй ч үйлчилгээ үнэтэй. Энгийн тариф нь 65-75 мянган төгрөг бол яаралтай нь 115-130 мянган төгрөг. Үүнд дээрх бүх материалуудыг бүрдүүлэхээс гадна компанийн тамга тэмдгийг хүртэл хийж өгдөг аж. Тэдгээр “утагч” залуусын хэлж байгаагаар хэрвээ Та өөрөө энэ бүхнийг бүрдүүлж хийнэ гэвэл зардлын хувьд нэг их хол зөрүү гарахгүй гэлээ. Дээрх үйлчилгээний тарифаас 10-20 мянган төгрөгийг л хэмнэнэ гэсэн юм. Тэд нэг ёсондоо төрийн байгууллагуудын энэ мэт гэрчилгээ, зөвшөөрөл олгохын тулд олон арван бичиг баримт шаарддагийг “далимдуулан” нэг цэгийн үйлчилгээний “хөөрхөн” бизнесийг дэлгэрүүлжээ. 

Улсын бүртгэлийн алба байрладаг Монгол даатгал компанийн нэгдүгээр байранд ийм үйлчилгээ үзүүлдэг гурав, гадаа нь буюу ойр хавьд нь мөн л төдий хэмжээний аж ахуйн нэгжүүд нэг цэгийн үйлчилгээг үзүүлж байна.