Судалгаанаас үзэхэд сүрлэн барилгын дулааны алдагдал ердийн барилгынхтай харьцуулахад ойролцоогоор хоёр дахин бага байгаа ба сүрлэн боодлын эзлэхүүн жин нь жишсэн бусад материалтай харьцуулахад 2-10 дахин хөнгөн байгаа нь эдийн засгийн үр ашгийг илүү ихээр нэмэгдүүлэх боломжтой.
Сүрлэн барилгын хана харьцангуй хөнгөн учир хүчитгэсэн төмөр бетон суурь шаардахгүй, хөдөлмөр зарцуулалт бага байдаг зэрэг бусад олон шинжээрээ давуу бөгөөд ашигтай юм. Сүрлэн барилга нь халаалт, хөргөлтийн зардлыг хоёр дахин хэмнэх боломж олгодог хамгийн чухал шинж чанартайг хэлэх хэрэгтэй юм. Сүрлэн боодлыг ашиглалтын аюулгүй байдал хангасан, хамгийн үр ашигтай, хямд дулаалгын болон дуу тусгаарлагч болгон ашигласнаар таны барилга байгальд хоргүй бүтээгдэхүүн ашигласан экологийн цэвэр сууц болох юм. Ингэснээр та сууцны барилгаа барих, ашиглах явцад ихээхэн хэмжээний хөрөнгө мөнгө, эрчим хүч хэмнэх болно. Энэ нь байгаль дэлхийгээ хайрлан хамгаалахад таны оруулж буй хувь нэмэр төдийгүй таны үр ач нар ирээдүйд ийм эрүүл сууцанд суухад үлгэр дууриал болох юм.
Манай оронд жилд 279 мянган га талбайд улаан буудай тариалдаг бөгөөд түүний сүрлийг бүрэн ашиглавал 50м2талбайтай 18300 сууц барих боломжтой юм.