Суурь

Энэ дугаараас эхлэн модон каркасан барилгын угсармал хэсгүүдийн хийцүүдийн тухай үндсэн ойлголтуудыг цувралаар гаргах болно.  Энэ удаа нэг айлын орон сууцны суурийн тухай танилцуулж байна.
 
        Барилгын суурь нь өөрийн жин, өөрөөсөө дээш байрлах барилгын хийц, бүтээцийн жинг хөрсөнд дамжуулах үүрэгтэй. Салхины болон газар хөдлөлтийн ачааллыг мөн барилгын суурь хүлээн авна.
Суурийг буурь хөрсний хөлтөлт болон гэсэл, овойлт, суултын үед бат бэх, тогтвор нь хангалттай байхаар төлвөлж угсрана. Суурийн нүхийг бүтэц нь эвдэгдээгүй хөрс хүртэл ухна. Барилгын талбайн өнгөн хөрс болон ургамлыг бууриас бүрэн зайлуулсан байна.

         Барилгын суурийг хөрсний хөлдөлтийн гүнээс доош суулгах нь хөлдөлтөөс үүсэх эвдрэл гэмтлийг бууруулах хамгийн энгийн арга юм. Суурь суулгах гүнийг барилгын талбайн хөрсний хөлдөлийн гүнээс хамааруулан сонгоно. Суурийн улний хэмжээ нь сууриар дамжих ачааллын хэмжээ болон хөрсний даацаас хамаарна. Ачаалал их байх мөн хөрсний даац багасах тусам улны өргөний шаардлагатай хэмжээ ихсэнэ. Суурийн улны нормд заасан хамгийн бага хэмжээ нь барилгын өндөр болон гадна, доторх хананы төрөлд үндэслэн тооцсон хэмжээс болно.
        
        Суурийн ханыг түүнээс дээш орших барилгын хийц бүтээцүүдээс ирэх ачааллыг хүлээн авах болон хөрс ба хөрсний уснаас ирэх хэвтээ ачааллыг хүлээж авах зориулалтаар хийдэг. Бетонон хольцыг цутгах, доргиулж нягтруулах, ажил нь бетон хийцийн бат бэхэд онцгой ач холбогдолтой.
 
        Бетон хийц бүтээцийг бүрэн бат бэхээ аваахгүй байхад хэв хашмалыг салгах нь хийц бүтээц хэв гажилтанд орох шалтгаан болдог. Бетон цутгасны дараа бэхжилтээ зөвшөөрөгдөх хэмжээнд хүртэл авсан болохыг шалгасны дараа ачааллах хэрэгтэй.

Дэлгэрэнгүй мэдээллийг доорхи хаягаар авна уу.
ШУТИС-ийн Ой модны сургалт судалгааны хүрээлэн
Улаанбаатар хот, Чингэлтэй дүүрэг, Чоймблын гудамж -8
/дөрвөн замд, хараа зочид буудлын хажууд/
976-11-321500, 99193719, 99884483
Email. t_bayasaa88@yahoo.com