Захиалагчийн зураг төслийг боловсруулах зарчим 

Эхний уулзалтаар Та компанийн дизайнерууд болон хийгдсэн зураг төслийн ажлуудтай танилцах болно. Үүнээс гадна Та ажлын зарчим, зургийн ажлын үе шат, хугацаа болон зураг төслийн үнийн талаар дэлгэрэнгүй мэдээлэл авах боломжтой. Танаас объектын анхан шатны төсөөлөл авах шаардлагатай бөгөөд энэ нь хийгдэх интерьерийн талаарх Таны бодол, хүсэл, хэмжээ, цар хүрээний тухай тодорхой даалгаварууд байх болно. Өнөөдөр интерьер дизайны шийдэл, түүний гүйцэтгэл нь зөвхөн дизайнерын чөлөөт сэтгэлгээ болон Захиалагчийн хөрөнгийн хэмжээгээр л хязгаарлагдаж байгаа билээ. Таны даалгаварын үндсэн дээр “Техник задач” бүрдүүлэх бөгөөд энэ нь бидний цаашдын зураг төслийн ажлын эхлэлийн шат юм. Ирээдүйн интерьер дизайныг Таны хүсэл, хобби, шаардлагагууд, зарцуулагдах төсвийн хэмжээ дээр үндэслэн хийгддэг бөгөөд Таны ажиллах, амьдрах орчны тав тух, сэтгэл ханамжийг хангах нь бидний гол зорилго болохоор эцсийн дизайн нь захиалагч, гүйцэтгэгч хоёрын хамтын бүтээл юм.

Үүний дараагаар Тантай интерьерийн зураг төслийн гэрээ байгуулах бөгөөд бидний гэрээ ёсоор ажлын үнийн дүнгийн урьдчилгаа болох 60%-ийн төлбөр аваад зургийн ажлаа эхлүүлнэ. Зургийн ажлын үнэ болон хугацааг хийгдэх ажлаас шалтгаалан тохирно.

I-р үе шат – Интерьер дизайны шийдэл гаргах

Дизайнер Таны өрөө, тасалгаанудын төлөвлөлт, зохион байгуулалтын боломжит хувилбаруудыг гаргах бөгөөд мөн интерьерийн стиль, тавилгын байрлал, өнгөний шийдлүүдийг Таны хүсэл сонирхол, хоббитой уялдуулан харилцан ярилцсаны үндсэн дээр хийгдэх бөгөөд зураг төслийн ажил маань амьдрал дээр хэрхэн харагдах байдлыг гурван хэмжээст зургаар харуулахаас гадна тухайн интерьерийн, тухайбал, тавилга, таазыг хийх материалыг танилцуулах болно.

Интерьер дизайны шийдэл гаргах явцад:

   1. Зураг төсөл хийгдэх объектын хэмжилт хийх

   2. Интерьер дизайны шийдлүүдийг хэлэлцэж тодорхойлох

   3. Тасалгаануудын төлөвлөлт, зохион байгуулалтын боломжит хувилбар боловсруулах

   4. Тасалгаануудын өнгө төрхийг гаргаж, шал, таазны план зургуудыг гаргах

   5. Гурван хэмжээст зургаар зураг төслийн эцсийн байдлыг харуулах

   6. Гүйцэтгэлийн ажлыг хийх барилгын, заслын материалууд, цахилгаан, сантехникийн хэрэгсэл, тоног төхөөрөмж, засал чимэглэлийн (декорын) болон тавилгын сонголт хийж зөвлөгөө өгнө.

II-р үе шат-Ажлын зураг гаргах

Хана, хаалт нураах, босгох; цахилгаан, сантехник холболтуудыг хийх; хана, таазны заслын гэх мэт ажлуудыг хэрхэн, яаж, хаагуур хийхийг тодорхой заасан ажлын зураг хийгдэнэ. Энэ нь гүйцэтгэлийн ажилчдын ажлын гол баримжаа болно. Мөн энэ үе шатанд тус интерьерийн гүйцэтгэлийн ажлын материалын түүвэр болон төсөв тооцоог гаргаж өгнө.

Ажлын зураг гаргахдаа:

   1. Инженер холболтын хэмжилтийн зураг

   2. Хана нураалтын болон угсралтын ажлын зураг

   3. Өрөө тасалгааны зохион байгуулалтын зураг

   4. Зохион байгуулалтын хэмжилтийн зураг

   5. Тавилга байрлуулсан байдлын ажлын зураг

   6. Шал, таазны ажлын зураг

   7. Халаалтын ажлын зураг

   8. Шалны хээний ажлын зураг

   9. Дизайнер Захиалагчтай хамт тавилга, заслын материал, сантехникийн хэрэгсэл, тоног төхөөрөмжийн сонголт хийх

 10. Гал тогооны тавилгын ажлын зураг

 11. Сантехникийн хэрэгсэл, тоног төхөөрөмжийн хэмжилтийн байгуулалтын ажлын зураг

 12. Цахилгаан угсралтын ажлын зураг

 13. Гал тогоо болон ариун цэврийн өрөөнд плита наах ажлын зураг

 14. Хийцлэлийн ажлын зураг

 15. Хаалга, хаалтны ажлын зураг

 16. Салхивч буюу агааржуулалтын шугамын ажлын зураг

 17. Материалын тайлбар ажлын зураг болон бусад шаардлагатай ажлын зургууд хийгдэнэ

 18. Материалын түүвэр болон төсөв тооцоо гаргах

III-р үе шат-Гүйцэтгэлийн ажил

Мэргэжлийн ямар ч гүйцэтгэлийн ажилчин манай боловсруулсан ажлын зургийн дагуу засвар, засал чимэглэлийн ажил гүйцэтгэх боломжтой байна. Бид гүйцэтгэлийн ажилдаа өндөр чанартай материал, тоног төхөөрөмж ашиглан, үйл ажиллагааны технологийг зөв даган мөрдөж ажилласны үндсэн дээр засвар, засал чимэглэлийн нарийн ажиллагаатай гүйцэтгэлийг чанартай хийж Таны цаг болон илүү материалын зардал хэмнэхэд тусална. Гүйцэтгэлийн ажил нь дараах дарааллын дагуу явагдана:

   1. Захиалагч манай компанийн офис дээр ирж үйл ажиллагаатай танилцан, дизайнеруудтай зөвлөлдөх

   2. Манай дизайнертай засвар, засал чимэглэлийн ажил хийгдэх газар дээр нь очиж объекттэй танилцаж, хэмжилт хийх

   3. Гүйцэтгэлийн ажлын материалын түүвэр, төсөв тооцоог гаргаж Захиалагчид танилцуулна

   4. Засвар, засал чимэглэлийн ажлын гэрээ байгуулж гүйцэтгэлийн ажилдаа орно.

   5. Хэрвээ Та хүсвэл бид интерьер дизайны зураг төслийн ажлыг хийж цогц үйлчилгээ үзүүлэх боломжтой

Хэрвээ гүйцэтгэл хийх өөрийн сонгосон баг байхгүй бол бид Танд боломжит ажлын хөлсөөр гүйцэтгэлийн бүхий л цогц ажлыг санал болгохоос гадна манай дизайнер зураг төслийн гүйцэтгэлийн ажлын явцад чанар болон зохиогчийн хяналтыг тавих болно.

Манай компани орон сууц, амины сууц болон офис, үйлчилгээний газруудын зураг төслийн дагуу бүтэн засвар, засал чимэглэл болон урсгал засварын үйлчилгээ үзүүлдэг юм. Манай хамт олны багагүй хугацааны ажлын туршлага, чадвар болон заслын материалын өндөр чанар маань бидний гүйцэтгэлийн ажлын баталгааг 1 жил хүртэлх хугацаагаар өгдөг билээ. Орчин үед ямарваа объектын засвар, засал чимэглэлд ашиглах материалын төрөл-сонголт, тоног төхөөрөмж өргөн болсон бөгөөд гүйцэтгэлийн ажил нь зөвхөн дизайнерын төсөөлөл болон захиалагчийн уг ажилд зарцуулах хөрөнгийн хэмжээгээр л хязгаарлагдаж байгаа билээ. Манай компанид мэргэжлийн дизайнер, зохион бүтээгчид, дотоод болон гадна засал чимэглэлийн мэргэжлийн багтай бөгөөд модон эдлэл, тавилгын үйлдвэр, цонхны үйлдвэр, шилэн хийцийн үйлдвэрүүд болон бусад мэргэжлийн байгууллагуудтай хамтран ажилладаг юм.