Удирдах зөвлөлийн хурлаар

- ”Барилгын норм, норматив боловсруулах сангийн 2008 оны үйл ажиллагааны тайлан”,
- “Барилгын норм, норматив боловсруулах сангийн хөрөнгөөр 2009 онд хэрэгжүүлэх төсөл, арга хэмжээний төлөвлөгөө, түүнд зарцуулах хөрөнгийн тухай”

асуудлуудыг хэлэлцэж доорх шийдвэрийг гаргалаа.

1. Сангийн удирдах зөвлөлийн гишүүн, ахлах мэргэжилтэн С.Сүхбаатарт дараах ажлуудыг хариуцан гүйцэтгэхийг үүрэг болгов:

а./   “Шатахуун түгээгүүрийн станцын галын аюулгүйн дүрэм”-ыг ирэх долоо хоногоос холбогдох хүмүүсийг нь яаманд цуглуулан тусгайлан ярилцаж, санал зөрүүтэй асуудлыг нэг мөр шийдүүлэх.
б./    Боловсруулж дуусаад яаманд ирсэн “Барилгын дулаан хамгаалалт” БНбД, “Барилгад хэрэглэх уур амьсгал ба геофизикийн үзүүлэлтүүд” БНбД, “Барилгын норм ба дүрмүүдэд өндөр барилгын зураг төсөл зохиох онцлогийн талаар нэмэлт өөрчлөлт оруулах” БНбД гэсэн 3 нормыг 1 дүгээр сард багтаан яамны ШУТЗ-ийн хурлаар хэлэлцүүлэх.
в./    Өөрсдийн үйлдвэрлэх барилгын хийц, эдэлхүүний зургийн цомог /альбом, католог/ боловсруулж тусгай зөвшөөрөл авч байх талаар БХБНААҮТөвөөс боловсруулж ирүүлсэн төслийг хянаж, яамны албан бичгээр материалын үйлдвэрүүд, холбогдох байгууллагад хүргүүлэх, тусгай зөвшөөрлийн дүрэмд тусгах,

2. Сангийн удирдах зөвлөлийн гишүүн, ахлах мэргэжилтэн Г.Лосолд дараах ажлуудыг хариуцан гүйцэтгэхийг үүрэг болгов:

а./   “Томсгосон норм, үнэлгээ” боловсруулах ажлын гүйцэтгэгч “Нормчлол” ХХК-ийн асуудлыг түргэн шийдвэрлэж өгөхийг хүссэн Яамны албан бичгийг шүүхэд явуулах.
б./   Төсөв, үнэ бүрдлийн талаар яаман дээр ирэх долоо хоногоос төсвийн асуудал хариуцсан мэргэжилтнүүдийг байлцуулан уулзалт зохион байгуулах.
в./   Барилгын үнэ бүрдэлтийн асуудлаар бодлогоо зөв тодорхойлж, түүний дагуу төсөл боловсруулж яамны ШУТЗ-ийн хурлаар 1 дүгээр улиралд хэлэлцүүлэх.

3. БХБНААҮТөвийн дарга, Сангийн тэргүүн Б.Бямбажавд дараах ажлуудыг хийж гүйцэтгэхийг даалгав. Үүнд:

а/    Урьд оноос үргэлжлэн боловсрогдож байгаа 14 норм, нормативыг хэзээ дуусгаж батлуулах талаар нарийвчилсан график, төлөвлөгөө боловсруулж батлуулах.
б/    Орчуулгын нормуудаас Батдорж, Эрхэмбаярын хариуцсан нормууд болон төв өөрийн хүчээр боловсруулж байгаа нормийг ирэх долоо хоногт яамны дотоод ажил цэгцрэхээр холбогдох хүмүүстэй уулзаж ярилцан асуудлыг нэг мөр шийдвэрлүүлэх.
в./    Өөрсдийн үйлдвэрлэх барилгын хийц, эдэлхүүний зургийн цомог /альбом, католог/ боловсруулж тусгай зөвшөөрөл авч байх талаар барилгын материалын үйлдвэрүүдэд хүргүүлэх яамны мэдэгдэх хуудасны төслийг боловсруулж яаманд ирүүлэх

г./ Сангийн хуралд нэмж танилцуулсан саналынхаа 2, 3, 5, 6-д дурдсаны дагуу дараах ажлыг зохион байгуулах :
-    Шинээр байгуулах агентлагт норм, норматив хариуцсан нэгжийг хэвээр байлгаж, орон тоог одоогийн хариуцсан чиглэлийн дагуу тус бүр 2 мэргэжилтэн байхаар шийдвэрлүүлэх,
-    “Барилгын норм, нормативын баримт бичгийг эцэслэн хянах орон тооны бус ажлын хэсэг”-ийг байгуулах , түүний бүрэлдэхүүн, ажиллах журам, цагийн хөлс, санхүүжилтын эх үүсвэрийн талаар Сайдын тушаалын төсөл боловсруулж танилцуулах,
-    Норм, норматив боловсруулах гүйцэтгэгчийн тавьсан хүсэлтийн дагуу урьдчилгаа санхүүжилт олгох асуудлыг норм , нормативын баримт бичиг боловсруулах ажлын гэрээгээр зохицуулах.

д./   Сангийн хөрөнгөөр 2009 онд боловсруулах норм, норматив, дүрэм заавар, аргачлалыг хугацаанд нь чанартай боловсруулах ажлыг шуурхай зохион байгуулж, гүйцэтгэгч нартай гэрээ байгуулж, түүний биелэлт, ажлын явцыг шалгаж холбогдох арга хэмжээ авах.
е./   Барилга угсралт, зураг төслийн ажил, барилгын материалын үйлдвэрлэл эрхэлдэг байгууллагуудтай санд төвлөрүүлэх хөрөнгийн талаар улирал тутам тооцоо хийж, БХБСайдын /хуучин нэрээр/ 2008 оны 121 дугаар тушаалын дагуу санд төвлөрүүлэх мөнгийг бүрэн авах ажлыг зохион байгуулах, хэрэгжилтийг хянах.

4. Барилгын мэдээллийн санг байгуулах аргачлалыг сайн боловсруулах, үүнд мэргэжлийн 2-3 хүн байнга ажиллуулах, хаанаас ямар мэдээлэл гаргах, авах схемээ сайн гаргаж , энэ мэдээллийн санг бусад агентлаг, байгууллагуудтай шууд холбоотой байхаар боловсруулах болов. ГХГЗЗГ-ийн орон нутагтай холбогдсон том сүлжээтэй уялдуулах асуудлыг агентлагийн дарга томилогдсоны дараа ярилцаж шийдэх.

5. “Барилгын бүтээц төсөллөлтийн үндэс. Ерөнхий шаардлага” нормыг одоохондоо боловсруулах шаардлагагүй гэж үзэн 2009 оны төлөвлөгөөнөөс хасахаар шийдэв.

6.     Барилгын машин, механизмын ашиглалтын 2 дүрэм, 8 стандартыг сангийн 2009 оны төлөвлөгөөнд нэмж тусгаж, нэг дүрмийг 2,0 сая төгрөгөөр, стандарт бүрийг 450,0 мянган төгрөгөөр боловсруулахаар шийдэв.

7. Хот байгуулалт, геодези, зураг зүй, кадастрын чиглэлээр боловсруулах нормын жагсаалтыг гаргаж сангийн 2009 оны төлөвлөгөөнд тусгуулах, энэ үндэслэлээр нормчлолын санд хөрөнгө төвлөрүүлэх ажлыг зохион байгуулахыг Сангийн удирдах зөвлөлийн гишүүн , ХБГХБГ-ын дарга С.Очирбат-д даалгав.

8. Сүвэрхэг дүүргэгчтэй хөнгөнбетон даацын бүтээц, эдэлхүүнийг барилгын норм, нормативт тусгах, түүний стандартыг боловсруулах ажлыг    сангийн 2009 оны төлөвлөгөөнд тусгаж 10,0 сая төгрөг зарцуулахаар шийдвэрлэв.

9. УМХГ-аас ирүүлсэн саналын дагуу боловсруулах шаардлагатай байгаа “Нефть, нефтийн бүтээгдэхүүн хадгалах босоо ган цилиндр савны төлөв байдалд техникийн оношлогоо хийх журам” /РД 08-95-95/-ийг 300,0 мянган төгрөгөөр, “Шатах, тэсрэх шингэн хадгалах барилга, байгууламжийн ашиглалтын норм”-ыг 2,0 сая төгрөгөөр, “Шатахуун түгээх станцын техник ашиглалтын дүрэм”-ийг 2,0 сая төгрөгөөр, “Нефть, нефтийн бүтээгдэхүүний агуулахын технологийн зураг төсөл боловсруулах норм” /ВНТП 5-95/-ийг 500,0 мянган төгрөгөөр тус тус боловсруулахаар сангийн 2009 оны төлөвлөгөөнд тусгахаар шийдэв.

10 . Барилгын норм, нормативыг боловсруулах сангийн хөрөнгөөр 2009 онд боловсруулах норм, норматив, төсөл, арга хэмжээний жагсаалтыг 1дүгээр хавсралтаар баталж, сангийн үйл ажиллагааны 2009 оны зардлын төсвийг   509813.1 мянган төгрөгөөр хянаж, түүнийг зориулалтын дагуу зарцуулах эрхийг БХБНААҮТөвийн дарга, Сангийн тэргүүн /Б.Бямбажав/-д олгов.

 “Барилгын норм, норматив боловсруулах сан”-гийн хөрөнгөөр 2009 онд боловсруулах норм, нормативын баримт бичгийн жагсаалтыг хавсралтаас үзнэ үү.

Мөн барилгын норм, нормативын баримт бичгийг орчуулах, боловсруулах сонирхолтой хувь хүн, байгууллага, аж ахуй нэгжийг БХБНААҮТ-ийн Норм, нормативын хэлтэст ирж уулзах буюу хүсэлтээ албан ёсоор тавихыг хүсэж байна.

БАРИЛГА, ХОТ БАЙГУУЛАЛТ, НИЙТИЙН АЖ АХУЙН ҮНДЭСНИЙ ТӨВ