Өнгөрсөн амралтын өдрүүдэд нийт харьяа байгууллага, компанийн ажилчдын дунд сагсан бөмбөгийн тэмцээнийг явуулж, шилдгүүдээ тодруулжээ. ОСНААУГ туүний харьяа "Хөх асар", "Опен хаус", "Санни хаус", "Ашид ундрах", "Сансар өргөө" зэрэг нийт 21 баг оролцсон сагсан бөмбөгийн тэмцээнийг нээж тус газрын дарга А.Дашзэвэг үг хэлж, оролцогчдод амжилт хүссэнээр тэмцээн эхэлсэн юм. Тус тэмцээний үеэр ОСНААУГ-ын Инженерийн бодлогын хэлтсийн дарга П.Баатартуултай ярилцлаа.

-Нийслэлийн 370 жилийн ойг угтаж, зохион байгуулж буй ажлынхаа талаар тодруулаач. Энэ тэмцээнийг нэг хэсэг нь гэж болох уу?

-Бололгүй яахав. Манай байгууллага нийслэлийн 370 жилийн ойг угтаж нэлээд ажил хийхээр төлөвлөсөн. Энэ удаа ажилчдын нийгмийн асуудлын хүрээнд гар бөмбөгийн тэмцээнийг зохион явууллаа. Жил бүр уламжлал болон явагддаг тэмцээн маань 16 дахь удаагаа болж байна. Нийслэлийн 370 жилийг ойг угтаж байгууллага бүр нэг бүтээлч ажил хийх үүргийн дагуу бид нэг дүүрэгт тохижилтын ажил хийх гэж байна. Уг нь Урт цагааны өмнө усан оргилуур хийх гэсэн боловч хотын төлөвлөгөөнд орсон газар учраас больсон, одоо өөр газрыг үзээд, дүүргийн тохижилтын газартай ярилцаж байна. Энэ тохижилтын ажлаас гадна Улаанбаатар хотын ОСНААУГ үйл ажиллагааныхаа хүрээнд багагүй ажлыг хийхээр төлөвлөсөн. Эдгээрээс хамгийн чухал нь Улаанбаатар хотын нийт өрхийн 40-өөс доошгүй хувийг нь усны тоолуураар хангах зорилт тавьсан. Нийслэлд орон сууцанд 69514 өрх амьдардаг. Үүний 23.3 хувийг нь тоолууржуулаад байна. Бас 1117 өрх босоо шугамын тоолуурт хамрагдсан байгаа. Бас БНСУ-ын Засгийн газрын буцалтгүй тусламжаар "Койка"-гийн төсөл хэрэгжиж байна. Нийт 44 системийн ус дулаан дамжуулах төвийн халуун усны войлюр, эргэлтийн насосуудыг иж бүрэн шинэчлэн сольж байна. Даралт, температураас хамааран ажилладаг бүрэн автомат насосаар хангаж, ирэх сарын нэгэн гэхэд бүх ажлаа дуусгахаар ажиллаж байна. Үүнийг хийснээр халуун, хүйтэн ус ирдэггүй доголдол бүрэн арилна. Суугчид хэрэглээ багатай үед даралт багасч, насос өөрөө унтардаг. Ямар нэг хүний оролцоо байхгүй гэсэн үг.

-Танай харьяанд байдаг "Санни хаус"-тай холбоотой гомдол иргэдээс их ирж байсан. Ямар асуудал үүссэн бол?  

-"Санни   хаус"   манай   сайн компаниудын    нэг.    Айхтар доголдол    үүссэн    асуудал гараагүй. Нэгдүгээр хэсгийн даралтын   температур   муу, дамждаг гэсэн шалтгаанаас халаалт, халуун усны доголдол гарсан байж магадгүй. Энэ жил манай салбар компаниуд их сайн ажилласан.  

Орон сууцны байгууллагуудын өмнө ямар хүндрэлтэй асуудал байна вэ? 

-Хамгийн хүндрэлтэй асуудал бол шугамын насжилт. Хоёр, нэгдүгээр дөчин мянгат, тавдугаар хороолол, Бага тойргийн байрууд зэрэг хотын ихэнх хорооллуудын байрны шугам 40-50 жил болсон. Хамгийн сүүлд баригдсан III, IV хороолол гэхэд бараг гучин болж байна. Ингэж олон жил ашигласан шугам сүлжээг эасах хөрөнгө мөнгөний асуудал хүндрэлтэй байдаг. Тиймээс бид хотын хөрөнгө оруулалтаар 3.5 тэрбум төгрөгөөр гадна шугамын засварыг хийхээр болсон. Өнгөрсөн жил улсын төсвөөс 1.6 сая төгрөгийн засвар хийх байсэн ч төсвийн тодотголоор хасагдсан. 2009 онд нийт харьяа компаниуд өөрсдийн хөрөнгөөр 1.9 тэрбум төгрөгийн урсгал засварын ажил хийнэ.