Нийслэлээс УИХ-д сонгогдсон гишүүдтэй нийслэлийн удирдлагууд уулзаж “Шинэ Улаанбаатар” хөтөлбөрийн талаар санал бодлоо солилцжээ. Нийслэлийн Засаг дарга бөгөөд Улаанбаатар хотын Захирагчийн 2009-2012 оны үйл ажиллагааны хөтөлбөр, хөгжлийн бодлого, төлөвлөлтийн бусад баримт бичгүүдийн бодит хэрэгжилтийг хангуулах үүднээс дэд бүтэц, хот байгуулалтын дөрвөн төсөл боловсруулснаа гишүүдэд танилцуулсан байна.

 

 “Энэ хөтөлбөр хэрэгжсэнээр нийслэлийн иргэд эрүүл, аюулгүй орчинд амьдарч хөдөлмөрлөх, сурч боловсрох, амьдралын чанараа сайжруулахад ахиц гарна” хэмээн төсөл боловсруулсан мэргэжилтнүүд амлаж байна. Тус хөтөлбөр нь “Эрүүл орчин-эхлэл”, “Орон сууцны шинэ хороолол”, “Их тойруу сүлжээ“, “Авто замын шинэчлэлт” гэсэн дэд хэсгүүдтэй. “Орон сууцны шинэ хороолол” төслийг Улаанбаатар-Налайхын автозам дагуу Баянзүрхийн Шалган бүртгэх товчооноос Налайх дүүрэг хүртэлх 17 км замд, 6300 ам.метр талбайд 85 мянган өрх, 360 мянган оршин суугч амьдрах орон сууцны есөн хороолол барихаар төлөвлөжээ.

 

Хотын удирдлагуудаас санаачилсан энэхүү уулзалтад ирсэн УИХ-ын 20 гаруй гишүүн бүгд санал бодлоо хэлжээ.

Монгол Улсын нэг хүнд жилд нэг сая төгрөгийн төсөв ногдож байхад улсын хүн амын бараг 50 хувь нь амьдарч буй нийслэлийн төсвөөр нийслэлийн нэг иргэнд жилд 53 мянган төгрөг ногдож байгаа тухай сонирхолтой статистикийн талаар энэ үеэр гишүүд хөндлөө.

 

Тэд УИХ-ын Төрийн байгуулалтын байнгын хорооны дэргэд хот төлөвлөлтийн дэд хороо байгуулъя, хотын удирдлагууд УИХ-ын гишүүдийг холбох ажлын хэсэгтэй болъё зэргээр Улаанбаатарынхаа хөгжлийн төлөө сэтгэл, хамтран ажиллах зүтгэл нэгтэй байгаагаа гишүүд илэрхийллээ.