2015 он гэхэд "Хотын албан татварын тухай хууль" боловсруулан батлуулахаар хот төлөвлөж байна. Энэ хуульд хотод оршин суугчийн татвар, хот төлөвлөлтийн татварыг бий болгохоор тусгах зорилготой байгаа ажээ.

 

Хотын албан татварын тухай хуулийн төсөл боловсруулах тухай 1990-ээд оны сүүлчээс яригдаж, хувь хэмжээг нь хүртэл тогтоосон анхан шатны төсөл хүртэл гаргаж үзэж байсан юм. Гэсэн хэдий ч энэ асуудал өнөө хүртэл шийдэгдээгүй байна.

 

Түүнчлэн нийслэл нь тухайн жилд төвлөрүүлсэн татварын орлогынхоо гуравны хоёроос доошгүй хувийг хөрөнгө оруулалт, зардлын санхүүжилтэд ашиглах эрхийг Нийслэлийн эрх зүйн байдлын тухай хуульд нэмж тусгах асуудлыг шийдвэрлүүлэх, санхүүгийн корпораци байгуулах зорилгыг хотын удирдлагууд тавьж байна.

 

Улаанбаатар хотын хөгжлийн бодлогодоо уялдсан тодорхой үйл ажиллагаануудын санхүүжилтийг бие даан шийдвэрлэх, хэрэгжүүлэх чадамжтай байхын тулд юуны өмнө эдийн засгийн хувьд бүрэн бие даасан, эдийн засаг нь өөрийгөө тэтгэдэг байх шаардлагатай байгаа юм. Иймээс нийслэлийн төсөвт төвлөрүүлэх татварын орлогыг тогтвортой байлгах, орон нутгийн шинж чанартай төлбөр хураамж бий болгох зэргээр орлогын тогтвортой эх үүсвэр бий болгох зорилгоор дээрх хуулийг батлуулах, зарим хуууьд өөрчлөлт оруулах асуудал хөндөгдөж байгаа ажээ.

 

Монцамэ