УИХ-ын Эдийн засгийн байн­гын хорооны хурлаар Дэлхийн банкнаас авах зээлийн гэрээг зөвшилцөх тухай асуудлыг хэлэл­цэв.

 

Манай улс Дэлхийн банкнаас эрчим хүчний салбарт зориулан 10 сая ам.долларын зээл авахаар болжээ. 40 жилийн хугацаатай, 0.75 хувийн хүүтэй уг зээлийг авах нь зүйтэй хэмээн гишүүд дэмжив. Энэ зээлээр нийслэлд шинээр барьж буй орон сууцуудыг эрчим хүчинд холбох, эрчим хүчний шугам, дэд станцуудыг солих, хотын төвийн эрчим хүчийг найдвартай болгох зэрэгт зарцуулах тухай төслийг гишүүд дэмжсэн юм.

 

Гэхдээ зарим гишүүний шүүмжлэлтэй хандаж байлаа. Д.Ганхуяг гишүүн “Өрийн сүлжээнд орчихдог алдагдалтай салбар” гэсэн бол Д.Тэрбишдагва “Эрчим хүчний шугамын алдагдал багасвал эрчим хүчний үнэ буурах уу. Энэ зээлийг дамжуулна. Дам­жуулсан зээл ямар хүүтэй байх вэ. Арван сая ам.доллароор Улаан­баатарын цахилгааны асуудлыг шийдэж хүрэхгүй бол нэмж авбал яасан юм бэ” гэв. Энэ талаар Эрчим хүч, эрдэс баялгийн сайд Д.Зоригт “Эрчим хүч өөрөө тарифаа тогтоодог байгууллага. Өрийн сүлжээнд орчихдогийн үндсэн шалтгаан нь тарифтай холбоотой. Нэг кВт нь 68 төгрөгөөр тооцож байгаа цахилгааны үнийг 90 төгрөг хүртэл нэмэгдүүлэх шаардлагатай. Үүнийг нь шалгаад үе шаттайгаар нэмэгдүүлэх нь зүйтэй гэж үзсэн. Тарифаас л болж өр авлага үүс­дэг. Тухайлбал, Багануурын нүүрсний уурхай 1 тн нүүрс тутамд гурван мянган төгрөгийн алдагдал хүлээдэг” гэж байв.

 

Мөн Сангийн сайд С.Баярцогт “Дэлхийн банкнаас зээл авах манай хэмжээ дууссан. Хэрэв энэ зээлээ сайн хэрэгжүүлбэл 16 сая ам.доллар болгон нэмэх болно гэдгээ нөгөө талаас илэр­хийлээд байгаа. Дамжуулсан зээл нь Улаанбаатарт нэг, орон нутагт хоёр хувийн хүүтэй” гэж байв. Санал хураалт явуулахад гишүүд уг зээлийн хэлэлцээрийг дэмжсэнээр байнгын хорооны хурал өндөрлөв.