Үндэсний цэцэрлэгт хүрээлэнгийн танилцуулга
Barilga
2019-11-05
Монгол Улсын Засгийн газрын 2002 оны 2 дугаар сарын 26-ны өдрийн хуралдааны 28 тоот тогтоолоор батлагдсан “Нийслэл Улаанбаатар хотыг 2020 он хүртэл хөгжүүлэх ерөнхий төлөвлөгөө”, Нийслэлийн Иргэдийн Төлөөлөгчдийн Хурлын 2008 оны 12 дугаар сарын 22-ны өдрийн 2/06, 2 /07 дугаар тогтоолуудаар батлагдсан “Нийслэлийн Засаг дарга бөгөөд Улаанбаатар хотын Захирагчийн 2009-2012 оны үйл ажиллагааны хөтөлбөр”, “Монгол улсын нийслэлийн эдийн засаг, нийгмийн 2009 оны зорилт, хэрэгжүүлэх үйл ажиллагаа”-ны хүрээнд Баянзүрх дүүргийн 10, 12 дугаар хорооны нутаг дэвсгэр дэх Туул голын дагуу зурвас газарт баригдах Үндэсний паркийн ерөнхий төлөвлөгөө хийгдэж байна. Үндэсний паркийн ерөнхий төлөвлөгөөний архитектур төлөвлөлтөнд
- Туул голын сав дагуу ойжуулах, цэвэр усны хамгаалалтын ногоон зурвас байгуулах;
- Паркийн доторхи бүсчлэлийг оновчтой тогтоож, паркийн ашиглалтын бүсийн хязгаарлалтыг тогтоох;
- Туул голын дагуу амралт зугаалгын идэвхитэй бүс байхаар төлөвлөх;
- Голын далангийн хойт хэсэгт ерөнхий төлөвлөгөөтэй уялдуулан явган зам, дугуйн зам болон авто замын сүлжээг нормын дагуу төлөвлөх;
зэрэг шаардлагууд тавигдан зураг төсөл боловсруулагдаж байна.
Үндэсний цэцэрлэгт хүрээлэн нь нийт 930 га талбайг хамрах ба 150 га талбайг эхний ээлжинд гүйцэтгэхээр төлөвлөж байна. 1-р ээлжийн 150 га талбай нь 5679.9 у/м энгийн хашаа, 272.7 у/м гоёлын хашаагаар хүрээлэгдэн 1 гол орц, 2 туслах орцтой байна. Одоо байгаа цэвэр усны худгуудын ариун цэврийн хамгаалалтын бүс / R200 м / -ийн гадуур, хашааны дотор талаар шар хуайс, хайлаасаар ургамлан хашаа хийнэ. Гол орцын хэсэгт 400 автомашины зогсоол төлөвлөв.
Цэцэрлэгт хүрээлэнд 4.7 км / нийт 15 км / дугуйн болон гүйлтийн зам, 5.8км / нийт 27 км/ явган зам, амралт зугаалгын талбай, усан оргилуур, хиймэл цөөрөм, задгай театр, танин мэдэхүй түүхийн утга агуулсан амралтын зам талбайг хийнэ. Ариун цэврийн шаардлагаар эрүүл ахуй шаардлага бүрэн хангасан зөөврийн бие засах газруудыг явган замын дагуу 1000 метр тутамд байршуулах шаардлагатай.
Ногоон байгууламжийн хувьд нийт талбайг зүлэгжүүлэн усалгааны системээр хангана. Гол орц, дугуйн зам дагуу замын 2 талаар 20-25 настай нарс модыг тариална. Нийт талбайд навчит болон шилмүүст мод, бут сөөгийг эгнээ, төгөл, бүлэглэн тарина. Навчит модны: улиас, хайлаас, бургас, улиангар, хус, цагаан хуайс; шилмүүст модны: нарс, шинэс, гацуур; бут сөөгний : монос, долоогоно, боролзгоно, өрөл, гүйлс, буйлс, нохойн хошуу, чацаргана гэсэн төрлүүдийг хэрэглэнэ.
2009 оны тариалалтаар 55.5 га-д тохижилт хийхээр төлөвлөж байна.
www.cud.ub.gov.mn