“Буянт-Ухаа”, “Долдугаар хороолол”, “Иргэдийн зээл”, “4000 орон сууц” гэсэн дөрвөн төсөл нийслэлд хэрэгжиж байна. Сүхбаатар дүүргийн 9, 10, 11, 12-р хорооны нутаг дэвсгэрийн газрыг чөлөөлөн орон сууцны долдугаар хороолол болгон барихад шаардагдах инженерийн шугам сүлжээг байгуулах ажлын бэлтгэлийг Орон сууцны санхүүжилтийн корпораци хангаж байна. Гол шугамын дагуу байрласан айлуудын газрыг чөлөөлөхөд 20 гаруй тэрбум төгрөг шаардлагатай гэсэн тооцоог тус корпорацийнхан хийжээ.

 

200 гаруй айл өрх амьдарч байгаа уг газрыг чөлөөлөх ажлыг эхлүүлээд буй бөгөөд өнөөдрийн байдлаар 16 айлын 7110 ам.метр газрыг 560 гаруй сая төгрөгөөр худалдан авч, хамгаалалтын хашаа бариулаад байгаа ажээ. Хотын төв хэсэгт байрлалтай долдугаар хороолол буюу “Ногоон нуур”-ын орчмыг орон сууцжуулах ажил ирэх оноос эхлэх юм байна. “Иргэдийн зээл” төслийн хүрээнд 2008-2009 онд 283 иргэнд орон сууцны зээл олгожээ. Орон сууцны санхүүжилтийн корпораци “4000 мянган орон сууц үзэсгэлэн”-г ирэх сарын эхээр зохион байгуулахаар бэлтгэж байна зэрэг олон мэдээллийг тус корпорацийн гүйцэтгэх захирал Ж.Алдаржавхлан хотын удирдлагуудад өглөө.

 

Нийслэл УБ хотыг агаарын бохирдол, тоосжилтоос аврах цорын ганц арга зам нь гэр хорооллыг орон сууцжуулах. Үүний хүрээнд Засгийн газрын шийдвэрээр Зам тээвэр, барилга хот байгуулалтын сайд, Сангийн сайд, Нийслэлийн Засаг дарга бөгөөд Улаанбаатар хотын Захирагчийн хамтарсан тушаалаар Орон сууцны санхүүжилтийн корпорацийг гурван жилийн өмнө байгуулсан билээ. Тус корпораци хүн амыг орон сууцаар хангах, төрийн бодлого, хөтөлбөрийг хэрэгжүүлэх, үйл хөдлөх хөрөнгө барьцаалсан зээл, хөрөнгө оруулалт, санхүүжилтийн цогц үйл ажиллагааг шийдвэрлэх гэх мэт ажлыг хариуцан ажиллах үүрэгтэй. Нийслэлийн удирдлагууд Орон сууцны санхүүжилтийн корпорацийн үйл ажиллагаатай танилцаж, өнгөрсөн хугацаанд хийсэн ажил болоод төрийн албан хаагчдад олгох 4000 мянган айлын орон сууцны талаар асууж тодрууллаа.

Засгийн газрын өнгөрөгч сарын 321 дүгээр тогтоол, төрийн албан хаагчид болон иргэдийг орон сууцаар хангах “Орон сууцны зээлийн журам”-ыг боловсруулан Сангийн яам, Зам тээвэр, барилга хот байгуулалтын яам, Нийслэлийн Засаг дарга бөгөөд Улаанбаатар хотын Захирагчаар батлуулахад бэлэн болоод буй ажээ.

“4000 айлын орон сууц” төслийн зээлийн нөхцөл, шалгуур ямар байх талаар Нийслэлийн Засаг даргын нэгдүгээр орлогч сонирхоход мэргэжилтнүүд нь “Зээлийн хэмжээ 40 сая хүртэл төгрөг байна. Орон сууцны үнийн 10 хувиас доошгүйг урьдчилгаа төлбөрт өгөх учиртай. Мөн тухайн байгууллагадаа гурван жилээс доошгүй ажилласан байх шаардлага тавина” гэсэн хариулт өглөө.

 

Орон сууцны корпорацийн хурлын танхимд эхэлсэн уулзалт тэдний захиалгаар нисэхийн орчимд баригдаж байгаа шинэ барилгын ажлын явцтай танилцаж үргэлжиллээ.

 

40000 орон сууц хөтөлбөрийн хүрээнд “Буянт-Ухаа” төслөөр баригдаж буй хоёр барилга ирэх оны хоёрдугаар сарын сарын 1 гэхэд дуусаж, сар шинийн өмнөхөн 126 өрх шинэ байранд төвхнөх боломж бүрдэнэ. Ам.метрийг нь 500 ам.доллараар үнэлэх эдгээр барилгыг ашиглалтад хүлээж авсны дараа иргэдээс захилга авах бөгөөд тэд 10 жилийн хугацаатай зээлд хамрагдах боломжтойг сануулж байлаа. Нийслэлийн Засаг даргын нэгдүгээр орлогч Б.Баатарзориг урт хугацааны зээлд хамрагдаж байгаа учраас барилгын чанар өндөр байх ёстой гэдгийг “Хасу мандал”, “Эрэлт импекс” ХХК-ийн удирдлагуудад анхаарууллаа. Мөн тэрбээр уулзалт ярилцлагаа дүгнэн “Орон сууцны барилгыг эрчимжүүлэх зорилгоор ийм уулзалт хийлээ. Нийслэлийн иргэд маань насны бөгсөнд орон сууцтай болдог жишиг бий. Үүнийг халах цаг иржээ. Залуучууд, нийслэлчүүд маань айлын байр хөлсөлж, түрээслэн энд тэнд нүүдэллэхгүй өөрийн гэсэн орон сууцтай болчихоод, түүнийгээ барьцаанд тавьж орон сууцны зээлд хамрагдах боломжтой боллоо. Бид зээлийн орон сууцны чанарт онцгой анхаарал тавихыг гүйцэтгэгч байгууллагуудад анхааруулж байгаа” гэлээ гэж Нийслэлийн Хэвлэл мэдээллийн албанаас мэдээллээ.