МУ-ын гавьяат барилгачин О.Тлейханы нэрэмжит Барилгын Коллежийн Оюутны холбоо хэвлэлийн бага хурал зарлаж, мэдэгдэл хийлээ.

 

Тэд « Бид сургуулийнхаа нийт оюутнуудын эрх ашгийг хамгаалах, нийгмийн олон талт арга хэмжээг удирдан зохион байгуулах, оюутнууд санал бодлоо чөлөөтэй илэрхийлэх бүх талын бололцоог бүрдүүлэхэд шийдвэр гарган тууштай ажилласаар ирсэн. Гэсэн ч сүүлийн үед манай сургуульд сурч буй оюутнуудын эрх зөрчигдөх, багш удирдах ажилтан нарын ёс зүйгүй харьцаа хэрээс хэтэрч, суралцах орчин нөхцөл хангалтгүй байна. Үүнээс болж нийт суралцагсдаас сургуулийн нөхцөл байдал хүндэрсэн хэмээн удаа дараа шаардсан боловч сайжирсан зүйлгүй учир оюутны эрх, суралцах орчин, эрүүл мэнд, үг хэлэх эрх, сургуулийн орчны газрыг хувийн компанид дур мэдэн зарахыг эсэргүүцсэн тухай зургаан зүйл шаардлагыг сургуулийн захирлын зөвлөлд хүргүүлэн удирдах зөвлөлийн хурлаар нэгтгэн хэлэлцсэн ч төгс шийдлийг олж чадаагүй. Бидний өгсөн мэдэгдлийн дагуу ямар нэгэн арга хэмжээ авалгүй үл тоон оюутан, оюутны байгууллагыг үл хүндэтгэсэн учир бид хэвлэл мэдээллийн хэрэгсэл болон холбогдох байгууллагуудад хандахаас өөр аргагүйд хүрсэн» гэж тайлбарлав.

 

Тус сургуулийн Оюутны зөвлөлийн дарга болон төгсөх ангийн оюутан Н.Цолмонбаатар нараас нөхцөл байдлын талаар тодруулахад тэдний төлсөн сургалтын төлбөрийг чухам юунд зарцуулдаг нь нүдэнд харагдаж, гарт баригдахаар зүйл болдоггүй. Нэг жишээ гэхэд анги тохижуулна гээд хүүхэд бүрээс 40,000 төгрөг хурааж авсан ба тэдний анги 35 оюутантай бөгөөд нийлээд 1,400,000 төгрөгөөр өнгөрсөн жил ангиа тохижуулжээ. Гэтэл энэ жил төгсөх анги болоод иртэл тохижуулсан ангиас нь гаргаж, өөр муу ангид шилжүүлж дахин дөч, дөчин мянган төгрөг цуглуулж тохижуулна гэхэд тэд эрс дургүйцсэн байна. Харин сургуулийн эрхлэгч Ж.Сарантуяа «төгсөх ангийнхан сургуульдаа бэлэг дурсгалын зүйл заавал үлдээх журамтай. Та нар ямар арчаагүй юм» гэхчилэн багш хүний амнаас гарахын аргагүй үгээр булж, тэнэг мангараар нь дуудаж доромжилсон гэнэ. Эндээс үзэхэд нэгмөсөн л төгсөх үед нь анги танхимаа оюутнуудаар тохижуулаад үлдвэл болоо бишүү Тэгээд ч бэлэг дурсгалын зүйлийг сэтгэлээсээ үлдээдэг болохоос бус аливаа байгууллагын албан үүрэг мэтээр төсөөлж болмооргүй! Тийм байлаа ч гэсэн Барилгын коллеж бол аль нэг газрын хувийн эзэмшил төдий газар биш юм.

 

Оюутнуудын сургалтын төлбөр бас төрөөс авдаг тэр их төсвийн мөнгө хаагуур л «тэнэх» гээд байна даа. Зүй нь анги танхимын тохижолт, техник хангамж, адаглаад энэ хэцүү өвчин зовлонтой үед оюутнуудыгаа эрүүл мэндийн үзлэгт хамруулах зэрэгт зориулах учиртай юм. Харамсалтай нь энэ нь тэдний сургуулийнхны хувьд үлгэр ажээ. Сургалтын төлбөрөөс нь энэ бүгдийг хийдэггүй юмаа гэхэд төрөөс тэдэнд тогтоосон МСҮТ-ийн 45,000 төгрөгний цалин нь 25,000 болж доожилсон гэнэ. Ерөнхий нягтлан Д.Сумьяа оюутнуудын шаардсаны дагуу төсөв, мөнгөний зарцуулалтаа тайлагнахдаа 9, 10 дугаар сард зөвхөн захирлын шатахууны хэрэгцээнд 9,000,000 төгрөг олгосон болохыг баримтаар дурьдсан нь Барилгын коллеж төрийн өмч биш, захирал Б.Чимиддоржийн хувийн өмч болох шахжээ. Төрийн өмчийн хороо шалгах нь яасан юм бол доо.

Машины ангийн оюутан Н.О: Манай сургуулийн багш нар бидэнд дарамт шахалт их үзүүлдэг. Сүүлдээ харьцахаас халгамаар. Сургуулийн 55 жил гээд багагүй мөнгө татсан. Ерөөсөө ингэхгүй бол тэгнэ, тэгэхгүй бол ингэнэ гэсэн дарамттай харилцаатай. Анхан шатны оюутанд олгодог 45,000 мянган төгрөгнөөс 10,000 төгрөгийг зөвшөөрөлгүй авсан шүү дээ.

Оройн ангийн оюутан Н.М: Тэнхмийн эрхлэгч Ж.Сарантуяа өмнөөс нь тайлбар тавьсаны төлөө дүнгээр боож, шалгалтанд унагасан тул аргагүйн эрхэнд 150,000 төгрөгний үнэтэй хонины мах өгч байж дүнгээ гаргуулсан. Зарим үед тэсэхэд үнэхээр хэцүү үе байна. Тэр үед бид нэг нэгэндээ «За за хөгшөөн одоо төгсөхийн хооронд хэл ам болоод яахав. Ямар насаараа ингэх биш. Наадах чинь төгсөхөд бөөн асуудал үүснэ.Боль, боль!» гэж ярьцгаадаг юм.

 

Анхан шатны оюутан Н.Б: Би сая дадлагад гарсан.120 мянгатын тэнд нэрийг нь мэдэхгүй үл мэдэх компанид өглөө 9 цагаас орой 21 цаг хүртэл ажиллуулж байгаа. Ажлын хөлс байхгүй, хоцрох юм уу, ядраад түр амрах гэхээр « Та нарыг сургуульд чинь хэлээд хөөлгөнө шүү! муусайн юмнууд.»гэж загнаад дарамтлаад байдаг.

Ийнхүү үйлдвэрлэлийн дадлага нэрийдлээр насанд хүрээгүй 15-16 насны суралцагчийн хөдөлмөрийг Монгол Улсын Хөдөлмөрийн хуульд заагаагүй нөхцөлд ажиллаж байгааг Олон улсын хүүхдийн байгууллага, Хүүхдийн төлөө үндэсний төв онцгой анхааралдаа авах нь зүйтэй юм. Мөн дээд боловсролын тухай хуулинд заасны дагуу мянган суралцагч тутмаас дээш суралцагчтай бол эмч байршуулан үйлчлэх ёстой ч энэ сургуулийн хувьд оюутнууд нь шаардахаас хэтэрдэггүй болоод уджээ. Тиймээс Барилгын коллежийн оюутнууд хэвлэл мэдээллийн хэрэгсэлд хандан тодорхойгүй хугацаагаар хичээл хаяж, эрх ашгийнхаа төлөө тэмцэж байгаа юм байна. Нэгэнт учир ийм тул БСШУЯ-ны Мэргэжлийн боловсролын дарга М.Баасанжав гуай та оюутнуудтайгаа газар дээр нь очиж, тэдний зовлонг хуваалцахгүй бол тэмцлийн хурц хэлбэрт шилжинэ гэдгээ хэлээд авсан шүү!

 

 

Монцамэ