Анх удаа үйлдвэрлэгчид 30 тэрбум төгрөгийн хөнгөлөлттэй зээл хүртэж, тэдэнд дорвитой дэмжлэг болж чадсан нь үйлдвэржилтийн жилийн томоохон ажлын нэг болсон гэдгийг албаны хүмүүс батлан ярьж байна. Нэг хувийн хүүтэй, гурван жилийн хугацаатай энэ зээлийн зэрэгцээ үйлдвэрлэл эрхлэгчдийн тоног төхөөрөмж, сэлбэг хэрэгслийг гааль болон НӨАТ-аас чөлөөлөхөөр болсон нь бас л цаг үеэ олсон дэмжлэг гэхэд болно.

 

Өнгөрсөн долдугаар сард УИХ-аас Жижиг, дунд үйлдвэрлэлийн зориулалттай тоног төхөөрөмж, сэлбэг хэрэгслийг гаалийн болон нэмэгдсэн өртгийн албан татвараас чөлөөлөх тухай хуулийг баталсан юм. Уг хуульд зааснаар “Барааг тодорхойлох, кодлох, уялдуулсан систем”-ийн дагуу үүнд хамаарах тоног төхөөрөмж, сэлбэг хэрэгслийн жагсаалтыг гаргаж, Засгийн газраас батлахаар заасан байгаа. Энэ ажлын хүрээнд яам, агентлаг, аж ахуйн нэгж, ТББуудаас жижиг, дунд үйлдвэрийн зориулалттай нийт 2398 нэр төрлийн тоног төхөөрөмж, сэлбэг хэрэгслийн саналыг ирүүлсэн байна.

 

Эдгээрээс нэмүү өртөг шингэсэн эцсийн бүтээгдэхүүн үйлдвэрлэхэд шаардлагатай тоног төхөөрөмж, зарим сэлбэг хэрэгслийг системчлэн Гаалийн ерөнхий газартай тохиролцсоны үндсэн дээр 684 нэр төрлийг сонгожээ. ХХААХҮЯ-наас Үйлдвэржилтийн жилийн хүрээнд авсан арга хэмжээ болоод үр дүнгийн талаар өчигдөр хийсэн хэвлэлийн бага хурлын үеэр энэ тухай мэдээллээ.

 

Жижиг, дунд үйлдвэрийн тухай хуульд зааснаар тамхи, согтууруулах ундааны үйлдвэр­лэл, ашигт малтмал эрэх, хайх, ашиглах, төлбөрт таавар, бооцоот тоглоом, эд мөнгөний хонжворт сугалаа, банк, банк бус санхүүгийн үйл ажиллагаа, даатгалын үйлчилгээ нь жижиг, дунд үйлдвэрт хамаардаггүй тул хөнгөлөлт эдлэхгүй гэнэ. Мөн “Атрын III аян” хөтөлбөрийн хүрээнд газар тариалангийн тоног төхөөрөмж татвараас чөлөөлөгдсөн учраас үүнд хамаарахгүй юм байна.

 

Гурван жилийн хугацаанд хэрэгжих энэ хөнгөлөлт нь жижиг, дунд үйлдвэрлэлийн техник технологийг шинэчилж, үндэсний бүтээгдэхүүнийг дэмжих зорилгыг агуулж байгаа гэсэн. Үндэсний томоохон аж ахуйн нэгжүүд бүтээгдэхүүний өрсөлдөх чадвараа дээшлүүлэн, экспортын бүтээгдэхүүн үйлд­вэр­лэхийн төлөө техник технологийн шинэчлэлд анхаарч байгаа аж.

 

Жижиг, дунд үйлдвэрүүдээс 2007 онд 17 тэрбум төгрөгийн гааль болон НӨАТ-ыг төлсөн бол өнгөрсөн онд 24 тэрбум төгрөгийг төлсөн гэх мэдээ байна. Хууль батлагдсанаас хойш их хоёр сарын хугацаанд 2.8 тэрбум төгрөгийн татварыг буцааж авахаар болоод байгаа гэсэн.

 

Эцсийн дүн мэдээ нь гараагүй ч одоогийн байдлаар 1400 гаруй аж ахуйн нэгж санхүүгийн дэмжлэг авч, 5000 гаруй ажлын байр бий болоод буй таатай мэдээ байна. Түүнчлэн хөнгөн хүнсний чиглэлээр 14 хувь, мал аж ахуй, газар тариаланд 23 хувь, барилгад 16 хувь, бусад чиглэлд 46 хувийн зээлийг олгоод байгаа юм. Олгосон зээлд мониторинг хийж нэгдсэн дүнгээ энэ сарын 20-ны дотор гарган, ирэх сарын эхээр Засгийн газар, УИХ-д тайлагнах тухайгаа холбогдох яамныхан мэдэгдлээ.