Улаанбаатар хотын баруун урд хэсэгт орших Хан-Уул дүүргийн Яармагийн дэнжид барих шинэ орон сууцны хорооллыг 3-н үе шаттайгаар барих ажээ. БНСУ-ын “ВКВ” групп бүтээн байгуулалтын хугацаанд нийт 281,5 тэрбум вон зарцуулахаар төлөвлөсөн байна. Эхний ээлжинд баригдах барилгууд 1241,6 мянган ам.метр талбай эзлэн сүндэрлэх бөгөөд хамгийн өндөр сууц нь 15 давхар байх юм байна. Эхний хэсгийн барилгажилтыг 2007-2009 онд, 2-р ээлжийнхийг 2009-2013 онд, сүүлийн ээлжийн барилгуудыг 2013-2020 оны хооронд барьж дуусгахаар тооцоолоод байгаа ажээ. Шинэ хорооллыг байгалын хий ашиглан цахилгаан дулаанаар хангах судалгаа хийж, сүүлийн ээлжийн барилгажилтад хэрэгжүүлэх гэнэ. 1, 2-р хэсгийн цахилгаан дулааныг төвлөрсөн хангамжаар буюу 4-р цахилгаан станцаас шугам татаж хангахаар шийдвэрлэжээ.

БНСУ-ын хөрөнгө оруулагч байгууллагын төлөвлөгөөгөөр бол Яармагийн дэнжид барилгын шинэ дэвшилтэт технологийн үр шим болсон, орчин үеийн дизайны шийдэл бүхий “Үлгэрийн хот”-ыг сүндэрлүүлэн босгохоор байгаа аж. Энэ төслийн үр дүнд Наадамчдын гудамж тэлж, Яармагийн гүүрнээс “Цагаан хаалга” хүртэлхи зам өргөн цэлгэр болох юм. Харин гүүрний баруун талаар дөрвөн урсгалтай 20 метрийн өргөнтэй шинэ гүүр барина.