Тэгвэл өчигдөр энэхүү ажлын явц ямар байгаа талаар уг арга хэмжээг зохион байгуулах ажлын хэсгийхэн хуралдлаа. НМХГ, нийслэлийн Цагдаагийн газар, Онцгой байдлын газар, Барилга, хот байгуулалт төлөвлөлтын газрынхан оролцсон энэ хурлаар “Хашаа” арга хэмжээний хүрээнд явуулж байгаа ажлын явцын талаар танилцуулж, тулгамдаж байгаа асуудал болон цаашид авч хэрэгжүүлэх арга хэмжээний талаар ярилцсан юм.

Энэ сарын зургаанаас хойш 90 хоногийн турш үргэлжлэх “Хашаа” арга хэмжээ өнгөрсөн долоо хоногт зөвшөөрөлгүй баригдсан хашаа, хайс болон гараашуудыг албадан буулгаснаар эхэлсэн. Одоогийн байдлаар 100 гаруй хашаа, хайс, 40 гаруй гараашийг буулгаад байна. Харин энэ долоо хоногт хашаа, хайс буулгах арга хэмжээ үргэлжлэн явагдаж, албадан буулгасан зардлыг барилга, байгууламж барьсан этгээдүүдээр төлүүлэх юм байна.

Сүхбаатар дүүрэгт нийт зөрчилтэй 54 байршил байдгаас өнгөрсөн долоо хоногт гурван байршил дээр нь ажилласан байна.

Баянзүрх дүүргийн хувьд “80 гаруй байршил бүртгэгдснээс 24 нь нийтийн эзэмшлийн зам талбайд зөвшөөрөлгүй хашаа хайс хатгасан байна. Мөн ТҮЦ, контейнер, 13 дугаар хорооллын Баянзүрх зах орчмын гарцуудыг нээх ажил хийгдэж байна” гэж тус дүүргийн Газрын албаны дарга А.Энхманлай ярьж байлаа. 

Нийслэлийн хэмжээнд зөвшөөрөлгүй барьсан гарааш, павильон, нийтийн эзэмшлийн зам талбайг хаасан хашаа, хайс зэрэг нийт 278 зөрчил байдгаас барилга барих зөвшөөрөлтэй ч хашаагаа тэлэх, өнгө үзэмж муутай зэрэг зөрчил нь тодорхой хувийг эзэлж байна. Мөн үүнээс гадна зөвшөөрөлгүй баригдсан нэлээн олон барилга байгаа бөгөөд дүүргүүд судалгаа хийж тоог гаргаж байгаа гэнэ. Гэвч үүнийг шийдвэрлэхэд олон бэрхшээлтэй тулгараад байгааг нийслэлийн Газрын албаныхан ярьж байсан. Тухайлбал Хан-Уул дүүрэгт баригдсан 11 давхар “Аморе” зочид буудал нь зөвшөөрөлгүй баригдсан барилга юм байна. Үүнийг хуулийн дагуу бол буулгах ба улсын орлого болгох ёстой. Гэтэл олон сая төгрөг зарцуулаад барьчихсан болохоор шууд буулгах боломжгүй зэрэг хүндрэлтэй асуудалтай тулгараад байгаа гэнэ. “Хашаа” арга хэмжээг зохион байгуулах ажлын хэсэг 14 хоногт нэг удаа хуралдаж ажлаа хэлэлцэж байх юм байна.