Монгол улсын иргэнд газар газар үнэгүй хувьчлах тухай хууль гараад таван жил өнгөрч байна. Энэ оны тавдугаар сарын байдлаар иргэдэд газар үнэ төлбөргүй хувьчлах ажил улсын хэмжээнд 25 хувьтай байгаа ажээ. Хөдөө орон нутагт, тэр тусмаа сумдад газар хувьчлалын явц тааруу байгаа гэнэ. Нийслэл хотод 162 мянган өрх амьдарч байгаагаас 90 гаруй мянган өрх айл газраа хувьчилж аваад байна. Улаанбаатар хотод хувьчлах ажил 60 гаруй хувьтай байгаа аж. Мөн нийслэлийн дөрвөн дүүргийн нутагт байрлах 19 аманд байх ногоон бүсэд буюу зуслангийн газрыг зургадугаар сарын 1-нээс иргэдэд үнэгүй хувьчлах ажлыг эхлэх аж.

2002 онд иргэдэд газар үнэгүй өмчлүүлэх тухай хууль батлагдаж 2003 оны 5 сарын 1-нээс эхлэн хэрэгжиж эхэлсэн. Нийслэл, аймаг, дүүргийн газрын албад газар хувьчлах ажлыг эрчимжүүлэх тал дээр тодорхой ажлыг хийж байгаа гэлээ. Одоогийн байдлаар 155 мянган өрх айл газраа хувьчилж аваад байгаа аж. Тэдгээр иргэдэд 500 гаруй тэрбум төгрөгийн үл хөдлөх хөрөнгийг хувьчлуулаад байгаа юм байна. Манай улсад 500 гаруй мянган өрх айл байгаагаас 300 мянга гаруй нь  газраа үнэ төлбөргүй хувьчилж авах боломжтой ажээ.